Պետք է բոլորս հասկանանք, որ 70 տոկոս հավաքած ուժը պատուհաս է մեր գլխին․ Կարեն Սարգսյան

Սոցիոլոգ Կարեն Սարգսյանի խոսքով՝ արտահերթ խորհրդարանական ընտրություններն ընթանալու են ակտիվ, ծանր, բայց իրականում հետաքրքիր: Նա Tert.am-ի հետ զրույցում նշեց՝ առաջին անգամ է, որ խորհրդարանական ընտրությունները «իմաստ ունեն»:

«Եթե մեզ մոտ ստացվի իրար հարգելով անցկացնել ընտրությունները, մենք կարող ենք ունենալ փայլուն ընտրություններ, բայց ընտրված մարմինները կարող են ոչ արդյունավետ լինել»,- ասաց նա:

Սոցիոլոգի կանխատեսմամբ՝ «Իմ քայլը» դաշինքին ձայն կտա ընտրողների 50-60 տոկոսը, եթե ոչինչ տեղի չունենա: «Բոլորս հասկանում ենք, որ սա Հայաստանն է, և տարբեր զարգացումների արդյունքում փոփոխություններ կարող են լինեն»,- ասաց նա:

Կարեն Սարգսյանի պատկերացմամբ՝ խորհրդարան, որպես ընդդիմություն, մեծ ջանքերի գնով կանցնեն Հանրապետական և «Բարգավաճ Հայաստան» կուսակցությունները, ինչպես նաև՝ «Մենք» դաշինքը:

Անդրադառնալով հատկապես վերջինիս՝ սոցիոլոգը նշեց, որ կհաղթահարի 7 տոկոսը, քանի որ մնացած ուժերը քաղաքակրթական այլընտրանք չեն, ընտրություններին մասնակցող բոլոր մնացած ուժերը շարունակում են Հայաստանն ամբողջությամբ թողնել ռուսաստանյան բոլշևիկյան քաղաքակրթության ազդեցության տակ:

Հասարակության մեծ մասը հիմա, ըստ նրա, չունի վերլուծելու հմտություն: Նրա դիտարկմամբ՝ միայն Երևանում է, որ կա մի զանգված, որ ներգրավված է նախընտրական աշխատանքներում և պատկերացնում են իրավիճակը:

Քարոզարշավին հեղափոխությունը որպես հաղթաթուղթ ներկայացնող ուժերը, ըստ Կարեն Սարգսյանի, չպետք է վստահ լինեն, որ լիարժեք աջակցություն կստանան հասարակության կողմից:Եթե նրանք դուրս գան և հեղափոխությունից խոսեն, կպարտվեն: Կպարտվեն մտածող զանգվածի մոտ: Ես շարունակում եմ նաև վստահ լինել, որ  այն մարդիկ, որոնք 10 000 դրամ կաշառք էին վերցնում և ձայնը տալիս Հանրապետականին կամ ԲՀԿ-ին, դրա դիմաց «սելֆի» կանեն և իրենց ձայնը կտան ուրիշ ուժի»,- ասաց նա:

Իսկ հեղափոխությունից հետո հիասթափվածները, ըստ նրա, հետազոտությունները ցույց է տալիս, որ քվեարկում են կամ «ոտքերով», կամ Զվարթնոց օդանավակայան գնալով: «Նրանք գնում են Հայաստանից, ոչ թե մնում են քաղաքական պայքարի մեջ»,- ասաց նա:

Խորհրդարանական ընտրությունները, ըստ փորձագետի, չեն փոխի քաղաքական իրավիճակը այնպես, ինչպես պետք է, որ փոխեն։ «Ես մնում եմ այն կարծիքին, որ ոչ մի քաղաքական ուժ չի կարող լինել արդյունավետ, եթե ինքը հավաքում է 70-80 տոկոս ձայն: Սադամ Հուսեյնի Բաասը, Պուտինի «Եդինայա Ռոսիան», Հանրապետականը անիմաստ թույլ ուժեր էին, որովհետև մի կուսակցությունից հանդես եղող մարդկանց քանակը անիմաստ շատ է, և այդ քանակն ինքն իրենով որակ չի կարող ապահովել այն պարզ պատճառով, որ եթե դու լինես քաղաքականապես ինքնաբավ մարդ, չես կարող հավաքել այդքան մարդկանց: Ամբիցիաներ, մոտեցումներ կան, որ քաղաքագիտության մեջ պետք է լինեն: Բայց բուն քաղաքական պայքարի հիմք ես «Իմ քայլում» չեմ տեսնում: Ես անգամ մինչև հիմա չեմ կարողանում հասկանալ, թե այն ձա՞խ, թե՞ աջ ուժ է, չեմ հասկանում՝ իրենց սոցիալական սպեկտորը որն է, ինչի՞ վրա հույսը դնել,- ասաց նա՝ հավելելով, որ օրինակ ՀՀԿ-ը աջ-պահպանողական են, «Մենք» դաշինքը՝ աջ-լիբերալ է,- իսկ «Իմ քայլը» ստիպված է լինելու ապահովել և՛ բիզնեսի շահերը, և՛ սոցիալապես անապահով մարդկանց, իսկ դա նշանակում է ոչինչի չհասնել․ ամորֆ քաղաքական ուժը ոչ մի լավ բանի չի բերում»:

Խորհրդարանական ընտրությունների լավագույն սցենարի մասին խոսելիս էլ՝  սոցիոլոգը նշեց՝ այն պարզապես չի լինելու: «Քաղաքական կամք պետք է լինի և այդ կամքի վրա հիմնված պետք է որոշես, որ խորհրդարան անցնելու համար 40 տոկոսից ավելին չպետք է վերցնես, խորհրդարանում պետք է տարբեր ուժեր լինեն, որ համագործակցության միջոցով լուծումներ գտնես: Այլ պարագայում ստանալու ենք երևանյան ընտրությունների պատկերը, որի արդյունքում մինչև հիմա թաղապետեր չկան նշանակված: Պետք է բոլորս հասկանանք, որ 70 տոկոս հավաքած ուժը պատուհաս է մեր գլխին»,- ասաց նա: