10 000 դրամով ավելացնում եք մարդկանց եկամուտները՝ 18 000-ով կրճատելու հաշվին. Արփինե Հովհաննիսյանին Լենա Նազարյանը հակադարձեց՝ իրենք չեն ասել, թե նպաստները վերանալու են. բանավեճ

Սոցիալական խնդիրներն այն առանցքային խնդիրներն են, որոնք մղեցին ժողովրդին հեղափոխություն անել, կարծում եմ՝ ՀՀԿ-ն այս տարիներին անմարդկային սոցիալական քաղաքականություն է վարել, մարդիկ տառապել են աղքատությունից, հատկապես մարզերում. «5-րդ ալիք»-ի եթերում «Դեմ առ դեմ» նախընտրական բանավեճի ժամանակ հայտարարեց Իմ քայլը» դաշինքը ներկայացնող Լենա Նազարյանը:

Ըստ նրա՝ խոսքը ոչ միայն նյութականի պակասի մասին է, այլև դրսևորում է նաև վատ ճանապարհների, աղտոտված շրջակա միջավայրի, տրանսպորտի և այլնի հետ:

«Հիմա ՀՀԿ-ն աջ ու ձախ խոսում է անվտանգությունից, բայց տարիներ շարունակ մարդկանց կեցությունը եղել է վտանգված: Հիմա եթե ՀՀԿ-ում մտահոգված լինեին, կառավարությունն այսքան մտահոգություններ չէր ունենա»,- ասաց Նազարյանը:

Նա ներկայացրեց ծրագրային դրույթներից կետեր, ըստ որոնց՝ 5 տոկոսային կետով աղքատություն են կրճատելու 5 տարում, և թիրախավորելու են ոչ թե նպաստ ստանալը, այլ աշխատանքը:

Լենա Նազարյանը նշեց, որ այս ամենը խարսխված է տնտեսական աճի վրա, որը պետք է ունենա սոցիալական արդյունք: Ըստ նրա՝ 2017-ին բարձր տնտեսական աճ կար, բայց այն չանդրադարձավ սոցիալական վիճակի վրա, քանի որ դրանք զուտ վիճակագրական տվյալներ էին:

Նազարյանի հետ բանավիճող ՀՀԿ ներկայացուցիչ Արփինե Հովհաննիսյանն արձագանքեց. «Ուրախ եմ, որ կառավարությունը ևս մտահոգված է, իսկ մտահոգվելու առիթ շատ ունի»:

Ըստ նրա՝ իրենք աջ ու ձախ խոսում են անվտանգությունից, որովհետև ապահովել են այդ անվտանգությունը: Արփինե Հովհաննիսյանի դիտարկմամբ՝ անվտանգությունն այժմ պաթոսացված ելույթի է վերածվել, որի մասին խոսում են անվերջ, բայց ոչինչ չեն անում:

Անդրադառնալով տնտեսական աճի վրա խարսխված սոցիալական բարեփոխումներին՝ Արփինե Հովհաննիսյանը նշեց, որ աճի դինամիկան ըստ ԱՎԾ-ի ծայրահեղ ցուցանիշ է գրանցել:

«Կարելի է մեկ ամսում տվյալները վերցնել նայել, ինչպես անում են, էլի մարդկանց կյանքում ոչինչ չի փոխվել»,-ասաց նա և մի քանի տվյալ ներկայացրեց, ըստ որի՝ առաջարկում են 5 տարում կրճատել աղքատների թիվը, բայց հիմքում լրիվ այլ մեխանիզմ են դնում՝ 80 000 թոշակառուի նվազագույն թոշակը բարձրացնում են 10 000 դրամով, դրանով  հայտարարում, որ ծայրահեղ աղքատ չի լինի, մինչդեռ այդ մարդիկ, ովքեր մինչև 21 000 դրամ են թոշակ ստացել, կից ստացել են նաև անապահովության նպաստ՝ նվազագույն 17 000 դրամ: «Հիմա փոխելով նպաստների համակարգը՝ 10 000 դրամով ավելացնում եք 18 000 դրամով կրճատելու հաշվին, այսինքն՝ այդ 80 000-ի եկամուտները պակասելու են»,- ասաց նա:

Լենա Նազարյանը պնդեց, որ իրենք չեն ասել, որ նպաստները վերանալու են, կան որոշակի խավեր, ովքեր պետք է ստանան սոցիալական աջակցություն:

Ըստ նրա՝ այս ընթացում իրենք նվազագույն եկամուտ ստացող թոշակառուների թոշակները 10 000 դրամով բարձրացրել են, ինչը մեկ քայլ առաջ է, ծննդյան նպաստները 50 000-ից դարձրել են 150 000 դրամ, բժիշկների աշխատավարձը ևս խնայողությունների շնորհիվ բարձրացրել են, նաև հիփոթեքային ծրագիր են մշակել և այլն: «Սրանք սոցիալական ծրագրեր են, ամբողջը չեմ թվարկում, բայց մեզ համար կարևոր է տնտեսական աճը, ներդրումային միջավայր պետք է ստեղծել, որ աճ ապահովեն»,- ասաց Նազարյանը:

Արփինե Հովհաննիսյանը հայտարարեց, որ «Իմ քայլն» իր քաղաքականությունն ամբողջությամբ կառուցում է սուտ խոստումների և դրա չիրականացան վրա: Հովհաննիսյանը նշեց, որ իրենց հայտարարությունները միայն նրա մասին են, որ իրենք՝ «Իմ քայլը», լավն են,  ՀՀԿ-ն՝ վատը, բայց անում են այն, ինչ իրենք են արել:

«Կիսատ ու պոպուլիստական քաղաքականություն եք վարել, ՀՀԿ-ն քայլեր է արել, որոնք դուք մսխում եք, թե չէ նույնիսկ աշխատավարձ ու թոշակ չէիք կարող մարդկանց տալ»,-ասաց Արփինե Հովհաննիսյանը:

ՀՀԿ-ական թեկնածուն նաև հարցրեց Լենա Նազարյանին, թե աղքատության նպաստների տրամադրման կարգը բարեփոխելո՞ւ են, հիմքում ի՞նչ սկզբունք են դրել: Նազարյանը նշեց, որ պետք է հասկանալ իսկապես թիրախը, որ ընտանիքները պետք է ստանան, քանի որ մի քանի տասնյակ դեպքեր են արձանագրել, երբ համայնքի ղեկավարները նպաստ են ստացել աշխատողներին, բարեկամներին գրանցելու հաշվին և յուրացրել:

ՀՀԿ ներկայացուցիչը խնդրեց մեկ համայնքապետի անուն տալ: Նազարյանը խուսափեց անուն տալուց, քանի որ չէր հիշում:

«Անունը չէիք կարող տալ, կդառնայիք զրպարտիչ, ասում եք՝ ուսումնասիրել եմ հայտարարությունները, հայտարարություններով կոռուպցիայի դեմ չեն պայքարում, կարող է ստացվել՝ 90 տոկոսը ճիշտ չեն, քննության փուլում գործին հարիր վերաբերմունք ցուցաբերե՛ք»,- հորդորեց Հովհաննիսյանը: