Ջանլուկա Մարչիանոն որպես դիրիժոր հանդես կգա օպերային թատրոնի երկու ներկայացումներում

«24/04» նվագախմբի դիրիժոր, իտալացի Ջանլուկա Մարչիանոն որպես դիրիժոր հանդես կգա Ալ. Սպենդիարյանի անվան օպերայի և բալետի ազգային ակադեմիական թատրոնի երկու ներկայացումներում: Ինչպես  տեղեկացրին օպերային թատրոնի տեղեկատվության և հասարակայնության հետ կապերի բաժնից, նոյեմբերի 12-ին կներկայացվեն Ջուզեպե Վերդիի «Տրավիատա», իսկ նոյեմբերի 19-ին` «Տրուբադու ր» օպերաները: Ներկայացումների դիրիժորը կլինի Ջանլուկա Մարչիանոն:  

Ջանլուկա Մարչիանոն հայ ժողովրդի լավագույն բարեկամներից է, ով մշտապես իր անձնական և արտիստական հնարավորությունները ծառայեցնում է ի նպաստ հայ-իտալական մշակութային կապերի սերտացմանը, համերգներով պարբերաբար ներկայանում է ինչպես Հայաստանում, այնպես էլ Արցախում: Ջանլուկա Մարչիանոն մի քանի անգամ պատվավոր հյուրի կարգավիճակով մասնակցել է Ա. Խաչատրյանի անվան միջազգային երաժշտական մրցույթին: Նա ապրիլի  24-ին մասնակցել է նաև Հայոց ցեղասպանության 100-րդ տարելիցի միջոցառումների շրջանակում  կազմակերպված համաշխարհային նվագախմբի համերգին: Սեպտեմբերի 1-ին դիրիժորը մասնակցել է Ջ. Վերդիի «Ռեքվիեմ»-ի արցախյան պրեմիերային:

Մարչիանոն Բեյրութի «Ալ Բուստան» միջազգային երաժշտական փառատոնի գեղարվեստական ղեկավարն է, համագործակցում է աշխարհի մի շարք հեղինակավոր նվագախմբերի հետ, ղեկավարել է Զագրեբի օպերային թատրոնի նվագախումբը, այնուհետև զբաղեցրել է Թբիլիսիի պետական օպերային թատրոնի երաժշտական տնօրենի և գլխավոր դիրիժորի պաշտոնը: Մարչիանոն նաև Ռումինիայի ֆիլհարմոնիկ և Լոնդոնի կամերային նվագախմբերի հրավիրյալ դիրիժորն է:

Նոյեմբերի 12-ին կայանալիք «Տրավիատա» օպերայի գլխավոր դերերում հանդես կգան Հասմիկ Թորոսյանը, Լիպարիտ Ավետիսյանը, Առնոլդ Քոչարյանը: Ներկայացման ռեժիսորն է ՀՀ և ԼՀ ժողովրդական արտիստ Գեղամ Գրիգորյանը:

Նոյեմբերի 19-ին կայանալիք «Տրուբադուր» օպերայի գլխավոր դերերում հանդես կգան Դավիթ Բաբայանցը, Էլվիրա Խաչատրյանը, Հովհաննես Այվազյանը, Սոֆիա Թումանյանը, Հայկ Տիգրանյանը: Բեմադրող ռեժիսորն է ՀՀ արվեստի վաստակավոր գործիչ Նորայր Սարգսյանը: