Ընտրություններին մասնակցող քաղաքական ուժերը՝ ոստիկանապետի հետ հանդիպման հրավերի մասին

ՀՀ ոստիկանապետ Վալերիյ Օսիպյանը դեկտեմբերի 9-ին կայանալիք արտահերթ խորհրդարանական ընտրություններին մասնակցող կուսակցությունների ու դաշինքների ռեյտինգային ընտրակարգով առաջադրված պատգամավորության թեկնածուներին և նախընտրական շտաբների ղեկավարներին հրավիրել է հանդիպումների՝ ընտրությունների շրջանում օրինականության ապահովմանն ուղղված միջոցառումների շրջանակում։

Tert.am-ը ներկայացնում է ընտրություններին մասնակցող քաղաքական ուժերի վերաբերմունքն այս հանդիպման հետ կապված։

ՀՅԴ ԳՄ անդամ Արսեն Համբարձումյանը Tert.am-ի հետ զրույցում ասաց, որ իրենք  որևէ խնդիր չեն տեսնում, սակայն պարտադիր պայման է հանդիպման բաց լինելը։

«Որևէ խնդիր չունենք, մի բայցով՝ այդ հանդիպումները լինեն բաց ԶԼՄ-ների համար»,- ասաց նա։

«Լուսավոր Հայաստան» կուսակցության նախընտրական շտաբի ղեկավար Դավիթ Խաժակյանն էլ նշեց, թե իրենք իրենց թեկնածուներին տեղեկացնում են, որ հանդիպում  է նախատեսվում։ Ըստ նրա՝ եթե թեկնածուները ժամանակ ու ցանկություն ունենում են, ապա գնում են այդ հանդիպմանը։

«Ինձ համար պարզապես զարմանալի է, որ այս նեղ քարոզչական իրավիճակում, երբ թեկնածուները րոպե անգամ չունեն, կկարողանան կտրվել ու այդ հանդիպմանը մասնակցել։ Ի վերջո, ոստիկանության լիազորությունն է ապահովել օրինականություն, բայց քանի որ կարծում եմ, որ ոստիկանապետի այդ ցանկությունը միտված է օրինականության հաստատմանը, խնդիր չեմ տեսնում»,- շարունակեց Դավիթ Խաժակյանը։

«Ազգային առաջընթաց» կուսակցության մամուլի խոսնակ Հայկ Գրիգորյանն էլ, անդրադառնալով թեմային, հայտարարեց, որ իրենց թեկնածուներն ամեն մեկը որոշում է կայացնում՝ ելնելով իր զբաղվածությունից։

«Ընդհանուր դիրքորոշում չունենք, բայց որպես շտաբի պետ՝ դեմ չեմ լինի հանդիպմանը։ Սակայն կարծում եմ, որ ժողովրդավարական, իրավական երկրում ոստիկանությունն այդքան մեծ դերակատարում չպետք է ունենան քաղաքական գործընթացների հետ։ Կարծում եմ՝ իրենք ավելի շատ պետք է զբաղվեն այն մասսայի հետ, ումից ընտրախախտում է սպասվում, չէ՞ որ լինում են նաև հրապարակումներ, բայց բոլորին հանդիպել ու բացատրել՝ օրենքն ինչ է, սխալ է»,- հավելեց Գրիգորյանը։

«Քրիստոնեա-ժողովրդական վերածնունդ» կուսակցության ցուցակի առաջին համար Լևոն Շիրինյանն էլ գտնում է, որ օգտակար գործի համար է հանդիպումը. «Նա հրամաններ չի տալիս, թե այս կամ այն արեք, եթե արդար ընտրություններ կազմակերպելու հետ է կապված հարցը, ապա որևէ խնդիր չեմ տեսնում։ Ոստիկանությունն օրենք է պահում, և մենք հույս ունենք, որ արդար ընտրություններ են լինելու, ինչն էլ կապում են ոստիկանության հետ»,- ավելացրեց Լևոն Շիրինյանը։

«Օրինաց երկիր» կուսակցության մամուլի խոսնակ Վահե Թորոսյանն էլ նշեց, որ իրենք ողջունում են ՀՀ ոստիկանապետ Վալերիյ Օսիպյանի նախաձեռնությամբ վարկանիշային թեկնածուների հետ հանդիպումը։ Ըստ նրա՝ հիմնական նպատակը քաղաքական գործընթացներում ոստիկանության չեզոքության, հասարակական կարգի պահպանման կարևորությունն էր։

«Ոստիկանության հիմնական գործառույթը հասարակության մեջ կարգուկանոնի հաստատումն է, իրավախախտումների բացահայտումը, կանխումը և հատկապես նոր Հայաստանում այն պետք է զերծ մնա քաղաքական գործընթացներին անհարկի միջամտելուց։ Մենք գնահատում ենք նման նախաձեռնությունը որպես դրական երևույթ մեր իրականության մեջ»,- ասաց Թորոսյանը։

«Քաղաքացու որոշում» սոցիալ-դեմոկրատական կուսակցության մամուլի խոսնակ Միքայել Նահապետյանն էլ հայտարարեց, թե իրենք հանդիպմանը կարձագանքեն այն ժամանակ, երբ պաշտոնական առաջարկ կստանան։

«Մենք պաշտոնապես առաջարկ չենք ստացել, մամուլից տեղյակ եմ, որ ոստիկանապետը նման հանդիպման ցանկություն է հայտնել։ Կուսակցությունը քաղաքական կազմակերպություն է, և որոշակի արարողակարգեր են գործում քաղաքական կազմակերպությունների և տարբեր ինստիտուտների միջև հարաբերություններում։ Երբ պաշտոնական առաջարկ կստանանք, այդ ժամանակ էլ կպատասխանենք, ոստիկանությունը հայտարարություններով կարող է հաղորդակցվել քաղաքացիների հետ»,- ընդգծեց Նահապետյանը։

Նշենք, որ «Սասնա ծռեր» կուսակցությունը նախկինում անդրադարձել է այս թեմային ու հայտարարել, թե նման հանդիպումները տհասություն է։

«Ոստիկանապետ Օսիպովի հանդիպումները ռեյտինգային թեկնածուների հետ քաղաքական տհասություն են. «Թեկնածուները, բնականաբար, հրաժարվել են այդ հանդիպումից, քանի որ անհեթեթություն է:

Նախևառաջ ոստիկանապետն ի՞նչ գործ ունի թեկնածուներին ինչ-որ իրավագիտակցական դասախոսություններ կարդալու հետ»,- ասել էր Ժիրայր Սեֆիլյանը։ 

«Իմ քայլը» և «Մենք» դաշինքների, ինչպես նաև «Բարգավաճ Հայաստան» և Հայաստանի Հանրապետական կուսակցությունների հետ կապ հաստատել չհաջողվեց։