Քերին կայցելի Վիեննա՝ բանակցելու Սիրիայի խնդրի շուրջ

 ԱՄՆ-ի պետքարտուղար Ջոն Քերին նախքան Թուրքիայում G20-ի գագաթնաժողովը կայցելի Վիեննա, որտեղ կմասնակցի Սիրիայի խնդրի շուրջ կայանալիք բանակցություններին, տեղեկացնում է «Արմենպրես»-ը՝ հղում անելով ԱՄՆ-ի Պետդեպարտամենտի հաղորդագրությանը:

«ԱՄՆ-ի պետքարտուղար Ջոն Քերին նոյեմբերի 13-ից մինչեւ 17-ն ուղեւորություն կկատարի Թունիս, Վիեննա եւ Անթալիա»,- ասված է հաղորդագրության մեջ:

Դրանում նշվում է, որ «Վիեննայում պետքարտուղար Քերին երկկողմ ու բազմակողմ հանդիպումներ կանցկացնի օտարերկրյա գործընկերների հետ՝ քննարկելու Սիրիայում շարունակվող ճգնաժամը»:

Պետդեպարտամենտում նշում են, որ Ավստրիայի մայրաքաղաքում բանակցություններից հետո Քերին ԱՄՆ-ի նախագահ Բարաք Օբամային կուղեկցի Թուրքիայում G20-ի գագաթնաժողովում: Այդ հանդիպումը պլանավորված է նոյեմբերի 15-16-ին, հաղորդել է «Ինտերֆաքս»-ը:

Ավելի վաղ իրազեկ դիվանագիտական աղբյուրը ՏԱՍՍ-ին հայտնել Է, թե սպասվում Է, որ Սիրիայի հակամարտության կարգավորման շուրջ բազմակողմ հանդիպումը կկայանա նոյեմբերի 14-ին Վիեննայում: «Ներկա պահին կա այն բանի ըմբռնումը, որ Սիրիայի շուրջ նոր հանդիպումը տեղի կունենա շաբաթ օրը՝ նոյեմբերի 14-ին,- ասել Է զրուցակիցը:- Կողմերի գրաֆիկները համաձայնեցվում են, առայժմ պայմանավորվածություն կա շաբաթ օրվա շուրջ»:

Ավելի վաղ Գերմանիայի արտաքին գործերի նախարար Ֆրանկ Վալտեր Շտայնմայերը հայտնել Էր, որ Սիրիայի շուրջ նոր հանդիպումը պետք Է կայանա Ավստրիայի մայրաքաղաքում նոյեմբերի 12-ին: Մինչդեռ Պեկինում նշում են, որ չինական կողմը մտադիր Է Վիեննայում սիրիական խնդրի շուրջ բանակցություններին մասնակցել հենց նոյեմբերի 14-ին: