«Դպրոցները փակելու որոշման մեջ «փակել», «լուծարել» բառերը չեն օգտագործվում». «Փաստ»

«Փաստ» օրաթերթը (հեղինակ՝ Արմինե Գրիգորյան) գրում է.

Հանրապետության խոշոր քաղաքներից մեկում հիմնական դպրոցի տնօրենի թափուր հաստիքի համար հայտարարված մրցույթին մասնակցելու դիմում չներկայացնելու դեպքը առիթ հանդիսացավ մտորելութե ինչպես կարող է գործազրկության նման պայմաններում այդպիսի առաջարկի հանդեպ պահանջարկ չձևավորվել: Պատկերն ավելի հետաքրքիր է դառնում, երբ համեմատում ենք ոչ վաղ անցյալում՝ նախկին իշխանությունների ժամանակների դպրոցների տնօրենների մրցույթների անցկացման, այդ պաշտոնի հավակնորդների հերթի երկարության ու պաշտոնն իրարից խլելու տխրահռչակ դեպքերի հետ:

Հիմա, երբ իրավիճակ է փոխվել, ընտրությունների ժամանակ տնօրեններն այլևս առաջվա պես օդ ու ջրի նման պետք չեն իշխանություններին, պարզվում է, որ այդ պաշտոնն էլ այլևս առաջվանը չէ: Նույնիսկ կարող է անգամ պահանջարկ չունենալ հասարակության շրջանում:

Հանրային քաղաքականության ինստիտուտի տնօրեն Ավետիք Մեջլումյանը «Փաստ» օրաթերթի հետ զրույցում նշեց, որ մեկ դպրոցի օրինակով դժվար է ասել, թե ինչ խնդիր կարող էր լինել, որ որևէ դիմում չլինի, քանի որ դա խիստ անհատական հարց է և ճիշտ եզրակացություն անելու համար հարկավոր է հարցը մանրամասն ուսումնասիրել: 

«Մեկ դպրոցի օրինակով դժվար է եզրակացություն անելը, քանի որ պատճառները կարող են տարբեր լինել: Օրինակ՝ կարող է դպրոցը պարտքեր ունի, կարող է անմխիթար վիճակում է, թեկնածուները գիտեն, որ այդպես է, չեն ցանկանում նման խնդիրների մեջ մտնել և այլն: Այսինքն, տասնյակ պատճառներ կարող են լինել, որոնք հարկավոր է ուսումնասիրել»,– ասաց Ա. Մեջլումյանը:

Վերջին ուսումնասիրությունը, որը կազմակերպությունն իրականացրել է, դպրոցների օպտիմալացման խնդրին է վերաբերել: Ուսումնասիրել են 2017 թ. կառավարության կողմից ընդունված՝ դպրոցների օպտիմալացման մասին որոշման հետևանքները: Ըստ այդմ՝ օգոստոսից սկսած հանրապետությունում մոտ 16 դպրոց է օպտիմալացվել, որը, պարզվում է, բավականին խնդիրներ է առաջացրել: Նոր կառավարության օրոք, սակայն, բարեբախտաբար, ԿԳ նախարար Արայիկ Հարությունյանը հայտարարել է, որ գյուղերում այլևս դպրոցներ չեն փակվի, փոխարենը այլ գործառույթներ կավելանան: 

«Դպրոցները փակվել են կառավարության որոշումներով, բայց այդ որոշման մեջ չի նշվել «դպրոցը փակել» բառակապակցությունը: Դրա փոխարեն կա այսպիսի ստանդարտ ձևակերպում՝ «վերակազմակերպել դպրոցը և միացնել մեկ այլ դպրոցի»: Ստացվում է, որ դպրոցը թեև փաստացի փակվում է, բայց իրավաբանական ձևակերպման տեսանկյունից որոշման տեքստերում «փակել», «լուծարել» բառակապակցությունները չեն օգտագործվում: Նման ճակատագրի անցյալ տարի արժանացել են մայրաքաղաքի Կոնդում գտնվող դպրոցը, Էրեբունի, Արաբկիր, Կենտրոն համայնքների որոշ դպրոցներ և այլն: Մեր ուսումնասիրությունները ցույց տվեցին, որ այդ դպրոցների մոտ 30 %–ը մայրաքաղաքում էին, իսկ մնացածը՝ մարզերում»,– ասաց Ա. Մեջլումյանը: 

Շենքեր կան, որոնք արդեն հատկացվել են, մի մասն էլ փոխանցվել է Պետական գույքի կառավարման վարչության հաշվեկշռին: Փոփոխությունները բազմաթիվ խնդիրներ են առաջացրել, որոնք այդպես էլ մնացել են օդում կախված: Ու թեև դրանց լուծումները գտնելու ուղղությամբ մտածում են նոր իշխանությունները, բայց ամեն հարց չէ, որ հնարավոր է մեկ օրում լուծել: Ի դեպ, դպրոցների շենք–շինությունների մասնավորեցման գործընթացի վերջին ալիքը եղել է անցյալ տարվա օգոստոս–հոկտեմբերին, իսկ իշխանափոխությունից հետո այդ մոտեցումն ամբողջովին կասեցվել է: Ու թե ինչ ճակատագրի կարժանանան նախորդ իշխանությունների ժամանակ օպտիմալացման ենթարկված շինությունները, դեռ պարզ չէ:

«Իշխանափոխությունից հետո ԿԳ նախարարի առաջին քայլերից մեկն էլ այն էր, որ այցելելով Կոտայքի մարզի Փյունիկ համայնքի դպրոց, որը նախորդ կառավարության որոշմամբ պետք է փակվեր, հայտարարեց, որ այդ դպրոցն այլևս չի փակվելու: Հետագայում վերանայվեց ոչ միայն կառավարության այդ որոշումը, այլև ողջ քաղաքականությունը: Այսինքն, այսօրվա դրությամբ կարող ենք արձանագրել, որ նոր կառավարությունն այդ խնդիրն արդեն լուծել է: Ոլորտի բոլոր պաշտոնյաներն էլ նշում են, որ այն այլևս նախկին ձևով չի շարունակվելու: Ինչ վերաբերում է գյուղական վայրերին, ապա այնտեղ, հատկապես, այլևս որևէ դպրոց չի փակվելու, իսկ մասնագետների հարցը դեռևս շարունակում է օրակարգային մնալ»,– ասաց Ա. Մեջլումյանը: