Հույս ունեմ՝ այս դեպքում ևս հուսախաբ չենք անի. «Բախտաբերի» սցենարիստը նույն կազմով նոր սերիալի և «Երջանկության արցունքների» մասին

Ընտանեկան իրավիճակներն արտացոլող նախագծերն ամենից մեծ պահանջարկ ունեցող «պրոդուկտներն» են: Այդ են փաստում ժամանակին մեծ վարկանիշ ունեցող Հանրային հեռուստաընկերության «Կյանքի կարուսել», «Արմենիա» հեռուստաընկերության «Մի Ստիր», ATV-ի «Երջանկության մեխանիկա» հաղորդաշարերը, որոնք ինչ-ինչ պատճառններով «հեռուստապատմության» գիրկն անցան:

Սակայն մի քանի օրից ATV-ին հերթական նոր անակնկալով կներկայանա հեռուստադիտողին: «Բախտաբեր» և «Վերջին հայրիկը» սերիալների սցենարիստ Անահիտ Մխիթարյանը ստանձնել է վերածնված նախագծի պրոդյուսերական աշխատանքները: «Կյանքի կարուսելը սիրված նախագիծ էր, այդ էր պատճառը որ հնարավորություն ստանալով ATV հեռուստաընկերությունում նախագիծ իրականացնել՝ ընտրեցի այդ ֆորմատը: Ինքս հանդես եմ գալիս որպես պորդյուսեր: Սցենարական աշխատանքով զբաղվելու են «Կյանքի կարուսելի» սցենարսիտները: Ասեմ, որ հիմնականում իրական պատմություններ են ընդգրկված»,-Aysor.am-ի հետ զրույցում մանրամասնեց պրոդյուսերը:

Նորովի կյանք ստացած նախագիծը կոչվում է «Երջանկության արցունքները»: Այն կմեկնարկի նոյեմբերի 9-ից՝ երկուշաբթիից-ուրբաթ՝ ժամը 18:55-ին: Դերասանական կազմում ընդգրկված են արտիստներ «Կյանքի կարուսելի» և «Արմենիայի TV»-ի «Մի ստիր» նախագծից. «Հանրայինի նախագծից մասնակցում են Հասմիկ Ասլանյանը, Վեներա Թարզյանը, Հայկ Մնացականյանը, Բագրատ Գևորգյանը, Արթուր Պետրոսյանը, Կարեն Սիմոնյանը, Ռոման Բաբայանը, դերասան-ամուսիններ Ծովինար Մարտիրոսյանն ու Նարեկ Հայկազյանը... «Մի ստիր»-ից ներգրավված են Իշխան Ղարիբյանը և կինը՝ Թեհմինե Խաչատրյանը, նաև կրկին ամուսիններ Սիրանուշ Լազյանն ու Սամվել Դանիելյանը»...

«Ես գիտեմ, որ նախկին նախագիծը մեծ լսարան է ունեցել և  հույս ունեմ՝ այս դեպքում ևս հուսախաբ չենք անի»,-հավելեց մեր զրուցակիցը:

Ի դեպ, մեր նախորդ զրույցում Անահիտ Մխիթարյանը տեղեկացրեց, որ «Բախտաբեր» սերիալի ստեղծագործական կազմը ձեռնարկում է մի նոր սերիալի նկարահանում: Հարցին, թե ի՞նչ փուլում է այդ նախագիծը արդյոք նախորդ սերիալի դերասանական կազմն է ընդգրկված լինելու ՝ մեր զրուցակիցը պատասխանեց. «Իսկապես, «Բախտաբերի» թիմը արդեն իսկ սկսել է նախապատրաստական աշխատանքները: Այժմ մտածում ենք հետաքրքիր թեմա ունենալու մասին, դեռևս պրպտումների մեջ ենք: Միայն կարող եմ վստահեցնել, որ «Բախտաբերի» դերասանների մի մասն ընդգրկված կլինի նաև այս սերիալում, բայց թե ովքե՞ր՝ չգիտեմ»: