Ես աշխատում եմ ինձ համար, Նարեկը՝ մեզ համար. դերասանուհի Ծովինար Մարտիրոսյանը նոր զբաղվածության և ընտանիքի մասին

Գաբրիել Սունդուկյանի անվան ազգային ակադեմիական թատրոնի դերասանուհի Ծովինար Մարտիրոսյանն, ով հեռուստադիտողին առավել շատ ծանոթ է «Կյանքի կարուսել» նախագծից, տևական ժամանակ է՝ էկրաններին չի երևում: Aysor.am-ը կապ հաստատեց դերասանուհու հետ՝ տեղեկանալու, թե որն է էկրանային պասիվության պատճառը: «Նախ ասեմ, որ փոքրիկիս ծնվելուց հետո մոտ 7-8 ամիս չեմ աշխատել: Մայիս ամսից բուռն ստեղծագործական գործունեությամբ զբաղվեցի. Սունդուկյան թատրոնին կից «Վարդան Աճեմյանի անվան ստուդիայում» սկսեցի բեմական խոսք դասավանդել: Գլխավոր կերպարներով ներգրավվեցի թատրոնում բեմադրվող 4 նոր հրաշալի ներկայացումներից երկուսում: Նաև Արմեն Էլբակյանի կողմից բեմադրվող «Պեպո» ներկայացման մեջ էպիզոդիկ փոքրիկ, բայց «համով-հոտով» կերպար ունեմ: Ռեժիսոր Դավիթ Հարությունյանի նոր՝ «Քարակապ» ներկայացման մեջ ևս զբաղված եմ, գլխավոր հերոսուհուն եմ մարմնավորում»,-մանրամասնեց դերասանուհին:

Այսօրվանից ATV հեռուստաընկերության եթերում կցուցադրվի «Երջանկության արցունքներ» նախագիծը, որը, կարծում եմ, հեռուստադիտողին կհիշեցնի «Կյանքի կարուսելը»: Ի դեպ, նոր նախագծում ընդգրկված են դերասաններ նաև վերոնշյալ՝ «Կյանքի կարուսել» նախագծից: «Ներկայացվելու են փոքրիկ ընտանեկան, կենցաղային, սոցիալական պատմություններ՝ հիմնված իրական դեպքերի վրա: Բացի մեր կազմից նաև նոր դերասաններ են ընդգրկված: Հետաքրքիր է աշխատել այս կազմի, Անահիտ Մխիթարյանի հետ»:

Ծ. Մարտիրոսյանը նաև գեղարվեստական ֆիլմում նկարահանվելու առաջարկ է ստացել, սակայն փակագծերը բացել դեռ չի կարող: Ինչ վերաբերում է սերիալային առաջարկներին, ապա նշեց, որ թեև նման առաջարկ ունի, սակայն այս ամենի հետ չի կարող հասցնել. Այդ ուղղությամբ կմտածի, երբ մի փոքր կարգավորված ռեժիմ կունենա: Թեև, դերասանուհին խոստովանեց, որ կարոտել էր գերզբաղվածությանը և հաճելի է աշխատել այս ռեժիմով. «Սերիալում չեմ ցանկանում հենց այնպես, ուղղակի լինել… Լավ դերով կարելի է՝ ինչո՞ւ ոչ: Առաջարկներ կան, իհարկե, բայց դեռ չեմ հասցնի, այդ պատճառով էլ չեմ ընդունում: Ինչ վերաբերում է գերզբաղվածությանս՝ ճիշտ է, մի քիչ երեխաներս են տուժում, բայց տատիկները՝ սկեսուրս և մայրս, շատ են օգնում»:

Մեր այն հարցին, թե արդյոք ամուսինը՝ Նարեկ Հայկազյանը չի բողոքում կնոջ աշխատանքային ծանրաբեռնվածությունից՝ մեր զրուցակիցը ժպիտով նշեց. «Քանի որ Նարեկը ևս գերզբաղված է՝ մենք միմյանց հաճախ չենք հանդիպում տանը: Նա ինձ հասկանում է, աջակցում: Շատ լավ է, որ ամուսինները նույն մասնագիտությունն ունեն: Իսկապես շնորհակալ եմ ինձ հասկանալու, ըմբռնելու, նույնիսկ խրախուսելու համար:  Երբ ես գալիս եմ տուն, մոռանում եմ, որ դերասանուհի եմ, դառնում եմ սովորական կին, ով ունի իր կենցաղային գործերը»:

