Հայ-ռուսական հարաբերություններն անորոշ են, խնդիր կա նաև Իրանի հետ. քաղաքագետ

Քաղաքագետ Սերգեյ Շաքարյանցը չի մեղադրում այն մարդկանց, որոնք վարչապետ Նիկոլ Փաշինյանի վարած արտաքին քաղաքականության ջատագովն են: Նա Tert.am-ի հետ զրույցում ասաց, որ յուրաքանչյուրը կարող է ունենալ իր կարծիքը, հատկապես արտաքին քաղաքականության հետ կապված: Սակայն անձամբ ինքը, ամփոփելով վարչապետ Փաշինյանի պաշտոնավարման 100 օրը, հայտարարում է, որ ՀՀ ռազմավարական դաշնակից ՌԴ-ի հետ հարաբերությունները բավականին անորոշ են: Նրա խոսքով՝ այս անգամ պատճառը ՌԴ-ն չէ, այլ անորոշ է ՀՀ կառավարության պահվածքը:

«Անորոշ է նաև Կառավարության անդամների կազմը, որովհետև ՌԴ-ում, կներեք, բայց ժողովրդական լեզվով ասած՝ վաղուց էշ չկա, ու բոլորի էությունն իրենց համար բացահայտել են, թե ո՞վ է, ի՞նչ, որտեղ ի՞նչ է արել, քանի՞  ձու է նետել ՌԴ դեսպանատան վրա և այլն: Ինչքան պետք է միամիտ լինի վարչապետ Փաշինյանը կամ այն մարդիկ, որոնք իրեն խորհուրդ են տվել կառավարությունն այդ մարդկանցով կազմել, կարևոր չէ, քանի որ կարևոր է հասկանալ՝ միամտության, թե խելապակասության արդյունք է:

ՌԴ համապատասխան մինիստրությունները շատ լավ գիտեն, թե ով ով է իր էությամբ, նրանք այս կամ այն հայտարարության չեն նայում»,- ասաց քաղաքագետը:

Սակայն Շաքարյանցը վտանգ է տեսնում ոչ միայն հայ-ռուսական հարաբերությունների վատթարացման հարցում: Նա առավել վտանգավոր տենդենց է նկատում հայ-իրանական հարաբերություններում: Այս ընթացքում Շաքարյանցը հասկացել է, որ ներկայիս կառավարությունը խնդիրներ ունի Իրանի հետ:

«Սկզբում անվտանգության խորհրդի նախագահ Արմեն Գրիգորյանն ուրախ հայտարարեց, որ շուտով այց է լինելու Թեհրան, սակայն մի քանի օր անց ԱԳՆ-ն հայտարարություն տարածեց, որ  Թեհրան այց կլինի, սակայն ոչ մոտակա ժամանակներում, մի խոսքով՝ անորոշ է: Բայց դժվար է հասկանալ, թե ինչու է անորոշ, եթե քեզ հստակ  3-րդ անգամ առաջարկում են այցելել Թեհրան: Ի՞նչ է պատահել, ո՞վ է ձեզ պահում, Ամերիկայի դեսպանությո՞ւն է պահում, որը բացեիբաց հայտարարում է, որ հայ գործարարը, որը ցանկանում է բիզնես անել Իրանի  հետ, թող գա մեզ մոտ նոր»,- ընդգծեց Սերգեյ Շաքարյանցը:

ՀՀ-ում ԱՄՆ  դեսպանի հայտարարությունից Շաքարյանցը ենթադրում է, որ ունենք կառավարությունը, որը  լիովին վերահսկվում է ԱՄՆ-ի կողմից, հակառակ դեպքում դեսպանն իրեն թույլ չէր տա տվյալ երկրում նման կերպ խոսել գործարարների հետ: Ըստ Սերգեյ Շաքարյանցի՝ Իրանի հետ հարաբերությունների ներկայիս վիճակն ավելի վատ է, քանի ՌԴ-ի հետ հարաբերություններում առկա անորոշությունը:

«Իրանն այլ  պետություն է, եթե նրա 3-րդ առաջարկությանը դու չես կարող հստակ պատասխանել, ապա ավտոմատ նրանք քեզ գրանցում են իրենց թշնամիների շարքում: Չեմ ցանկանում վախեցնել որևէ մեկին, բայց այն պետությունները, որոնք Իրանը թիրախ են համարել, ոչ մի բան չեն շահել»,- հավելեց նա:

 

Ինչ վերաբերում է Նիկոլ Փաշինյանի՝ Արցախի հիմնախնդրի հետ կապված դիրքորոշմանը, Սերգեյ Շաքարյանցն ասաց, թե ինքը համակարծիք չէ այն տեսակետի հետ, որ վարչապետ Փաշինյանն այս հացով կոշտացրել է դիվանագիտությունը:

«Կոշտացումը եղել է պոպուլիստական բնակչության համար, քանի որ նա հետագայում հայտարարեց, որ պատրաստ է բանակցությունների Ալիևի հետ: Հիմա չեմ կարող ասել, թե ում է տրված այդ ոլորտը, որովհետև, ըստ իս, Արցախի հարցով ԱԳ-ն կամ հենց կառավարության բանագնացը պետք է լինի մարդ, որը տարիներ շարունակ ուսումնասիրում է այդ հարցը, եղել է այդ հարցի մեջ, «լողացել» է այդ հարցի մեջ, այլ ոչ թե գա ու ասի՝ սենց է կամ նենց է: Նման կերպ չեն խոսում այն մարդկանց հետ, որոնք շատ աղ ու հաց են կերել բանակցային գործընթացի մեջ»,- եզրափակեց Սերգեյ Շաքարյանցը: