ԱԺ-ը վաղուց պետք է ցրված լիներ, և հաստատվեին ժամանակավոր կառավարություն ու դատական համակարգ. Արեգ Կյուրեղյան

Եթե շատերն այն կարծիքի են, թե նոր Ընտրական օրենսգրքով ընտրությունների գնալով՝ «Սասնա ծռեր»-ի մուտքը խորհրդարան փակվում է, սխալվում են: Tert.am-ի հետ զրույցում այս մասին ասաց «Սասնա ծռեր» կուսակցության անդամ Արեգ Կյուրեղյանը: 

Նա վերահաստատեց կուսակցության անդամ Գարեգին Չուգասզյանի՝ նախկինում արված հայտարարությունը, որ նոր Ընտրական օրենսգրքով է՛լ, հնով է՛լ մասնակցելու են գալիք խորհրդարանական ընտրություններին:

Հարցին, թե, ամեն դեպքում, «Սասնա ծռեր»-ի շանսերը չե՞ն պակասում, երբ պարզ է դառնում, որ չի լինելու բոնուսային համակարգ պարունակող նոր Ընտրական օրենսգիրք (կուսակցությունների՝ ԱԺ-ում ներկայացված լինելու շեմի իջեցում՝ 5-ից 4՝ կուսակցությունների և 7-6՝ դաշինքների համար, ինչպես նաև՝ 2 տոկոս x  քաղաքական ուժին խորհրդարանում ներկայացված լինելու համար-խմբ.), Արեգ Կյուրեղյանը պատասխանեց, որ կոնկրետ չի կարող ասել՝ ավելացան, պակասեցին, բայց նորը, անկախ նրանից՝ ում է ձեռնտու, ում՝ ոչ, շատ ավելի ժողովրդավարական էր:

Ինչ վերաբերում է նրան, որ ՀՀԿ-ն խոստման համաձայն կողմ չքվեարկեց Ընտրական օրենսգրքին, ապա Արեգ Կյուրեղյանը մեկնաբանեց. «Դե, ՀՀԿ-ն իրեն կրկին դրսևորում է, վատ կողմերով»: Արեգ Կյուրեղյանն այն կարծիքին է, որ վարչապետի պաշտոնակատար Նիկոլ Փաշինյանն ու նոր քաղաքական իշխանությունը պետք է շատ ավելի կոշտ լինեին:

«Երբ ասում են, որ իրենց վրա ճնշում է գործադրվում, ուրեմն, իրենք պետք է  արտահայտեն ժողովրդի կամքը, հիմա իրենք արտահայտում են ոչ թե ժողովրդի կամքը, այլ 1-2 հոգու կամքը: Իսկ ավելի կոշտ գործողություն ասելով՝ մենք նկատի ունենք ոչ թե ճնշում գործադրել և պահանջել կատարել իրենց կամքը, այլ նրանց չթողնել, որ նրանք որոշեն կատարել, թե չկատարել:

Իսկ դրա համար ԱԺ -ն դեռ վաղուց պետք է արագ ցրված լիներ, ու հաստատված լիներ ժամանակավոր կառավարություն ու դատական համակարգ, որոնք երկրում ժամանակավոր կիրականացնեին կառավարումը»,-նկատեց նա:

Հիշեցնենք, որ Արցախում, ըստ հայտարարվածի, ընթանում է «Սասնա ծռեր» կուսակցության գրանցումը, և նոյեմբերի 17-ին նշանակված է հիմնադիր համագումար, սակայն կուսակցության նախաձեռնող խմբի անդամ Վահան Բադասյանը Tert.am-ի հետ զրույցում հայտնել էր, որ «Սասնա ծռեր»-ի հետ շարունակում են մնալ ընկերներ, սակայն կուսակցության որոշ դրույթներ, որոնց մասին չի բարձրաձայնում, չի կիսում:

Սակայն Արեգ Կյուրեղյանն ասաց, որ ընդամենը որոշ տարաձայնություններ կան, որոնք, վստահ է, որ կհարթվեն: