Սառույցը տեղից շարժվեց կամ՝ «Յունիգրաֆ–Իքս»–ի տխրահռչակ փորձն այլևս չի լինելու. «Փաստ»

Այս օրերին քաղաքացիների շրջանում կա մտահոգություն՝ կապված թափառող շների քանակի ավելացման, ինչպես նաև հարձակումների հետ: «Դինգո թիմի» համակարգող Գոհար Մանուշյանի հետ զրուցել ենք թե՛ քաղաքացիների մտահոգությունների, ու թե՛ նաև այն ճիշտ ուղղության, որով պետք է առաջնորդվել ոլորտում առկա խնդիրները լուծելու համար: Հիշեցնենք, որ Երևանի քաղաքապետարանը միակողմանի լուծել է թափառող կենդանիների վնասազերծման ծառայությունների մատուցման նպատակով «Յունիգրաֆ–Իքս» ՍՊԸ–ի հետ կնքված պայմանագիրը: Տարիներ շարունակ կենդանապաշտպան հ/կ–ները բազմիցս բարձրաձայնել են այդ ընկերության, մեղմ ասած, ոչ բարեխիղճ գործունեության մասին: Նման բազմաթիվ հայտարարություններով է հանդես եկել նաև «Դինգո թիմը»:

 

Գոհար Մանուշյանի խոսքով՝ այսուհետ պետք է լինի միմիայն մասսայական ստերջացում: «Հունվարից արդեն պետք է ՀՈԱԿ լինի (համայնքային ոչ առևտրային կազմակերպություն): Սա նշանակում է, որ այլևս ոչ մի շահույթ հետապնդող կազմակերպություն չի կարող որևէ մասնակցություն ունենալ՝ ամբողջը լինելու է հանրային վերահսկողության տակ: Արվելու են մասսայական ստերջացումներ, կատաղության դեմ պատվաստումներ, ճիճվաթափ, լվաթափ: Հիվանդություններ ունեցող կենդանիներն արդեն հ/կ–ների միջոցով բուժումներ են ստանալու, ագրեսիվների հետ աշխատելու են հատուկ վարժեցնողներ, որպեսզի հասկանանք՝ ի՞նչ խնդիր է: «Յունիգրաֆ– Իքս»–ի տխրահռչակ փորձն այլևս չի լինելու, լինելու է արտասահմանյան փորձը, որի կարևոր կետերից մեկը միմիայն մասսայական ստերջացումն է»,–«Փաստի» հետ զրույցում ասաց Գ. Մունուշյանը՝ հույս հայտնելով, որ մարզերում ևս ինչ–որ փոփոխություններ կլինեն այս առումով:

 

Իսկ թե ինչի՞ արդյունքում է տխրահռչակ փորձը բացառվելու, Գ. Մանուշյանը նշեց. «Սկսենք այնտեղից, որ մեր նոր քաղաքապետի շնորհիվ է, որ սառույցը տեղից շարժվեց: Նա շատ մեծ հետաքրքրություն է ցուցաբերել և շատ տեղեկացված է, թե ինչ է կատարվել նախկինում և ինչ պետք է կատարվի հետո: Նաև արտասահմանյան փորձն է ամբողջովին ուսումնասիրել: Այս ընթացքում հ/կ–ների ներկայացուցիչների հետ էլ են հանդիպումներ եղել»:

 

Մեր զրուցակիցը շեշտեց, որ շատ կարևոր է նաև հանրային վերահսկողությունը. «Լինելու է ՀՈԱԿ– հ/կ–ներ սերտ համագործակցություն: Կենդանապաշտպան կազմակերպություններն առաջին բուժօգնության և մնացած այլ հարցերում միմիայն օգնելու են, որ ամեն ինչ ճիշտ ստացվի»:

 

Ինչ վերաբերում է շների գլխաքանակի ավելացման և ոհմակների խնդրին, Գ. Մանուշյանը շեշտեց. «Այդ ամենը «Յունիգրաֆ– իքս»–ի՝ տարիներ շարունակ առկա գործունեության ադյունքն է. տարիներ շարունակ միայն փող է լափել և ստերջացումներ չի արել»: Նա ընդգծեց, որ վերոնշյալ փոփոխությունների ու դրան հետևող ճիշտ աշխատանքի շնորհիվ ոհմակային կուտակումները կսկսեն վերանալ:

 

Ինչ վերաբերում է շների հարձակումներին, նա ընդգծեց, որ դրանք պատահական չեն: «Ոչ մի շուն ուղղակիորեն չի հարձակվի: Այսինքն՝ պետք է լինի բավականին լուրջ պրովոկացիա: Բացի այդ, կան մարդիկ, որոնք շատ են վախենում, ինչի հետևանքով արտադրվում է ադրենալին, որին շները կարող են ռեակցիա տալ: Բայց եթե ոհմակները հստակ աշխատանքների արդյունքում ցրվեն, մեկ կամ երկու շնով երբեք նման վարք ցույց չեն տա, որովհետև նրանք այդ ժամանակ ավելի հանգիստ վիճակում են գտնվում: Բացի այդ աշխատանքներից, բնակչության հետ ևս աշխատանքներ ենք տանելու: Պետք է աշխատանք տանել թե՛ կենդանիների հետ վատ վերաբերվող մարդկանց, թե՛ վախեցողների և թե՛ սիրողների հետ, որ մարդիկ հասկանան, թե ինչպե՞ս պետք է վարվել կենդանիների հետ»,–ասաց մեր զրուցակիցը՝ ընդգծելով, որ հարցը մեծ հաշվով միայն մասսայական ստերջացման մեջ չէ:

 

«Կարևոր է նաև բնակչության հետ բացատրական, ուսուցողական աշխատանքը: Այդ առումով արդեն երկար տարիներ մեծ աշխատանք է կատարում «Փրո Փոուզ» կենդանիների բարեկեցության բարեգործական ընկերությունը: Պետք է աշխատենք նաև այն ուղղությամբ, որ դպրոցներում այդ բաց դասերն ավելի շատանան»,–ասաց նա:

 

Որպես արտասահմանյան փորձի օրինակ, Գ. Մանուշյանը նշեց Վրաստանը, ուր փողոցի բոլոր շները պատվաստված են, ստերջացված և հաշվառված: 

 

«Դինգո թիմի» համակարգողը, այնուամենայնիվ, վերջնական և լիարժեք արդյունքի համար կարևորեց կենդանիների պաշտպանության մասին օրենքի անհրաժեշտությունը. «Տարիներ շարունակ մենք պայքարել ենք այդ օրենքի ընդունման համար: Հիմա արդեն հույս ունենք, որ 2019թ. վերջապես ինչ– որ փոփոխություն կլինի, որովհետև եթե օրենք չլինի, կրկին շատ դժվար է լինելու: Օրենքի բացակայության պատճառով շատ ու շատ խնդիրներ են առաջանում: Անօթևան կենդանիների մեծ մասը տան կենդանիներ են եղել կամ ձագեր, որոնք դուրս են արվել տնից: Եթե օրենքը լինի, կկարողանանք կարգավորել թե՛ կենդանիների գլխաքանակի, թե՛ ստերջացումների և թե՛ նշված բոլոր խնդիրները»: