«Հայաստանի երեք նախագահներն էլ վարել են մեր երկրի պետականությունը լիկվիդացնելու և երկրում բատրակություն ստեղծելու քաղաքականություն». «Փաստ»

«Փաստ» օրաթերթը գրում է.

Քաղաքագիտության դոկտոր, պրոֆեսոր Լևոն Շիրինյանը համոզված է, որ մանր խարդավանքներ իրականացնելուց ավել, Քոչարյանը ոչինչ էլ չի կարող անել: Ավելին՝ չի կարողանա նաև քաղաքական գործոն դառնալ, քանի որ ՀՀ երկրորդ նախագահը քրեական պատասխանատվության է ենթարկվելու: Խոսելով ԱԺ փոխնախագահ Էդուարդ Շարմազանովի հայտարարության մասին, թե ՀՀԿ–ն խորհրդարանը լուծարելու անհրաժեշտություն չի տեսնում և պատրաստ են մինչև 2022 թվականը աշխատել, քաղաքագետը «Փաստի» հետ զրույցում կարծիք հայտնեց, թե դա պարզ մանիպուլյացիա է:

 

«2018 թվականի մայիսի 2–ին ողջ աշխարհում համահայկական քվեարկություն է եղել, որի արդյունքում իրենց իշխանությունը տապալվել է: Իրենք լեգիտիմ չեն, Ազգային ժողովը լեգիտիմ չէ, օրինական չէ, որովհետև հայությունը իրենց դեմ է քվեարկել: ՀՀԿ–ն այնպիսի դիրք է գրավել, թե ժողովուրդը գործոն չէ, բայց սխալվում են, քանի որ նման մոտեցումը հանգեցրեց Հայաստանի քայքայմանը, իրենց կառույցի քրեականացմանը և երկրում կողոպուտի միջավայր ստեղծելուն: Նախորդ իշխանությունները եթե իմանային, որ ժողովուրդը գործոն է, այն էլ ինքնիշխան գործոն, այդ ժամանակ կչափավորեին իրենց նկրտումները, և երկրում ճգնաժամ չէր առաջանա: Իսկ այն պատրանքը, թե Քոչարյանին պատասխանատվության ենթարկելը քաղաքական ենթատեքստ ունի, որևէ առնչություն չունի իրականության հետ»,– ասաց քաղաքագետը:

Լ. Շիրինյանի կարծիքով, ներկա իշխանությունների լեգիտիմությունը հաստատվել է մայիսի 2–ի համազգային դասադուլ–գործադուլով, որին հաջորդեց իշխանափոխությունը, և հետևաբար վարչապետ Նիկոլ Փաշինյանը ցանկացած օր ՀՀԿ–ի լեգիտիմության հարցը բարձրացնելով՝ կարող է խորհրդարանը ցրելու որոշում ընդունել: 

Խոսելով ներկա ներքաղաքական խմորումների մասին՝ նա նշեց, որ օլիգարխիան, որը ջախջախվելու վտանգը տեսնելով ջղաձգված է, պահն օգտագործելով՝ փորձում է պատրանք առաջացնել, թե ինքը չի ծառայել նախկին իշխանություններին: Միևնույն ժամանակ չեն էլ փորձում բացատրել, թե որտեղից իրենց այդքան սեփականություն, որտեղ է հիմա հայրենի արդյունաբերությունը, գիտությունը և այլն: 

Ինչ վերաբերում է նախկին իշխանություններին, ապա, ըստ Շիրինյանի, նրանք էլ դեռ չեն պատասխանել այն հարցերին, թե ապրիլ յան պատերազմի ժամանակ ինչո՞ւ հայկական կողմն այդքան զոհեր ունեցավ, այդ օրերին ո՞ւր էին երկրի գերագույն գլխավոր հրամանատարը, նախարարը և մնացած պատասխանատուները: Իսկ աշնանային կամ գարնանային քաղաքական սրացումներ, որպես այդպիսին, ըստ Շիրինյանի, չեն լինի:

«Ապագայում Հայաստանի պետական շահերի աճուրդ չի լինելու, իսկ իրավիճակն արմատապես փոխվելու է: Մնացածն էլ, կապրենք՝ կտեսնենք: Վարչապետին էլ դիմում եմ հետևյալ առաջարկով՝ ինչքան ընտրությունները ձգձգվեն, այնքան ներքաղաքական ներկա իրավիճակը հնարավորություն է տալու խարդավանքները շարունակել, թե իբր օլիգարխիան կարող է համախմբվել: Չի լինի նման բան, քանի որ Հայաստանը որպես օլիգարխիկ պետություն մեռել է, և օլիգարխիան մինչև վերջ պետք է ոչնչացվի: Միայն այդ ժամանակ մենք կունենանք պետություն, հայրենիք և մեր ճակատագիրը ինքնուրույն տնօրինելու հնարավորություն»,– ասաց Լ. Շիրինյանը:

Քաղաքագետի կարծիքով Հայաստանից կողոպտած ամեն ինչ պետք է հետ վերադարձվի, իսկ երկրի կողոպտիչ իշխանությունները պետք է օրենքով պատժվեն, քանի որ մինչ այս զբաղված են եղել միայն երկիրը ասպատակության ենթարկելով: Ուստի, Լ. Շիրինյանը համոզված է, որ ներկա իշխանությունները օրենքով սահմանված ողջ գործիքակազմը պետք է գործի դնեն ժողովրդից թալանածը հետ վերադարձնելու համար:

«Հանրապետականը Դաշնակցության հետ միասին քանի տարի հայ ժողովրդի իրավունքները բռնաբարեց: Ո՞ր երկում են պետական ունեցվածքը կողոպտելով հարստանում: Կարո՞ղ եք պատկերացնել, որ Մերկելի եղբոր կամ քրոջ տղան նարկոտիկներով զբաղվի, կամ նրա եղբայրը մարդկանց ունեցվածքի վերաբաշխումով զբաղվի: Թավշյա հեղափոխությունը հռչակել է Հայաստանի պետականության վերականգնում, և դրանով ամեն ինչ ասված է: Նախկին իշխանություններն իրենց գործողություններով կա՛մ միտումնավոր են պետությունը քայքայել, որպեսզի օտարը այն հեշտ կարողանա նվաճել, կա՛մ էլ շարքային կողոպտիչներ են գեներալների ուսադիրներով: Հայաստանի երեք նախագահներն էլ վարել են մեր երկրի պետականությունը լիկվիդացնելու և երկրում բատրակություն ստեղծելու քաղաքականություն, որի համար նրանց բոլորին էլ պատիժ է հասնում»,– ասաց քաղաքագիտոթյան դոկտորը: