Քննչական կոմիտեում քննվող գործերի թիվը զգալիորեն ավելացել է, ծառայողներն աշխատել են գերծանրաբեռնված

ՀՀ քննչական կոմիտեի ծառայողները լիովին գիտակցում են իրենց դերակատարության կարևորությունն ու նշանակությունը երկրում օրինականության հաստատման գործում:  ՀՀ քննչական կոմիտեում անցկացվող կոմիտեի աշխատողի օրվան նվիրված հանդիսավոր նիստին նշեց ՀՀ քննչական կոմիտեի նախագահ Հայկ Գրիգորյանը:

«2018 թվականի 9 ամիսներին ՀՀ քննչական կոմիտեն գործել է գերծանրաբեռնված, քննիչների վարույթում քննվել է 19 հազար 521 քրեական գործ: Այս ցուցանիշը նախորդ տարվա նույն ժամանակահատվածի համեմատ ավելացել է 4 հազար 105-ով, կամ 26.6 տոկոսով: Ընդ որում, գործերի 41 տոկոսը բաժին է ընկել 2018 հուլիսի 10-ից հոկտեմբերի 10-ն ընկած ժամանակահատվածին»,- «Արմենպրես»-ի հաղորդմամբ նշեց Հայկ Գրիգորյանը:

Կոմիտեի նախագահը նշեց, որ քրեական գործերի աննախադեպ աճի համատեքստում աշխատանքի բարձր մակարդակը ոչ միայն պահպանվել ,է այլև աճել: Ավարտված գործերի թիվը նախորդ տարվա նույն ժամանակահատվածի համեմատ ավելացել է 2 հազար 347-ով: Ընթացիկ տարվա 9 ամիսների ընթացքում նախաքննությունն ավարտվել է 6 հազար 390 քրեական գործով, որից 34.1 տոկոսն ավարտվել  է երրորդ եռամսյակում:

«Այս տվյալները վկայում են, որ Քննչական կոմիտեի ծառայողները ջանք ու եռանդ չեն խնայում հնարավորինս սեղմ ժամկետներում ավարտելու նախաքննությունն՝ անհարկի անհարմարություններ չպատճառելով քաղաքացիներին»,-ասաց Հայկ Գրիգորյանը:   

2015 թ. սեպտեմբերի 25-ին կառավարության նիստում որոշվել է, «ՀՀ տոների և հիշատակի օրերի մասին» օրենքի համաձայն, հոկտեմբերի 8-ը նշել որպես Քննչական կոմիտեի ծառայողի օր: