Արևիս-Թասիկ-Հացավան ավտոճանապարհին հարակից 500 հա խոտածածկ տարածքում բռնկված հրդեհը մեկուսացվել է

Սյունիքի մարզի Արևիս-Թասիկ-Հացավան ավտոճանապարհին հարակից խոտածածկ տարածքում բռնկված հրդեհը մեկուսացվել է։ Այրվել են մոտ 500 հա խոտածածկույթ, մոտ 70 էլեկտրական սյուն, Հացավան գյուղի վերջնամասում գտնվող անասնագոմի տանիքի կառուցատարրերը՝ 500 քմ և ներսում՝ 3000 հակ անասնակեր։ Այս մասին «Արմենպրես»-ին տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից։

«Սեպտեմբերի 15-ին, ժամը 12:01-ին «911» ծառայությանն ահազանգ է ստացվել, որ Սյունիքի մարզի Արևիս-Թասիկ-Հացավան ավտոճանապարհին հարակից խոտածածկ տարածքում հրդեհ է բռնկվել. անհրաժեշտ է փրկարարների օգնությունը:

Դեպքի վայր են մեկնել ՀՀ ԱԻՆ ՓԾ հրշեջ-փրկարարական ջոկատից հինգ մարտական հաշվարկ, հրշեջ-փրկարարական ջոկատի և մարզային փրկարարական վարչության օպերատիվ խմբերը:

Պարզվել է, որ այրվում է մոտ 500 հա խոտածածկույթ:

Հրդեհը մեկուսացվել է ժամը 00:04-ին:

Այրվել են մոտ 500 հա խոտածածկույթ, մոտ 70 էլեկտրական սյուն, Հացավան գյուղի վերջնամասում գտնվող անասնագոմի տանիքի կառուցատարրերը՝ 500 քմ և ներսում՝ 3000 հակ անասնակեր։

Դեպքի վայրում է գտնվել ԱԻ նախարար Հ. Ռոստոմյանը: Ժամը 01:11-ից սահմանվել է հերթապահություն (մեկ մարտական հաշվարկ)։

Հրդեհաշիջման աշխատանքներին մասնակցել են Արևիս, Թանահատ, Թասիկ, Հացավան և Սալվարդ գյուղերի բնակիչներ, Սիսիանի համայնքապետարանի աշխատակիցներ, թիվ N զորամասի 20 զինծառայող, Գորիսի համայնքապետարանի 2 ջրատար ավտոմեքենա։ 

Առկա են ծխացող օջախներ. կտրվի լրացուցիչ տեղեկություն»: