Մենք փողոցային չենք. բողոքող առևտրականները պահանջում են, որ պաշտոնյաներն իրենց ընդունեն սենյակներում (ֆոտո)

Կառավարության դիմաց այսօր` փետրվարի 4-ին, բողոքի ակցիա են անցկացնում Բագրատաշենի անցակետում ուղեբեռի թույլատրելի քաշի սահմանափակման դեմ բողոքող առևտրականները: Նրանց խոսքով` Ստամբուլ-Երևան ավտոբուսներով Բագրատաշեն հասնելով` պարզել են, որ ունեն միայն անձնական 25 կգ ուղեբեռ տեղափոխելու թույլտվություն:

Նրանք Կառավարության շենք մտնող՝ վարչապետի խոսնակ Վլադիմիր Կարապետյանին կանգնեցրին ու խնդրեցին լսել իրենց խնդիրը լսել:

«Մեզ անցակետում ասում են, որ միայն անձնականի իրավունք ունենք: Մեզ թույլատրվում ա 25 կգ` մեր հիգիենայի պարագաները, հագուստը:  Ուզում ենք` գոնե 15-20 կգ ավելացում տան, որ կարողանանք գոնե ընտանիքի անդամներին նվեր բերենք»,- ասաց ցուցարարներից մեկը:

Վլադիմիր Կարապետյանի` դիմումը գրավոր ձևակերպելու առաջարկին` անմիջապես ընդդիմանալով` ցուցարարները նշեցին. «Երկու ամիս ա, գրավոր ենք ուղարկում: Գրավոր է'լ չենք ուզում»:

Առևտրականները նշեցին, որ չեն ցանկանում, որ տարածքում աշխատեն լրագրողները, և իրենց խնդիրը պաշտոնյաները լսեն իրենց սենյակներում նստած: Նրանք պահանջեցին ընդունել իրենց. «Վերջ, փողոցում չենք խոսում, մենք փողոցային չենք, գիտե՞ք: Մենք ամեն մեկս մեր տան անձն ենք»:

Վլադիմիր Կարապետյանը խոստացավ հետամուտ լինել. «Ես կբարձրացնեմ էդ հարցը, ՊԵԿ կկապվեմ, կհասկանամ»,- խոստացավ նա: