Ռուսաստանից գազ գնելու Վրաստանի որոշումը խուճապ է առաջացրել ադրբեջանական կողմի մոտ

 Ռուսաստանից գազի գնումներ կատարելու մասին Վրաստանի որոշումը խուճապ է առաջացրել ադրբեջանական կողմի մոտ: Այս մասին նոյեմբերի 6-ին լրագորղների հետ հանդիպմանն ասաց   Քաղաքական եւ իրավական հետազոտությունների կենտրոնի ղեկավար, Վրաստանի հարցերով փորձագետ Ջոնի Մելիքյանը, ով միաժամանակ կոչ արեց չմոռանալ, որ Վրաստանում սպառվող գազի ավելի քան 86%-ը տրամադրվwւմ է Ադրբեջանի կողմից:

«Վրաստանը օրեր առաջ հայտարարել էր, որ գազի մատակարարման դիվերսիֆիկացիայի նկատառումներով երկիրը պատրաստ է վերսկսել գազի գնումները Ռուսաստանից, ինչպես նաև դիտարկել Իրանից գազի գնման տարբերակները: Ադրբեջանական կողմի անհանգստությունը ապացուցում է նաև ադրբեջանական «Սոկառ» ընկերության տնօրենի հայտարարությունը, ով չկարողացավ պարզաբանել, թե ինչու Ադրբեջանը չունի հնարավորություն ավելացնելու իր մատակարարումները այս տարի գազի պահանջարկի ակնկալվող մեծացմանն ի պատասխան, որը կանցնի 2,5 միլիարդ խմ-ից», - ասաց  Ջոնի Մելիքյանը:

Քաղաքագետը հավելեց, որ Իրանի հետ գազային համագործակցության հաստատման արդյունքում Վրաստան ներմուծվող գազը կանցնի Հայաստանի կամ Ադրբեջանի տարածքով: Իսկ հաշվի առնելով ռուսական կողմին պատկանող հայ-իրանական գազամուղը, ակնկալիքներ կան, որ այն կդառնա հիմք` Հայաստանի` տարանցիկ երկրի դերի ստանձնման համար: Այս հանգամանքը ձեռնտու կլինի Հայաստանին, քանի որ այդպիսով տվյալ դեպքում կակտիվանան Իրանի, Վրաստանի և Ռուսաստանի փոխհարաբերությունները:

Ջոնի Մելիքյանի խոսքով, Վրաստանի ներքաղաքական կյանքում Ռուսաստանից և Իրանից գազի գնման վերաբերյալ հայտարարությանն ի պատասխան արձագանքները տարատեսակ էին: Իսկ նախօրեին Վրաստանի և Ադրբեջանի նախագահների համատեղ ասուլիսի ժամանակ Իլհամ Ալիևը հայտարարեց, որ Ադրբեջանն իրեն, իր հարևաններին և Եվրոմիությանն դեռ 100 տարի գազով ապահովել հնարավորություն ունի, սակայն կարծիքներ կան, որ իրականում այդ հայտարարությունը չէր վերաբերում կոմերցիոն գազին, որը Վրաստանը պատրաստվում է գնել: