Ընտրապայքարը վերածվել է մեղադրանքների և միմյանց քարկոծելու պայքարի. Լուսինե Հարոյան (բանավեճ)

«Ազգային առաջընթաց» կուսակցության ցուցակը գլխավորող Լուսինե Հարոյանը Հանրային ՀԸ եթերում նախընտրական բանավեճի ժամանակ նշեց, որ, ցավոք, այս ընտրապայքարը վերածվել է մեղադրանքների և միմյանց քարկոծելու պայքարի:

«Բայց, երբ բոլորս միասին հեղափոխություն էինք անում, փակում էինք փողոցները, հույս ունեինք, որ իսկապես կձևավորվի քաղաքական դաշտ, որտեղ կգան առողջ ուժեր, նոր ուժեր, և մեր քաղաքական դաշտը կվերածվի ոչ թե անձի շահերի, կլանների բախման դաշտ, այլ առողջ գաղափարական պայքարի դաշտի: «Ազգային առաջընթացը» այդ կուսակցություն է, որ ուզում է այս մշակույթը ներմուծել»,-ասաց նա:

Ըստ նրա՝ իրենք  պատրաստ են իրենց անձնային, մասնագիտական կարողությունները ներդնել ի շահ նոր Հայաստանի, ի շահ ժողովրդի: «Ազգային առաջընթաց կուսակցությունը սոցիալական ուղղվածության ուժ է, մարդակենտրոն ուժ է, և գտնում ենք՝ պետությունը պարտավոր է հոգ տանել իր քաղաքացիների մասին և ստեղծել սոցիալապես արդար հասարակարգ, վերացնելու ենք կապիտալի գերիշխանությունը քաղաքական դաշտում, ազատելու ենք տնտեսությունը բանկային վաշխառուական համակարգի ճիրաններից, մենք կրթությունը հռչակելու ենք տնտեսության գերակա ճյուղ, բայց մենք սկսելու ենք մեզնից, մանդատը ստանալով՝ պատգամավորների անձեռնմխելիությունը վերացնելու ենք: Նա չպետք է լինի ժողովրդից վեր, պետք է լսելի լինի ժողովրդին: «Ազգային առաջընթաց» կուսակցությունը ձեր ձայնն է ԱԺ-ում»,-ասաց նա: