ԵԱՀԿ պատվիրակությունն ու ՀՀ ոստիկանության ներկայացուցիչները հանդիպմանն արձանագրել են՝ համագործակցությունը տալիս է ցանկալի արդյունք

 

Հոկտեմբերի 31-ին ոստիկանության հասարակայնության հետ կապի և լրատվության վարչության պետ, ոստիկանության գնդապետ Աշոտ Ահարոնյանն ընդունել է ԵԱՀԿ ոստիկանության գործունեության ռազմավարական հարցերի բաժնի պետ Գի Վինյեին և համայնքային ոստիկանության հարցերով խորհրդական Մոնա Նորդբերգին: 

Ինչպես հայտնում են ՀՀ ոստիկանության տեղեկատվության և հասարակայնության հետ կապերի վարչությունից,  Աշոտ Ահարոնյանը ողջունելով հյուրերին՝ ներկայացրել է իր ղեկավարած վարչության աշխատանքը: ԵԱՀԿ Երևանյան գրասենյակի աջակցությամբ տարիներ առաջ սկսել է գործել ոստիկանության պաշտոնական police.am կայքը, վարչության պատրաստած հաղորդումներն ամեն շաբաթ հեռարձակվում են տարբեր հեռուստաընկերություններով, տպագրվում է շաբաթաթերթ, վարչության համապատասխան բաժինն էլ 24 ժամ հասանելի է լրագրողների համար:  

Խոսվել է տեղեկատվության տրամադրման, լրագրողների հետ աշխատանքի, ոստիկանության գործունեության թափանցիկության ապահովման, զանգվածային միջոցառումների ժամանակ լրագրողների հետ տարվող աշխատանքի և այլ հարցերի շուրջ:  Գի Վինյեն և Մոնա Նորդբերգը շնորհակալություն հայտնելով ջերմ ընդունելության համար վստահեցրել են, որ շատ լավ են հասկանում ոստիկանության այս ստորաբաժանման կարևոր և միևնույն ժամանակ ծանր աշխատանքը, որովհետև նրանք երկուսն էլ Ֆրանսիայում և Շվեդիայում ծառայել են համանուն վարչություններում: Քննարկվել և ուրվագծվել են ոստիկանության հասարակայնության հետ կապի և լրատվության վարչության ու ԵԱՀԿ համագործակցության ուղղությունները: 

Դրանք երկու կողմերի դրական գնահատականից հետո կյանքի կկոչվեն:  Նույն օրը Գի Վինյեն և Մոնա Նորդբերգը հյուրընկալվել են ոստիկանության կրթահամալիրում: Նրանց դիմավորել է կրթահամալիրի պետ, ոստիկանության գեներալ-մայոր Մուշեղ Բաբայանը: Հյուրերը պրոֆեսորադասախոսական կազմի հետ շրջել են կրթահամալիրի տարածքում, եղել լսարաններում, ԵԱՀԿ աջակցությամբ կառուցված մարզասրահներում:  ԵԱՀԿ ներկայացուցիչները շնորհակալություն են հայտնել հետաքրքիր էքսկուրս անցկացնելու համար և համագործակցության պատրաստակամություն հայտնեցին:  

Կողմերը քննարկել են ոստիկանության կրթահամալիրի դասախոսների համար տարբեր թեմաներով վերապատրաստման դասընթացներ անցկացնելու, անհրաժեշտ գրականության տպագրության և այլ հարցեր: Մուշեղ Բաբայանն էլ իր հերթին շնորհակալություն հայտնել է ցուցաբերված աջակցության համար և վերահաստատել, որ համագործակցությունը տալիս է ցանկալի արդյունք:  Խոսվել է նաև ոստիականության ուսումնական կենտրոնի, քոլեջի և ակադեմիայի կրթական ծրագրերի մասին, նախանշվել են համագործակցության նոր ուղղություններ: