Մասնագետի գործոնն ու ճիշտ մենեջմենթը. որակի ուղենիշներ՝ «Դավիդյանց լաբորատորիաներ»–ից. «Փաստ»

«Փաստ» օրաթերթը գրում է.

Երբ տասը տարի առաջ ստեղծվեց «Դավիդյանց լաբորատորիաներ» ախտորոշման կենտրոնը, ոլորտում արդեն կային կայացած կենտրոններ: Տասը տարի անց շատ բան փոխվեց՝ «Դավիդյանց լաբորատորիաներ» ախտորոշման կենտրոնը համալրեց կայացածների շարքը, օր օրի շարունակեց զարգանալ, բայց չփոխեց նշանաբանը՝

Երբ որակը կապ ունի…

«Մեզ համար առաջին ուղենիշը որակն է: Ստեղծման օրվանից մենք մտածում ենք որակի մասին: Գուցեև անալիզ ենք ուշացրել, կամ նորից հաճախորդին հրավիրել մեզ մոտ, բայց դա ունեցել է իր բացատրությունը՝ հիմքում կրկին որակն է եղել: Իսկ որակի գրավականը, ըստ մեզ, բաղկացած է մի քանի հանգամանքներից: Նախ՝ ընդամենը լավ ներդրում կատարելը, ինչպես նաև աշխարհի ամենալավ սարքավորումներ գնելը դեռ շատ քիչ է, որովհետև անգամ աշխարհի լավագույն սարքավորման կողքին պետք է լավ մասնագետ լինի: Լավագույն սարքավորումներ ունենալը դեռ չափանիշ չէ: Ես եղել և ուսանել եմ աշխարհի այնպիսի կենտրոններում, որտեղ աշխատել են համաշխարհային մակարդակի պրոֆեսորներ: Այդ կենտրոններում լավագույն սարքավորումները չեն եղել: Իրականում ճիշտ կադրային քաղաքականություն պետք է լինի. կարևորը մասնագետի գործոնն է՝ ճիշտ մենեջմենթի ներքո»,–«Փաստ»–ի հետ զրույցում ասաց «Դավիդյանց լաբորատորիաներ» ԱԿ ղեկավար Աշոտ Դավիդյանցը:

Լաբորատորիան չպետք է իր վրա վերցնի այն գործառույթը, որը բժշկինն է

«Դավիդյանց լաբորատորիաներ» ԱԿ–ի համար որակի մյուս գրավականը աշխատանքի ճիշտ կազմակերպումն է, որի դեպքում հաշվի է առնվել մենեջմենթի միջազգային փորձը: «Մի ձեռքով խփել սեղանին… զեկուցագրեր…». նշվածները խորթ են կենտրոնի համար, ասում է Դավիդյանցը

Աշոտ Դավիդյանցն իր կենտրոնում աշխատասենյակ չունի, քանի որ, իր խոսքով, աշխատասենյակը չէ այն կարևոր հանգամանքը, ըստ որի լաբորատորիաները լավագույնը կլինեն. «Մեր բժիշկներն ավելի մեծ աշխատասենյակներ ունեն, իրենց պայմանները շատ ավելի լավն են, որովհետև իրենք են արդյունք տալիս»:

Մեր զրուցակիցը խոսեց մեկ այլ կարևոր նշանաբանի մասին, որով առաջնորդվում են. «Մենք բժշկի ձեռքում զենք ենք: Ճիշտ է, ծառայում ենք այցելուին, բայց մեր աշխատանքը բժշկի հետ է: Առհասարակ լաբորատորիան իրավունք չունի տալ, օրինակ, շաքարային դիաբետի ախտորոշումը: Լաբորատորիան պարզապես ասում է, որ շաքարը բարձր է: Իսկ դա շաքարային դիաբե՞տ է, թե՞ ոչ՝ ախտորոշումը տալիս է էնդոկրինոլոգը: 

Մենք տալիս ենք ուռուցքի ձևը, տեսակը և այլն, բայց ուռուցքի վերջնական պատկերը տալիս է ուռուցքաբանը: Լաբորատորիան չպետք է իր վրա վերցնի այն գործառույթը, որը բժշկինն է»:

Աշոտ Դավիդյանցը շեշտեց, որ երբեք իրենց լավագույնը չեն համարում. «Այն օրը, երբ թույլ կտանք մեզ լավագույնը անվանել, այդ օրվանից կդադարի զարգացումը: Իսկ բժշկությունը և հատկապես լաբորատոր գործունեությունը մշտական զարգացման ու կրթման կարիք ունեն: Դու այդ պահին կարող ես շատ հաճախորդներ, զանգեր, կոնսուլտացիաներ ունենալ, բայց միևնույն է, եթե այսօր երեկոյան չկարդացիր, չուսումնասիրեցիր՝ վաղը հետ ես ընկնելու»:

Մրցակցությունը ստիպում է զարգանալ

Աշոտ Դավիդյանցի խոսքով՝ մի կողմից շատ լավ է, որ այսօր բազմաթիվ կենտրոններ կան, քանի որ մրցակցությունը ստիպում է շարունակել զարգանալ, ինչից էլ շահում են միայն քաղաքացիները և համակարգը: 

«Մյուս կողմից, սակայն, որոշակի կարգավորում է պետք: Ես շատ ուրախ կլինեմ, որ պետությունն էլ օգնի՝ սահմանելով համապատասխան վերահսկում: Մենք կողմ ենք վերահսկմանը, և խոսքը միայն հարկային դաշտի մասին չէ: Միշտ ասում ենք՝ նորմատիվներ սահմանեք, որովհետև դա օգուտ է ոլորտին: Նորմատիվները պետք է ամրագրվեն պետական փաստաթղթերով: Հուսով ենք՝ դրանք շուտով կլինեն»,–ասաց Ա. Դավիդյանցը:

Վերջինիս դիտարկմամբ՝ իրենց կենտրոնի համար կարևորն առողջապահական գործառույթ կատարելն է. առավելագույնը ճիշտ և որակյալ անալիզներ տալ:

«Եզակիներից ենք, որ ունենալով լավ համբավ՝ շարունակում ենք չունենալ ուլտրաձայնային, ԿՏ կամ այլ գործիքային հետազոտություններ, որովհետև գտնում ենք, որ մեր մասնագիտացումը հենց լաբորատոր հետազոտություններ կազմակերպելն է»,–շեշտեց նա: 

Հիմնադրումից արդեն տասը տարի անց կենտրոնը բազմաթիվ նոր ծառայություններ է առաջարկում:

«Արյան, բիոքիմիական, իմունոլոգիական, ընդհանուր կլինիկական, ինֆեկցիաների հետազոտություններ: Նաև գենետիկ և հյուսվածաբանական հետազոտություններ ենք իրականացնում: Ունեցանք այնպիսի զարգացում, ինչի արդյունքում նոր մասնաշենք կառուցեցինք՝ հատուկ առանձնացնելով հիստոլոգիական ծառայությունը: Առանձնացրել ենք նաև ավելի մեծ տարածքներ՝ այլ հետազոտությունների համար: 

Սպեցիֆիկ հիվանդություններ հայտնաբերող եզակիներից մեկը

 

Եզակիներից մեկն ենք նաև, որ կատարում ենք այնպիսի հետազոտություններ, որոնց միջոցով ինֆեկցիոն սպեցիֆիկ հիվանդություններ են հայտնաբերվում: Այդ հիվանդություններն, այսպես կոչված, մոռացված հիվանդություններն են, որոնք կարևոր տեղ են գրավում դիֆերենցիալ ախտորոշման մեջ: Իսկ հիստոլոգիական ծառայությանը, արդեն իսկ եղած իմունահյուսվածաքիմիականին ուռուցքաբանությունում ավելացան գենետիկ հետազոտություններ՝ CISH, FISH և PCR մեթոդներով: Այսինքն՝ «Դավիդյանց լաբորատորիաներ»–ում ուռուցքային բջիջները նաև գենետիկ հետազոտությունների են ենթարկում»,–ասաց մեր զրուցակիցը:

Տասնամյակի, ինչպես նաև նոր մասնաճյուղ ունենալու առիթով ախտորոշման կենտրոնը շուտով քաղաքացիներին մի շարք փաթեթներ է առաջարկելու: «Իմ մաքուր դայակ», «Առողջ գնում եմ մանկապարտեզ» և մի շարք այլ փաթեթների միջոցով քաղաքացիները հնարավորություն կունենան միանգամից մի քանի ծառայություններից օգտվել ավելի մատչելի գնով:

Բացի այդ՝ մեր առաջիկա համարներում կենտրոնի ղեկավար Աշոտ Դավիդյանցի հետ կանդրադառնանք «Դավիդյանց լաբորատորիաներ» ծառայություններին՝ ըստ ոլորտների. հյուսվածաբանական, մանրէաբանական, մակաբուծաբանական, կլինիկալաբորատոր, գենետիկական և այլն: