«Չեմ ուզում, որ նորից հայտնվենք «կոտրած տաշտակի» առջև». քաղաքագետ. «Փաստ»

«Փաստ» օրաթերթը գրում է.

Ինչպես ընտրական գործընթացներում, այնպես էլ հետհեղափոխական շրջանում հասարակության բևեռացումներն, իհարկե, հնարավոր չէ կանխատեսել, բայց կարելի է մեղմել: Նման կարծիք ունի քաղաքագետ Գագիկ Համբարյանը, ում կարծիքով հնարավոր բևեռացումը և դրանից բխող իրավիճկը կարող է մեղմել իշխանությունը: 

«Իրավիճակն այսօր բավականին լարված է և հետզհետե ավելի է լարվում թե՛ սոցցանցերում, թե՛ լրատվական դաշտում և թե՛ հանրային քննարկումների ժամանակ: Ընդհանուր առմամբ` հետհեղափոխական հասարակություններում հասարակության որոշակի մասը ցավոտ է վերաբերվում հեղափոխության արդյունքում իշխանության եկած ուժերի նկատմամբ քննադատություններին: Սա վտանգավոր երևույթ է, իսկ հասարակության ներսում առկա բևեռացումը հանգեցնում է հասարակության ներսում թշնամության սերմանմանը: Դրա դեմ պետք է պայքարեն իշխանությունները»,–«Փաստ»–ի հետ զրույցում ասաց քաղաքագետը` հավելելով, որ մեր պարագայում վարչապետ Նիկոլ Փաշինյանը կարող է իր կողմնակիցներին կոչ անել ավելի զգույշ լինել իրենց հայտարարություններում:

«Դա կարող է դրական ազդեցություն ունենալ և ավելի առողջացնել հասարակությանը: Համեմատություններ անել չեմ ուզում, բայց… Սերժ Սարգսյանի օրոք կար անձեռնմխելիների և «բեսպրեդելչիկների» մի կաստաորը թքած ուներ հասարակության շահերի վրա: Այդ ամենի արդյունքը եղավ թավշյա հեղափոխությունը: Հիմա շատ լավ կլինի, որ նույն Նիկոլ Փաշինյանը թույլ չտա, որ իր կողմնակիցները մյուսներին ճնշելու, վիրավորելու և նրանց այլախոհությունը չընդունելու համար ուղղակիորեն օգտագործեն իր անունը. Նիկոլ Փաշինյանը մեծ պատասխանատվություն ունի հասարակության նկատմամբ: Քանի որ իրենց ուժն է իշխանության` իրենց պատասխանատվությունը եռակի մեծ է: Իսկ նախկին իշխանությունների նկատմամբ իրականացվող գործողությունների հիմքում բացառապես օրենքը պետք է լինի: Հիմա հետհեղափոխական էյֆորիա է, բայց հետագայում, երբ ամեն ինչ ավելի սառը գլխով դատեն, կհասկանան, որ գուցեև ներկա և նախորդ իշխանությունների միջև ոչ մի տարբերություն չկա: Իսկ ես չեմ ուզում, որ Նիկոլ Փաշինյանի իշխանությունը նմանվի Սերժ Սարգսյանի իշխանությանը: Չեմ ուզում նաև, որ Նիկոլ Փաշինյանի իշխանության մեջ գտնվող մարդիկ իրենց անձեռնմխելի զգան: «Սերժսարգսյանական» Հայաստանի գլխավոր խնդիրը անձեռնմխելիների և «բեսպրեդելչիկների» այդ կաստան էր, որը կործանեց թե՛ իրեն, թե՛ իր իշխանությունը: Հասարակությունն արդեն սովորել է հեղափոխության միջոցով տապալել չընդունված իշխանավորին: Նույնը կարող է տեղի ունենալ նաև հետագայում, եթե մեր նոր իշխանությունները նախկինների արարքներից դաս չքաղեն»,–նշեց մեր զրուցակիցը: 

Նրա խոսքով` այսպես ասած, մերոնքականների ու ձերոնքականների բաժանումը կբևեռացնի հասարակությանն ու հասարակության մեջ կրկին պառակտումներ կլինեն: 

«Թավշյա հեղափոխության գլխավոր ձեռքբերումներից մեկն այն էր, որ հասարակությունը գրեթե միավորվել էր, իսկ հիմա պետք չէ այդ միավորված հասարակությանը պառակտել: Այո, շատ անձինք կարող են քաղաքական այլ հայացքներ ունենալ, բայց հասարակության ահռելի հատվածը ողջունեց թավշյա հեղափոխությունը, ինչն արդեն միավորում է: Ես չեմ ուզում, որ գործող իշխանության մեջ գտնվող անձանց անզգույշ, չպատրաստված լինելու պատճառով հնչեցրած հայտարարությունների հետևանքով հայտնվենք նույն կոտրած տաշտակի առաջ, որը կար Սերժ Սարգսյանի կառավարման տարիներին: Ասում էին ՀՀԿ, և բոլոր տեսակի դռներն այդ անձերի դեմ բացվում էին, ձերբազատվում էին պատասխանատվությունից»,–հավելեց նա:

Քաղաքագետը նաև նկատեց, որ նոր իշխանությունները, նրանց ուժի ներկայացուցիչները պետք է հասկանան իրենց պատասխանատվության չափը:

«Պետք է հասկանան, որ ամեն անզգույշ հայտարարություն կարող է խնդիրներ ստեղծել ոչ միայն հասարակության, այլև իրենց` իշխանության համար: Հայաստանում թավշյա հեղափոխության ժամանակ մարդ չի զոհվել. թե՛ հասարակության և թե՛ պետության պատասխանատվությունը միմյանց նկատմամբ բավականին մեծ է: Մենք չպետք է ունենանք Մարտի 1, պառակտված հասարակություն»,–նշեց քաղաքագետը` հավելելով, որ մերոնքականների ու ձերոնքականների բաժանումը բերեց այն վիճակին, ինչը կար նախկինում:

«Նիկոլ Փաշինյանը պետք է սովորի նախկինների սխալների վրա: ՀՀԿ–ականների անձեռնմխելիությունը ու անպատժելիությունը ծնեց թավշյա հեղափոխությունը: Նախորդների սխալները չպետք է կրկնեն նոր իշխանությունները: Հայաստանում «մեր դեմ խաղ չկա», «մենք ինչ ուզենք` կանենք» կարգախոսով առաջնորդվողներ չպետք է լինեն: Նման կարգախոսներով առաջնորդվողները քաղաքական դաշտում երկար կյանք չեն ունենալու»,–ընդգծեց Գագիկ Համբարյանը: