Իրավապաշտպանը՝ Ենոքյանի գործի մասին. Ներումը ենթադրում է մեղքի անուղղակի ճանաչում

NEWS.am--ը գրում է.

Կրթություն ստանալը Մհեր Ենոքյանի իրավունքն է, բայց նրա անմեղության օգտին փաստարկ չէ: Այս մասին ասաց Հայաստանի առաջին օմբուդսմեն, «Ընդդեմ իրավական կամայականության» ՀԿ նախագահ Լարիսա Ալավերդյանը՝ NEWS.am-ի խնդրանքով մեկնաբանելով սպանության համար ցմահ ազատազրկման դատապարտված Մհեր Ենոքյանի ենթադրվող ազատության հետ կապված իրավիճակը:

Իրավապաշտպանը շեշտեց, որ զգացմունքային զրույցները Ռուս-Հայկական (Սլավոնական) համալսարանում Ենոքյանի կրթություն ստանալու իրավաչափության մասին, ինչպես նաեւ ստացած կրթությունը որպես Ենոքյանի անմեղության օգտին փաստարկ ներկայացնելու փորձերը միայն հասարակության ցածր իրավական մշակույթի արտացոլումն են: «Ենոքյանի կրթություն ստանալու իրավունքը, ինչպես նաեւ այն, որ դա դատապարտյալի մեղավորության տեսակետից ոչինչ չի նշանակում»,- նշեց իրավապաշտպանը:

Լարիսա Ալավերդյանը հիշեցրեց, որ Ենոքյանը դատապարտվել է բարձրագույն պատժաչափի՝ գնդակահարության: Դատավճիռը Ենոքյանի եւ բարձրագույն պատժաչափի դատապարտված այլ անձանց համար փոխարինվել է ցմահ ազատազրկմամբ: «Հետաքրքիր է, որ նրանք համաներվել են մահապատժի մորատորիումի մասին դրույթի ուժի մեջ մտնելու տառացիորեն նախօրեին: Այսպիսով համաներման ակտը բացարձակապես պատճառաբանված չէր»,- նշեց իրավապաշտպանը:

Պատասխանելով հարցին՝ կարո՞ղ է արդյոք ներվել մարդը, որն իր մեղքը չի ընդունում, Լարիսա Ալավերդյանը նշեց, որ գործի մանրամասները հայտնի չեն, հայտնի չէ՝ արդյոք եղել է ներման խնդրագիր, բայց ամեն դեպքում նման խնդրագիրը ենթադրում է մեղքի անուղղակի ընդունում: Հայտնի չէ նաեւ՝ եղել է գործը վերանայելու խնդրագիր: «Ես նրանց կողմում եմ, ովքեր համարում են, որ ցանկացած դատապարտյալ պետք է ունենա գործի վերանայման իրավունք: Սա մարդու իրավունքն է՝ անկախ կատարած արարքից: Առավել եւս, որ այնպիսի ժողովրդավարական երկրում, ինչպիսին ԱՄՆ-ն է, դատական սխալներ կան: Ինչ կարող ենք ասել Հայաստանի մասին, որտեղ բոլորը խոսում են դատական համակարգի կախվածության մասին»,- նշեց Լարիսա Ալավերդյանը:

Իրավապաշտպանը, միաժամանակ, նշեց, որ Մհեր Ենոքյանի գործը միայն դրվագ է, իսկ խնդիրը շատ ավելի խորքային է: «Ցանկանում եմ նշել, որ Ռուբեն Մելիքյանի հետ (Արցախի նախկին օմբուդսմեն) լիովին համաձայն եմ տուժողների իրավունքների պաշտպանության անհրաժեշտության հարցում, եւ այստեղ նոր նորմերի կարիք կա: Տուժած կողմը պետք է գործընթացին տեղեկացված լինի»,- նշեց Ալավերդյանը:

Մհեր Ենոքյանը առավելագույն պատժաչափի է դատապարտվել (հետագայում փոխարինվեց ցմահ ազատազրկմամբ) Իոսիֆ Աղաջանովի սպանության համար: Սպանությունը կատարվել է Գյուղատնտեսական ինստիտուտի ուսանող Արամ Հարությունյանի հետ միասին: Ա. Հարությունյանը դատապարտվեց 15 տարվա ազատազրկման:

Իոսիֆ Աղաջանովին հասցվել են մի քանի տասնյակ դանակի հարվածներ: Սպանությունը կատարելով՝ մեղավորները մասնատել էին դժբախտ պատանու մարմինը, պայուսակի մեջ թաքցրել եւ թողել աղբավայրում, իսկ իրենք փորձել էին թաքնվել արդարադատությունից:

Ենոքյանի ազատ արձակման դեմ ստորագրահավաք է սկսվել: Խնդրագրի ներքո ստորագրել են շուրջ 1200 բուժաշխատողներ:

Հատկանշական է, որ Մհեր Ենոքյանի կինը՝ Զարուհի Մեժլումյանը (պաշտոնապես ամուսնացել են 2013 թվականին), Պետական վերահսկողական ծառայության ղեկավար Դավիթ Սանասարյանի մամուլի ծառայության ղեկավարն է: Ինչպես ակցիայի կազմակերպիչներն են նշել, նա ակտիվորեն օգտվել է պաշտոնեական լծակներից՝ ցանկալի արդյունքի հասնելու համար:

Պակաս կարեւոր չէ նաեւ, որ Արդարադատության նախարարությունը կտրականապես հրաժարվում է պատասխանել այն հարցին՝ արդյոք նախատեսվում է ազատ արձակել Ենոքյանին․ տեղեկատվությունը հասանելի է դարձել հանրությանը արտահոսքի շնորհիվ: