Սևանի ջուրն ո՞ւմ «ջրաղացին» են ուզում լցնել նոր իշխանությունները

Դեկտեմբեր-հունվար ամիսների ընթացքում Սևանի ջրի մակարդակը վեց սանտիմետրով նվազել է: Ըստ պաշտոնական տեսակետի, դրա պատճառը ձմռան ամիսներին գրանցված բարձր ջերմաստիճանն է եղել: Շրջանառվող տեսակետի համաձայն, քանի որ այս տարի Սևանը չի սառել, այդ պատճառով էլ ջրի մակարդակի նման նվազում է տեղի ունեցել:

Էկոլոգիայի միջազգային ակադեմիայի ակադեմիկոս, աշխարհագրական գիտությունների դոկտոր, պրոֆեսոր Աշոտ Խոյեցյանը համոզված է, որ ինչքան էլ ձմեռը տաք լինի, միևնույն է, ձմռան երկու ամիսների ընթացքում չէր կարող Սևանի մակարդակը վեց սանտիմետրով նվազել:

«Միանշանակ կարող ենք ասել, որ Սևանի ջուրը գուցե մեկ սանտիմետր կարող էր գոլորշիանալ, բայց ձմեռային ամիսներին, երբ արեգակնային ճառագայթների լարվածությունն անհամեմատ ավելի փոքր է և ջրի ու օդի ջերմաստիճանը 0-ին մոտ է կամ 0-ից ցածր, ապա այդ պայմաններում չի կարող ջրի գոլորշիացում տեղի ունենալ: Ջրի մակարդակի նման իջեցումը կարող է միայն հասկանալի պատճառներով, այսինքն ջրի մեխանիկական պակասեցման արդյունք լինել: Ամռանը, այո, գերինտենսիվ գոլորշիացման պատճառով կարող է գոլորշիացում լինել, բայց այս պարագայում վեց սանտիմետրով նվազումը կարող էր միայն բոլորիս հայտնի պատճառով տեղի ունեցած լինել: Այսինքն, այն միանշանակ չի կարող գոլորշիացման հետևանք լինել, և այդ տեսակետը չի համապատասխանում իրականությանը: Մեկ-երկու սանտիմետրի պարագայում խնդիրն այլ է, վեց սանտիմետրի պարագայում՝ այլ»,- ասաց Ա. Խոյեցյանը:

Այս պայմաններում հարց է ծագում, թե նոր իշխանություններն ինչո՞ւ են որոշել հասարակությանը համոզել, թե 0 աստիճանի պայմաններում Սևանի ջրի մակարդակը կարող էր այդքան շատ իջնել: Ու եթե դա իսկապես այդպես է, ապա ստացվում է, որ ամռան ամիսներին, երբ օդի ջերմաստիճանը ձմռան համեմատ աննախադեպ բարձր լինի, ապա կարող է Սևանը չորանալ:

Ի դեպ, պարզագույն հաշվարկ կատարելու դեպքում կարելի է հաշվել, թե օդի ինչ աստիճանի դեպքում որքան գոլորիացում կարող է տեղի ունենալ: Այդ մասին գիտեն անգամ դպրոցականները, բայց թե այսկերպ Սևանի ջուրն ո՞ւմ «ջրաղացին» են ուզում լցնել նոր իշխանությունները պարզ չէ:

Արմինե Գրիգորյան