Վճռաբեկ դատարանը բեկանեց Քոչարյանի կալանավորումը վերացնելու որոշումը. այդ մասով գործը կուղարկվի Վերաքննիչ դատարան նոր քննության, իսկ պաշտպանների բողոքը մերժվեց

18.18


Վճռաբեկ դատարանի որոշման հրապարակումից հետո Ռոբերտ Քոչարյանի պաշտպաններից Հայկ Ալումյանը լրագրողների հետ զրույցում ասաց, որ առաջին տպավորությունը բացասական է, որոշումը ստանալուց հետո ավելի մանրամասն կարծիք կհայտնեն:


«Դատարանը որոշումը բավարարեց մասնակի, որովհետև ՀՀ գլխավոր դատախազությունը բողոք էր ներկայացրել պահանջելով բեկանել վերաքննիչ դատարանի որոշումը՝ Ռոբերտ Քոչարյանին անձեռնմխելի ճանաչելը և օրինական ուժ տալ առաջին ատյանի դատարանի որոշմանը, որով Քոչարյանը կալանավորվել էր: Դատարանը բողոքը բավարարեց մասնակի՝ գործն ուղարկելով նոր քննության»,-ասաց Ալումյանը:


18.04

Ռոբերտ Քոչարյանի խափանման միջոցի վերաբերյալ դատախազության բողոքը բավարարվեց մասնակի, պաշտպանների բողոքը մերժվեց։ 

«ՀՀ գլխավոր դատախազ Արթուր Դավթյանի վճռաբեկ բողոքը Վճռաբեկ դատարանը բավարարեց մասնակիորեն, իսկ պաշտպաների բողոքը մերժվեց։ ՀՀ վերաքննիչ քրեական դատարանի 2018 օգոսոտսի 13-ի որոշումը բեկանել և գործ ուղղարկել նոր քննության: Որոշումը ենթակա չէ բողոքարկման և ուժի մեջ է մտնում հրապարակման պահից»,– ասաց Լիլիթ Թադևոսյանը: 

Հիշեցնենք, որ օգոստոսի 23-ին Վերաքննիչ քրեական դատարանը բավարարել էր պաշտպանների բողոքը՝ վերացնելով առաջին ատյանի դատարանի որոշումը Քոչարյանին կալանավորելու վերաբերյալ՝ հաշվի առնելով, որ Ռոբերտ Քոչարյանն անձեռնմխելի է:

18.01


Ռոբերտ Քոչարյանի պաշտպաններից Հայկ Ալումյանն ասաց, որ ՀՀ երկրորդ նախագահ Ռոբերտ Քոչարյանը բողոքների քննությանը ներկա է եղել: Պաշտպանը հայտնեց, որ նա քիչ առաջ դուրս է եկել նիստերի դահլիճից և տեղյակ չէ, թե որոշման հրապարակման պահին կվերադառնա՞, թե ոչ:Դատարանը քիչ անց կհրապարակի որոշումը:


17.31

Վճռաբեկ դատարանում ավարտվեց Ռոբերտ Քոչարյանի խափանման միջոցի վերաբերյալ կողմերի բողոքների քննությունը:

«Դատական նիստը դռնփակ է անցնում, բողոքների քննությունն ավարտվեց, և դատարանը որոշումը կհրապարակի խորհրդակցական սենյակից վերադառնալուց հետո: Որոշումը կհրապարակվի այսօր»,- դատարանում ասաց գլխավոր դատախազի տեղակալ Արմեն Հարությունյանը:

 

 

Վճռաբեկ դատարանը քննում է «Մարտի 1»-ի գործով մեղադրյալ, ՀՀ երկրորդ նախագահ Ռոբերտ Քոչարյանի պաշտպանների, ինչպես նաև ՀՀ գլխավոր դատախազության բողոքները:

Նիստը նախագահում է դատավոր Լիլիթ Թադևոսյանը, ում որոշմամբ դատական նիստն անցկացվում է դռնփակ:

Ավելի վաղ Ռոբերտ Քոչարյանի պաշտպանական թիմը հայտնել էր, որ առնվազն երկու հիմք կա Վճռաբեկ դատարան դիմելու համար, որոնք առավել կարևոր են, սակայն վճռաբեկ բողոք ներկայացնելու այլ հիմքեր ևս կան: Նախաքննության գաղտնիությունից ելնելով՝ հայտնել էին միայն հիմքերից մեկը, համաձայն որի՝ «Մարտի 1»-ի գործը քննող Հատուկ քննչական ծառայությունը Ռոբերտ Քոչարյանի՝ արտակարգ դրություն հաստատելու մասին հրամանագիրը որակել է հակաօրինական:

«Վճռաբեկ դատարանը պետք է անդրադառնա այդ փաստին, որովհետև նման պնդում անելու իրավունք ունի Սահմանադրական դատարանը»,- հայտնել էր պաշտպան Հայկ Ալումյանը:

Գլխավոր դատախազությունը վիճարկում է Վերաքննիչ դատարանի որոշումը, որով վիճարկվում է Քոչարյանին անձեռնմխելի ճանաչելու Վերաքննիչ դատարանի որոշումը:

Հիշեցնենք,որ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել վկայի կարգավիճակով՝ հարցաքննության։ Նույն օրը Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով, նա մեղադրվում է   այլ անձանց հետ նախնական համաձայնությամբ   Հայաստանի Հանրապետության սահմանադրական կարգը տապալելու մեջ:

Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել է անձեռնմխելի, ինչի արդյունքում նա ազատ է արձակվել կալանքից: Որոշ ժամանակ անց ՀՔԾ-ն նրա նկատմամբ խափանման միջոց է ընտրել ստորագրություն չհեռանալու մասին: