Ադրբեջանն առողջության վարկանիշում հետ է մնում Հայաստանից եւ Վրաստանից

 ՄԱԿ-ի, Համաշխարհային բանկի եւ Առողջապահության համաշխարհային կազմակերպության տվյալների հիման վրա անցկացված հետազոտությունների արդյունքներով կազմված եւ Bloomberg գործակալության կողմից հրապարակված առողջության մակարդակի վարկանիշով Ադրբեջանը շատ հետ է Վրաստանից եւ Հայաստանից:

Այս մասին, հայտնում է minval.az լրատվական կայքը` նշելով, որ այդ վարկանիշում Ադրբեջանը զբաղեցնում է 87-րդ տեղը: 

Հետազոտություններն անցկացվել են 1 մլն բնակչությունից ավելի երկրների համար: Առողջության ցուցանիշները գնահատվել են կյանքի տեւողության, մահացության պատճառների, տարիքային խմբերից կախված մահացության եւ այլ գործոնների հիման վրա: Ռիսկերը հետազոտվել են այն հայտանիշների հաշվառմամբ, որոնք կարող են բացասական ազդեցություն ունենալ առողջության վրա. երիտասարդության մեջ ծխողների թիվ, խոլեստերինի եւ արյան ճնշման բարձր մակարդակով բնակչության թվաքանակ, վակցինացիայի տարածվածություն, ճարպակալմամբ տառապողների եւ ՄԻԱՎ-ով վարակվածների թիվ, էկոլոգիական աղտոտվածության մակարդակ եւ այլն:

Bloomberg-ի ցուցակում առաջին երեք տեղերը զբաղեցնում են Սինգապուրը, Իտալիան եւ Ավստրալիան: Առաջին տասնյակում տեղ են զբազեցրել Շվեյցարիան, Ճապոնիան, Իսրայելը, Իսպանիան, Նիդերլանդները, Շվեդիան, Գերմանիան:

Հետխորհրդային տարածությունում Էստոնիան զբաղեցրել է 57-րդ, Վրաստանը` 71-րդ, Հայաստանը` 79-րդ, Լիտվան` 80-րդ, Տաջիկստանը` 84-րդ, Ուզբեկստանը` 85-րդ, Ադրբեջանը` 87-րդ, Բելոռուսը` 91-րդ, Ռուսաստանը` 97-րդ, Ուկրաինան` 99-րդ, Ղրղզստանը` 101-րդ, Թուրքմենստանը` 104-րդ եւ Ղազախստանը` 111-րդ տեղը: