Ռոբերտ Ուոլթերի հակահայ զեկույցն ազդեցություն չի ունենա. Թևան Պողոսյան

Երեկ ԵԽԽՎ քաղաքական հանձնաժողովում Ռոբերտ Ուոլթերը ներկայացրեց «Բռնության աճը ԼՂ-ում ու Ադրբեջանի մյուս օկուպացված տարածքներում» ոչ հայանպաստ զեկույցի նախագիծը:

Past.am-ը «Ժառանգություն» խմբակցության պատգամավոր Թևան Պողոսյանին հարցրեց՝ արդյոք կա՞ր դրանում հայկական կողմի թերացումը:

«Եթե ունենք այսօրվա արդյունքը, բնականաբար, կան թերացումներ: Այդ թերացումները մի քանիսինը չեն: Մենք գիտակցում և հասկանում էինք, թե ինչ է մեզ սպասում: Պետք էր ամեն ինչ անել , որ քաղաքական հանձնաժողովում զեկույցի քվեարկությունը ունենար հակառակ պատկերը: Եթե Ադրբեջանը 24 ներկայացուցիչ էր բերել, ապա մենք պետք է նվազագույնը 25-ը ունենայինք, որ դա հնարավոր լիներ»,- նշեց պատգամավորն ու հավելեց, որ սա թերացումն է բոլորի՝ ԱԺ-ի, ԱԳՆ-ի, սփյուռքի, ինչպես նաև համայնքի:

Խոսելով այս զեկույցի ազդեցության մասին՝ Պողոսյանն ասաց, որ դա ընդամենը մի թուղթ է լինելու , որը չի ազդելու ո՛չ բանակցային գործընթացի, ո՛չ էլ իրավիճակ է փոխելու տարածաշրջանում: Թևան Պողոսյանի խոսքով՝ ինչքան մեր բանակը հզոր և կանգուն լինի, այնքան որևէ խնդիր այդ փաստաթուղթն իրենից չի ներկայացնելու:
«Գուցե մի քանի տարի ադրբեջանական կողմը փորձի օտագործել այս փաստաթուղթը: Մի բան պետք է գիտակցենք, որ պետք էր ի սկզբանե համակարգային մոտեցումներ ցուցաբերել՝ թույլ չտալու համար նմանատիպ զեկույցներ: Մենք ունեցել ենք նախադեպ, երբ զեկույցի հակահայ դրույթները հաջողվել է հեռացնել: Այնուհանդերձ, այդ զեկույցը խնդիր չէ, եթե ունենանք հզոր պետություն, տնտեսություն և բանակ»,- ընդգծեց մեր զրուցակիցը:

Լևոն Փանոսյան