Չի կարելի ձեռքերը ծալած նստել ու ակնկալել կամ պահանջել ուրիշից. Նարինե Թուխիկյանը կլքի Հովհ. Թումանյանի անվան տուն-թանգարանը

ՀԱՍԱՐԱԿՈՒԹՅՈՒՆ 15 Նոյեմբեր, 2018 21:57

Պետք է գործուն քայլեր անել ի նպաստ նոր Հայաստանի զարգացման. այս մասին Tert.am-ի հետ զրույցում ասաց Հովհաննես Թումանյանի թանգարանի տնօրեն Նարինե Թուխիկյանը, ով ընդգրկված է «Իմ քայլը» դաշինքի նախընտրական ցուցակում:

«Ես համաձայնել եմ ընդգրկվել նախընտրական ցուցակում, որովհետև պատրաստ եմ նպաստել նոր Հայաստանի զարգացմանը անհատույց կերպով: Ձեռքերը ծալած նստել ու ակնկալել կամ պահանջել ուրիշից, չի կարելի»,- ասաց Ն. Թուխիկյանը:

Վերջինս նշեց, որ ինքը անկուսակցական է, ներառվել է «Իմ քայլը» դաշինքում, որովհետև կարծում է, որ հենց այս ուժի շնորհիվ կապահովվի երկրի զարգացումը: Նարինե Թուխիկյանն ասաց, որ «Իմ քայլը» դաշինքը մեծ հեղինակություն ունի հանրության շրջանում՝ միաժամանակ ունենալով նաև լուրջ պատասխանատվության զգացում:

Դիտարկմանը, թե նախկինում իշխանական ցուցակներն օգտագործվել են ԱԺ անցնելու, պատգամավորական մանդատ ստանալու համար, Նարինե Թուխիկյանն ասաց, որ Հայաստանում շատ բան է փոխվել, չի բացառվում, որ շատերը տարբեր ցանկություններ հետապնդելով են փորձել մտնել իրենց նախընտրական ցուցակ, բայց ոչ այս անգամ:

«Բավարարել որևէ մեկի պատգամավոր դառնալու ամբիցիաները… Չեմ կարծում, որ մեր ցուցակում նման մարդիկ կան: Դա անցյալում մնաց: Հիմա ուրիշ բարքեր են»,- նշեց նա՝ շեշտելով, որ ինքը նախկինում թեև առաջարկներ ստացել է, բայց չի համաձայնել մտնել նախընտրական ցուցակ:

«Չեմ համաձայնել դառնալ կուսակցական, չեմ համաձայնի»,- հավելեց նա:

Նարինե Թուխիկյանը ցավով նշեց, որ օրենքը թույլ չի տալիս պատգամավոր ընտրվելուց հետո շարունակել Հովհ. Թումանյանի անվան տուն-թանգարանի տնօրինությունը:

«Բարոյական առումով կլինեմ թանգարանի կողքին մինչև կավարտվի հոբելյանական այս տարին: Ինչպես գիտեք, 150 ամյակն է և մեծ ծրագրեր ու անելիքներ էին պլանավորվել: Բայց ընտրվելուց հետո ստիպված կլինեմ թողնել թանգարանը»,- հայտնեց նա: