25-ամյա ծննդկան է մահացել․ հարազատները մանրամասներ են հայտնում

Արմավիրի մարզի Արմավիր քաղաքի Բժշկական կենտրոնում դեկտեմբերի 28-ին  կեսարյան հատումից հետո մահամերձ վիճակում «Աստղիկ» ԲԿ տեղափոխված 25-ամյա ծննդկան Սուսաննա Ոսկանյանը նույն օրը մահացել է։ 

Բժիշկները մահացածի հարազատներին ներկայացրել են, որ ծննդկանի մահվան պատճառը եղել է թոքերի այտուցվածությունն ու ներքին արնահոսությյունը։

«Կեսարյան հատումը տեղի է ունեցել դեկտեմբերի 27-ին, այդ օրը պետք է մնար վերակենդանացման բաժանմունքում, մենք բժիշկի հետ խոսեցինք, նա ասաց, որ ամեն ինչ նորմալ է և որ պարզապես արնահոսության հետևանքով շատ արյուն է կորցրել»,- ԼՈՒՐԵՐ․com-ի հետ զրույցում մանրամասնեցին մահացած ծննդկանի հարազատները։ 

Վերջիններս նաև նշում են, որ նույն օրը բժիշկները հավաստիացրել են, որ ծննդկանի հետ ամեն բան կարգին է և կրկին արնահոսելու դեպքում հիվանդանոցն ունի բոլոր սարքավորումները հիվանդի վիճակը կայունացնելու համար․ «Քանի որ վերակենդանացման բաժանմունքում թույլ չեն տալիս հիվանդի մոտ մարդ մնա, մենք նրան կերակրեցինք ու տուն գնացինք։ Սակայն ժամը 4-ին մեզ զանգահարում ու ասում են, որ տեղափոխում են Երևանի «Աստղիկ» ԲԿ, այդտեղ ասացին, որ վիճակը ծայրահեղ ծանր է և գոնե 6-8 ժամ առաջ պետք է բերեինք իրենց մոտ, շատ չանցած Սուսաննան մահացավ․․․»։

Մահացած ծննդկանի հարազատները տեղեկացրին, որ անհամբեր սպասում են դատաբժշկական փորձաքննության պատասխաններին։

Նշենք, որ Սուսաննա Ոսկանյանը ուներ 4-ամյա դուստր, իսկ դեկտեմբերի 27-ին ծնվել է տղա երեխան, որն առողջական որևէ խնդիր չունի։

 

Աղբյուր