Դերասան-ամուսիններին հաճախ կարելի է հանդիպել նույն նախագծերում, ֆիլմերում, նույնիսկ բեմում: Արդյոք պատճառը խանդի գործոնն է, թե՞ պարզապես ռեժիսորական լուծումը: «Այնպես չի, որ մենք միշտ միասին ենք: Իհարկե, կա ներկայացում, որտեղ սիրահար զույգերի դեր ենք խաղում, բայց ասեմ, որ բեմում մենք հազվադեպ ենք հանդիպում: Օրինակ, ինչ սկսել ենք «Երջանկության արցունքները», ես և Նարեկը դեռևս ընդհանուր տեսարաններ չենք ունեցել: Եվ դա մեր որոշումն է եղել: Ինքներս էլ գտնում ենք, որ հետաքրքիր չի, երբ ամուսիններն անընդհատ միասին են՝ թե կյանքում, թե իրականությունից դուրս»,-խոստովանեց նա:   

Մեր ժամանակներում ի՞նչն է ստիպում մանկահասակ երեխաներ ունեցող երիտասարդ կնոջը՝ զբաղվել ակտիվ գործունեությամբ. մասնագիտության նկատմամբ սերը՞, պատասխանատվությունը, թե՞ ֆինանսական խնդիրները: «Եթե ես թատրոնում ստանայի այնքան գումար, որքան ստնում եմ այլ նախագծերի մասնակցելով, ապա ամբողջ ժամանակս չէի տրամադրի սերիալներին և այդ նախագծերին: Իհարկե, ես սիրում եմ իմ աշխատանքը, լինի դա թատրոնում, ստուդիայոմ, թե էկրանին, բայց այն ժամանակ կունենայի հնարավորություն՝ ժամանակս կարգավորելու, որևէ մի բանից հրաժարվելու: Իսկ այժմ, նույնիսկ ամբողջ օրը «վազելը» չի բավականեցնում, այն էլ այն դեպքում, երբ և՛ ես, և՛ Նարեկն աշխատում ենք: Թեև, կարծում եմ՝ քանի երիտասարդ եմ, «ուժս տեղն» է՝ պետք է անեմ այն, ինչ հնարավոր է: Գտնում եմ, որ ամուսինները պետք է միմյանց թիկունք լինեն, օգնեն: Շուտով կլրանա մեր ամուսնության 10 և ծանոթության 15 տարին, բայց երբեք չի եղել այնպիսի դեպք, որ Նարեկն ինձ արգելի աշխատել: Պարզապես ասում է, պետք չի այդքան գերլարվել, մի քանի բանից գոնե հրաժարվիր: Բայց սա ինձ հաճույք է պատճառում, հավատացեք: Ես սիրում եմ իմ գործը»,-անկեղծացավ նա:

Իսկ թե որքանով է հաջողվում այս տեմպի մեջ չթերանալ՝ դերասանուհին նշեց. «Փորձում եմ առավելագույնս որակով աշխատել: Քանի որ շատ աշխատասեր եմ, կարծում եմ՝ ստացվում է: Ես միշտ առաջնահերթությունը թատրոնին եմ տվել՝ փորձելով այնտեղ երբեք չթերանալ: Էկրանը թույլ է տալիս մի պահ թերանալու. եթե չի ստացվում, երկրորդ «դուբլը» միշտ էլ կա: Իսկ թատրոնում վարագույրը բացվում է ու վերջ…Բայց ես աշխատում եմ չթերանալ իմ ոչ մի գործում, տալիս եմ ամբողջ էներգիաս»:

Ցանկացած աշխատանք գնահատվում է դրական, եթե արդյունքն արդարացված է: Ծովինար Մարտիրոսյանից հետաքրքրվեցինք, թե արդյոք իր գերզբաղվածությունը ֆինանսապես արդարացված է: « Այո, ես չեմ դժգոհում: Փառք աստծո, որ աշխատանք ունենք, «ձեռքով-ոտքով» ենք, առողջ ենք: Ինչ վերաբերում է ֆինանսին, կարծում եմ՝ այն մարդկանց, ովքեր անընդհատ աշխատանքի մեջ են, չի կարող գումարը չբավականացնել: Մի խոսքով՝ փորձում ենք նորմալ ապրել… Ես աշխատում եմ ինձ համար, Նարեկն աշխատում է մեզ համար: Այնպես որ ես չեմ զգում ֆինանսի պակաս, փառք Աստծո»,-ծիծաղելով զրույցը եզրափակեց դերասանուհին: