Ռազմական փորձագետ. «Կործանիչային ավիացիա ստեղծելու հնարավորություն ենք ստանում»

 

SU-30 կործանիչների հնարավորությունները շատ լայն են: Դրանք ժամանակակից, պրոֆեսիոնալ կործանիչներ են: Մեզ հետ զրույցում նման տեսակետ հայտնեց ռազմական փորձագետ Դավիթ Հարությունովը՝ ընդգծելով, որ այս կործանիչները շատ կարևոր են մեր ռազմաօդային ուժերի համալրման առումով:

Նշենք, որ պաշտպանության նախարարությունն արդեն հայտնել է, որ Հայաստանի Հանրապետության կողմից ռուսաստանյան SU–30 ինքնաթիռների ձեռքբերման վերաբերյալ համապատասխան գործարքը ստորագրվել է: Ավելի վաղ ռուսական «Կոմերսանտ»-ը տեղեկացրել էր Ռուսաստանի կողմից Հայաստանին վաճառվող թվով չորս SU-30 կործանիչների մասին:

Ռազմական փորձագետը SU–30-ի հնարավորությունները բազմաֆունկցիոնալ է որակում:

«Մեր սպառազինության մեջ կաSU-25, որը զուտ հարվածային ինքնաթիռ է: Իսկ SU–30-ը շատ լայն հնարավորություններ ունի: Նախ մենք հնարավորություն ենք ստանում, փաստորեն, ստեղծելու կործանիչային ավիացիա: Մեր հակաօդային պաշտպանությունը մինչև հիմա ապահովվում էր ցամաքային հրթիռային հակաօդային պաշտպանության համակարգերի կողմից, որոնք մի շարք սահմանափակումներ ունեն: Այժմ SU-30-ը հնարավորություն կտա նաև այդ տեսակետից համալրել հակաօդային պաշտպանության համակարգը: Այսինքն՝ օդային թիրախներն իրենք շատ էֆեկտիվ կարող են ոչնչացնել»,-ասաց փորձագետը:

Նրա խոսքով, թեև, ինչպես խոսվում է, կործանիչները չորսն են, բայց անգամ այդ սահմանափակ քանակությամբ դրանք էֆեկտիվության առումով լայն հնարավորություն են ապահովվում. «Սա հատկապես այն ֆոնի վրա, որ Ադրբեջանի կործանիչային ավիացիան բավականին թույլ է: Իրենք այս վերջին տարիների ընթացքում հիմնականում ՍՈՒ 25 են ձեռք բերել, որն, ինչպես նշեցի, հարվածային ինքնաթիռ է: Իրենք ունեն ընդամենը ՄԻԳ-29 տեսակի 14 կործանիչ, որը, ի տարբերություն SU–30-ի, ժամանակակից չէ, ինչպես նաև իր հնարավորություններն ավելի փոքր են: Երկրորդ հանգամանքը SU–30-ի հարվածային գործառույթներն են: Մեծ հաշվով այն բազմաֆունկցիոնալ է, և ունի լայն դիապազոն՝ նաև ցամաքային թիրախները ոչնչացնելու առումով»:

Ռազմական փորձագետը շեշտեց, որ նման դասի կործանիչներ տարածաշրջանում չկան: Նաև հավելեց, որ SU–30-ը թռիչքի բավականին մեծ հեռավորություն ունի. «Հիմա մեր զինված ուժերի համար պատմական պահ է, որովհետև ձեռք է բերվում ժամանակակից, բազմաֆունկցիոնլ կործանիչ: Այնպես չէ, որը աշխարհում շատ երկրներ ունեն այն, որովհետև հիմնականում ձեռք են բերում ավելի թեթև դասի ինքնաթիռներ, որոնք ավելի մատչելի են»:

Դ. Հարությունովը վերոնշյալի շուրջ չի բացառում նաև քաղաքական ենթատեքստի առկայությունը:

«Երբ Հայաստանում իշխանությունը փոխվեց, Հայաստանի և Ռուսաստանի հարաբերություններում մենք որոշակի ձևափոխումներ տեսանք: Այսինքն, եթե մինչ այդ իշխանություններն որոշ խնդիրների առանձնապես ուշադրություն չէին դարձնում, ապա նոր իշխանությունների կողմից դրանք բավականին ակտիվ բարձրաձայնվում էին: Ըստ իս՝ այստեղ հարցն այն է, որ փորձ է արվում հայ-ռուսական հարաբերությունների որոշակի նոր մոդել ձևավորել, որը մի քիչ նման է ռուս-բելառուսականին: Ռուսաստանի հետ հարաբերությունների հիմնական ռազմավարական հիմքերը պահպանելով՝ Հայաստանն ուզում է մի քիչ ընդլայնել մանևրի դաշտն այդ հարաբերությունների մեջ: Այս համատեքստում SU–30 կործանիչների ձեռբերումը, կարծես, որոշակի կոմպենսացում է: Այսինքն՝ մի կողմից մենք մանևրի դաշտը մեծացնում ենք: Այսինքն՝ տեսնում ենք բավականին ակտիվ քաղաքականություն եվրոպական, ինչու չէ, նաև ամերիկյան ուղղությամբ: Այդուհանդերձ, մենք Ռուսաստանին դրանով ցույց ենք տալիս, որ իրենց հետ հարաբերությունների մեր հիմնական հենասյուներից մեկը՝ ռազմակտեխնիկականը, ոչ միայն չենք քչացնում, այլև ինչ-որ տեղ նաև ընդայնում ենք»,-ասաց նա՝ ընդգծելով, որ կործանիչը բավականին բարդ է և ապագայում իր սպասարկման առումով Ռուսաստանի աջակցությունն անհրաժեշտ է լինելու:

Աննա Բադալյան