Երեկ գիշերը Թուրքիայից ապրանք ներկրող ՀՀ քաղաքացիները փակել են Բագրատաշենի մաքսային կետի ճանապարհը։ Բանն այն է, որ քաղաքացիները միայն երեկ են պարզել, որ այլեւս չեն կարող առանց մաքսատուրքերի ու հարկերի վճարման 25 կգ բեռ ներմուծել։ Քաղաքացիները պահանջել են, որ գոնե այս անգամ թույլատրեն ներմուծել, քանի որ իրենք տեղյակ չեն եղել։
Armdaily.am-ի թղթակիցն, ով այդ պահին գտնվում էր մաքսակետում, ֆիքսել է, թե ինչպես է Վրաստան ուղևորվող ԱԱԾ տնօրեն Արթուր Վանեցյանը մոտենում ու զրուցում քաղաքացիների հետ։ Քաղաքացիների հետ խոսելուց հետո, ԱԱԾ տնօրենը կապ է հաստատել ՊԵԿ նախագահի հետ՝ նրան փոխանցելով քաղաքացիների հորդորը, որ թույլ տան այս անգամ առանց լրացուցիչ հարկի հատել մաքսակետը։ Մեր տեղեկություններով հարցը կարգավորվել է հօգուտ քաղաքացիների։ Առևտրով զբաղվողները ԱԱԾ տնօրենի մոտ նաև մեկ այլ հարց են բարձրացրել։ Նրանք նշել են, որ Թուրքիայից Հայաստան եկող իրենց բեռը Վրաստանում պարտադրում են Հայաստան փոխադրել վրացական փոստային առաքանու միջոցով, ինչը ծախսատար է և հավելյալ դժվարություններ է առաջացնում բեռի փոխադրման ժամկետների հարցում։ Լսելով դժգոհությունը՝ ԱԱԾ տնօրենն հավաստիացրել է քաղաքացիներին, որ այդ հարցն իր պաշտոնական այցի շրջանակներում կքննարկի վրացական կողմի պատկան մարմինների ղեկավարների հետ։ Որպես միջանկյալ լուծում՝ Վանեցյանն առաջարկել է վրացական կողմի հետ քննարկել նաև Վրաստանից Հայաստան ուղեբեռի փոխադրման հարցը՝ հայկական փոխադրամիջոցների օգնությամբ։
Նշենք, որ առանց մաքսատուրքերի ու հարկերի վճարման ներմուծվող ապրանքների արժեքային չափը 2019 թվականի հունվարի 1-ից կրճատվել է 3 անգամ, իսկ կշիռը՝ 2 անգամ: Եվրասիական տնտեսական հանձնաժողովի խորհրդի` 2017թ. դեկտեմբերի 20-ի «Անձնական օգտագործման ապրանքների հետ կապված առանձին հարցերի վերաբերյալ» թիվ 107 որոշման մեջ ԵՏՀ 2018թ. նոյեմբերի 1-ի թիվ 91 որոշման համաձայն` եթե ֆիզիկական անձինք ԵԱՏՄ մաքսային տարածք ներմուծեն անձնական օգտագործման ապրանք, որի արժեքը չի գերազանցում 500 եվրոյին համարժեք գումարը, իսկ քաշը` 25 կիլոգրամը, ապա որեւէ գանձում չի կատարվի: Չափաքանակները գերազանցելու դեպքում կիրառվելու է մաքսատուրքերի եւ հարկերի միասնական դրույքաչափ, այսինքն` ապրանքների արժեքի նկատմամբ 30%-ի չափով, բայց ոչ պակաս, քան 1 կիլոգրամի համար 4 եվրոյին համարժեք գումար նշված արժեքը կամ կշիռը գերազանցող մասի համար:
Մանրամասները՝ տեսանյութում
