Ես հավատում եմ եւ միշտ հավատացել եմ Նիկոլ Փաշինյանին. Հայկ Կոնջորյան

Ես հավատում եմ եւ միշտ հավատացել եմ Նիկոլ Փաշինյանին։ Այս մասին այսօր՝ նոյեմբերի 1–ին, խորհրդարանում լրագրողների հետ զրույցում ասաց «Ելք» խմբակցության պատգամավոր, նախօրեին «Լուսավոր Հայաստան» կուսակցությունը լքած Հայկ Կոնջորյանը։

«Ես չեմ կարող ընդդիմանալ մի բանի, որին ես հավատում եմ։ Ես ունեմ տարբերություններ կուսակցության ապագա գործողությունների վերաբերյալ։ Եթե ես հավատում եմ այն գործընթացներին, որն իրականացվում է, ինչպե՞ս կարող եմ ընդդիմադիր լինեմ ինքս ինձ, մի բանի ինչպե՞ս ընդդիմանամ, եթե հավատում եմ»,– ասաց Հայկ Կոնջորյանը։

Պատգամավորը պնդեց, որ սա ճամբարափոխություն չէ. «Մենք ունեցել ենք հուշագիր, որ դառնալու ենք մեկ կուսակցություն։ Մենք մի թիմ ենք, ես թիմի ներսում ասել եմ, որ հավատում եմ այս տեսակետին։ «Ելք» դաշինքը մեծ տուն է մի քանի սենյակով, ես մի սենյակից գնացել եմ մյուս սենյակը»։

Հարցին՝ արդյոք այս քայլին դիմել է, որ ապագա խորհրդարանում մանդատ ստանա, Հայկ Կոնջորյանն արձագանքեց. «Ես թքած ունեմ ցանկացած պաշտոնի եւ մանդատի վրա, թքած ունեմ, ինձ դա խորապես պետք չի։ Իմ կյանքում ոչինչ չի փոխվել, ուղղակի որոշ տեղերում ընդունում են ավելի զգաստ, որոշ մարդիկ սկսել են ինձ քծնել, որն ինձ համար տհաճ է»։

Նա նաեւ հերքեց տեղեկությունները, թե ինքն առաջիկայում անդամագրվելու է «Քաղաքացիական պայմանագիր» կուսակցությանը։