Երևանում 33-ամյա տղան դանակի մի քանի հարված է հասցրել 62-ամյա հորաքրոջ պարանոցին եւ կրծքավանդակին

Երեւանում. 33-ամյա տղան դանակի մի քանի հարված է հասցրել 62-ամյա հորաքրոջ պարանոցին և կրծքավանդակին, ով «ծայրահեղ ծանր» ախտորոշմամբ տեղափոխվել է հիվանդանոց։

Shamshyan.com–ի փոխանցմամբ՝ այսօր՝ փետրվարի 2–ին,  Ժամը 16:00-ի սահմաններում, «Էրեբունի» բժշկական կենտրոնից ոստիկանության Էրեբունու բաժին ահազանգ է ստացվել, որ «ծայրահեղ ծանր» ախտորոշմամբ Երևանի 1-03 շտապօգնության բժիշկների հերթապահ խումբը իրենց մոտ է տեղափոխել մի քաղաքացուհու:

Ոստիկաններն ու քննիչները պարզել են, որ վիրավորը Երևան քաղաքի Լենինգրադյան փողոցի բնակիչ, 62-ամյա Վեներա Միրզոյանն է, ով՝ ըստ բժիշկների տեղեկանքի, ի վիճակի չէ կատարվածի մասին բացատրություն տալու:

Ոստիկաններն ու քննիչները պարզել են նաև, որ վիրավորը հիվանդանոց է տեղափոխվել Էրեբունի վարչական շրջանի Արին-Բերդի փողոցի 19 հասցեից:

Փաստի առթիվ քննչական բաժնի պետ Ա. Գոյունյանի որոշմամբ ստեղծվել է քննչական խումբ՝ քննչական բաժնի պետի տեղակալ Գառնիկ Մաթևոսյանի և ավագ քննիչ Տիգրան Միրզոյանի գլխավորությամբ:

Ֆոտոլրագրողի տեղեկություններով, կատարողը՝ Երևան քաղաքի Շիրակի փողոցի բնակիչ, 33-ամյա Կարեն Միրզոյանը դանակի մի քանի հարված է հասցրել իր հորաքրոջ՝ Վ. Միրզոյանի պարանոցի, կրծքավանդակի հատվածներում, որից հետո ահազանգել է ոստիկանություն, և արդեն նրան դեպքի վայրից Էրեբունու ոստիկանության բաժին են տեղափոխել ոստիկանության Երևան քաղաքի վարչության ՊՊԾ գնդի 1-ին վաշտի ծառայողները:

Գ. Շամշյանի տեղեկություններով, քննչական խումբը հայտնաբերել է նաև հանցագործության գործիք հանդիսացող դանակը, որը ավագ քննիչ Տ. Միրզոյանի որոշմամբ առգրավվել է:

Ֆոտոլրագրողի տեղեկություններով, դանակահարության պատճառը եղել է Լենինգրադյան փողոցի տան տնօրինման հետ կապված խնդիրը: