Ակնկալում եմ, որ նախագահ Մակրոնը շատ ամուր կլինի Թուրքիայի ժխտողական քաղաքականության դեմ. ֆրանսահայ պատգամավոր

Ֆրանսիայի սենատի հայազգի պատգամավոր Դանիել Ղազարյանի խոսքով՝ Առաջին աշխարհամարտի ավարտի 100-ամյակը մեծ հնարավորություն էր՝ հիշելու խաղաղության արժեքը:

Նա Tert.am-ի հետ զրույցում նկատեց և շնորհակալություն հայտնեց իր երկրի՝ Ֆրանսիայի նախագահ Էմանուել Մակրոնին, որ այն ժամանակներում, երբ համարում է, որ «մուլտիլատերալիզմը» կորցրել է իր քաշը, նա կարևորեց օրվա հնարավորությունը՝ հավաքելով բոլոր պատերազմող կողմերին՝ նշելու դիվանագիտության հաղթանակը ուժի կիրառման նկատմամբ:

«Մեկ խաղացողին էլ բացառելը այդպիսի զգացողություն չէր առաջացնի և հակասական կլիներ գագաթնաժողովի ոգուն»,- ասաց նա՝ նկատելով, որ այնուամենայնիվ ներկա էր միայն մեկ երկիր, որը չի հաշտվում իր սեփական պատմության հետ, և այդ երկիրը Թուրքիան էր:

Tert.am-ը ֆրանսահայ պատգամավորից մեկնաբանություն է վերցրել Փարիզում նոյեմբերի 10-11-ը տեղի ունեցած Առաջին համաշխարհային պատերազմի ավարտի 100-ամյա տարելիցի միջոցառումներին Թուրքիայի նախագահ Ռեջեփ Թայիփ Էրդողանի մասնակցության վերաբերյալ:

Հիշեցնենք, որ Ֆրանսիայում մի շարք մտավորականներ, գիտնականներ, քաղաքական ու հասարակական գործիչներ կտրականապես դեմ էին արտահայտվել նոյեմբերի 11-ին Փարիզում անցկացվելիք Առաջին աշխարհամարտի ավարտի 100-ամյակին նվիրված միջոցառումներին մասնակցության նպատակով Թուրքիայի նախագահ Ռեջեփ Թայիփ Էրդողանի այցին:

Էրդողանին Փարիզում տեսնել չցանկանալու գլխավոր պատճառներից էին Թուրքիայի կողմից Հայոց ցեղասպանության հերքումը, Կիպրոսի և Թուրքիայի քուրդ բնակչության դեմ վարած քաղաքականությունը, հակասեմական տրամադրությունների պարբերական բորբոքումն ու երկրում խոսքի և մտքի ազատության կոպիտ խախտումները:

Ֆրանսիայի նախագահ Էմանուել Մակրոնին կոչ էր արվել «հստակ ուղերձ հղել Էրդողանին, որ փարիզյան միջոցառումներին նրա մասնակցությունը չի նշանակում, որ Ֆրանսիան հավանություն է տալիս նրա վարած քաղաքականությանը»:

Ֆրանսահայ պատգամավոր Դանիել Ղազարյանի դիտարկմամբ՝ երիտթուրքերի կողմից իրականացված Հայոց ցեղասպանության ժխտումն իսկապես մինչ հիմա Թուրքիայի դիվանագիտության առանձնահատկությունն է և ազգայնականության հիմքում է ընկած: «Այդ առումով Թուրքիան պետք է պատասխանատվության ենթարկվեր Ցեղասպանության թեմայով գագաթնաժողովին և քննադատվեր իր ներկայիս վարքագծի համար»,- ասաց նա:

Դանիել Ղազարյանն այնուհետև նշեց, որ ինքն ակնկալում է, որ նախագահ Մակրոնը շատ ամուր կլինի Թուրքիայի՝ Հայոց ցեղասպանության ժխտողական քաղաքականության դեմ:

«Նա պետք է պարզ դարձնի, որ խաղաղության գագաթնաժողովը ճանապարհ չէ Թուրքիայի համար հեռանալու իր անցյալից, այնպես որ խաղաղության տոնակատարությունը հնարավոր է միայն,  եթե բոլոր դերակատարները ճանաչում են իրենց գործողությունների իրականությունը: Ես նաև հույս ունեմ, որ կառավարությունն իր դաշնակիցների հետ ետ կմղի այն ճնշումներն ու սպառնալիքները, որոնց հետ առերեսվում են Եվրոպայում Թուրքիայի կառավարությանն ընդդիմացողները»,- ասաց Դանիել Ղազարյանը՝ նշելով, որ դա էլ հիմնականում նա փորձել է ներկայացնել նախագահին ուղղված բաց նամակում: