Տուլայից Երևան տեղափոխվող տուժածների բուժումն իրականացվելու է նեղ մասնագիտացված հաստատություններում

 Տուլայի տարածաշրջանում ավտոբուսի վթարի հետևանքով տուժածների տեղափոխումը կազմակերպելու և աշխատանքները տեղում համակարգելու նպատակով շարունակվում են Ուզլովսկի քաղաքի մոտ Մոսկվա-Երևան ուղղությամբ ուղևորատար ավտոբուսի վթարի կապակցությամբ ՀՀ վարչապետի որոշմամբ ստեղծված հանձնաժողովի անդամների հանդիպումները տուժողների և նրանց հարազատների հետ: Այս մասին տեղեկացրին ՀՀ առողջապահության նախարարությունից:

ՀՀ առողջապահության նախարար Արմեն Մուրադյանի և Տուլայի շրջանի առողջապահության նախարար Օլգա Ավանեսյանի մասնակցությամբ հրավիրվել է բժշկական կոնսիլիում, որի ընթացքում հստակեցվել են տուժածների հետագա բուժման հարցերը, առանձնացվել են այն հիվանդները, որոնց բուժման գործընթացը հնարավոր է շարունակել Հայաստանում: 

«Վերահսկողության և ճիշտ բուժման շնորհիվ դրական դինամիկա է առկա նույնիսկ վերակենդանացման բաժանմունքում գտնվող հիվանդների մոտ: Ընդհանուր առմամբ` մեր խնդիրն է հասկանալ յուրաքանչյուր հիվանդի ճակատագիրը. նա մնում է Տուլայում, տեղափոխվում Մոսկվա, թե` Երևան»,- լրագրողների հետ զրույցում ասել է ՀՀ առողջապահության նախարարը` հավելելով, որ առկա պայմանավորվածության համաձայն, անհրաժեշտության դեպքում տուժածների բուժումը կշարունակիվի նաև Մոսկվայի առաջատար կլինիկաներում: 

Արմեն Մուրադյանի տեղեկացմամբ` անմիջապես օդանավակայանից Երևան տեղափոխվող քաղաքացիների ամբողջ ծավալով բժշկական օգնությունը և վերականգնողական բուժումն իրականացվելու է նեղ մասնագիտացված հաստատություններում:

Հայկական պատվիրակությունը հանդիպել է նաև տուժածների հարազատներին և բարեկամներին: Ուզլովսկի քաղաքում նրանք այցելել են նաև վիրավորների և նրանց հարազատներին օգնելու նպատակով ձևավորված ժամանակավոր շտաբ: 

Ինքնաթիռով Երևան կգան նաև այն վիրավորները, որոնց առողջական վիճակը բժիշկների գնահատմամբ թույլ է տալիս տեղափոխում: Մյուս վիրավորների, այդ թվում՝ վերակենդանացման բաժանմունքներում գտնվողների բուժումը կշարունակվի այնքան ժամանակ, մինչև նրանց առողջական վիճակը ևս թույլ կտա տեղափոխվել Հայաստան:

Ռուսաստանի Դաշնության Տուլայի տարածաշրջանի Ուզլովսկի քաղաքի մոտ տեղի ունեցած Մոսկվա-Երևան երթուղու ուղևորատար ավտոբուսի վթարի զոհերի աճյունները Երևան կտեղափոխվեն այսօր` նոյեմբերի 5-ին, հատուկ չվերթով: Աճյունների տեղափոխումը կկազմակերպվի ՀՀ առողջապահության նախարարության կողմից : 

Նոյեմբերի 3-ին՝ դեպքից ժամեր անց, Մոսկվա-Երևան երթուղու ավտոբուսի վթարի հետևանքով զոհված Հայաստանի Հանրապետության քաղաքացիներիհուղարկավորության կազմակերպման և տուժած քաղաքացիներին ու նրանց ընտանիքներին անհրաժեշ տ օգնություն ցուցաբերելու նպատակով ՀՀ վարչապետիորոշմամբ ստեղծվել է հանձնաժողով, որի նախագահը ՀՀ տրանսպորտի և կապի նախարար Գագիկ Բեգլարյանն է: