Հայկ Խանումյան. «Քաղաքական ակտիվությունն այս անգամ ավելի շուտ է սկսվել, քան լինում է սովորաբար»

Վերջին շրջանում Արցախի ներքաղաքական դաշտն ուշադրության կենտրոնում է: Հնչեցին հայտարարություններ, որից հետո նաև արձագանքներ՝ Արցախի իշխանության ներկա և նախկին ներկայացուցիչների կողմից: Որոշ շրջանակներ այս ամենը տեղավորում են 2020թ. Արցախում սպասվելիք ընտրությունների տրամաբանության մեջ: Արցախի Ազգային ժողովի պատգամավոր, «Ազգային վերածնունդ» կուսակցության նախագահ Հայկ Խանումյանի գնահատմամբ՝ Արցախում քաղաքական ակտիվությունն ինքնին լավ է:

«Դա նշանակում է՝ կան գործընթացներ, քաղաքական դաշտը չի ճահճանա: Ժամանակին Սերժ Սարգսյանի հովանավորությամբ Բակո Սահակյանը փորձել է Արցախում քաղաքական ճահիճ ստեղծել, որտեղ իրեն աջակցող քաղաքական ուժերը միասնականության ճառերի տակ ոչնչացնում էին քաղաքական համակարգը և կոռուպցիոն– կլիենտալիստական համակարգ ստեղծում, որի շահառուն Բակո Սահակյանի նեղ շրջապատն էր, և այդ կուսակցությունները՝ ամեն մեկն իր չափով: Ճիշտ է, Բակո Սահակյանի շրջապատի այսօրվա ակտիվությունն առավելապես կապված է այդ համակարգը փրկելու ճիգերի հետ, քանզի զրկվել են գլխավոր հովանավորից և ոգեշնչողից` Սերժ Սարգսյանից, սակայն այն նաև դրական կողմ ունի, քանզի հանրության մեջ տարբեր քննարկումներ է առաջացնում»,–մեզ հետ զրույցում ասաց Հայկ Խանումյանը: 

Անդրադառնալով որոշ շրջանակների կողմից արծարծվող այն տեսակետներին, թե Հայաստանի և Արցախի ներկայիս իշխանությունների մեջ հակասություններ կան, ու պատասխանելով հարցին՝ սա իրատեսականությա՞ն, թե մանիպուլ յացիայի տիրույթում է, Հ. Խանումյանը նշեց.

«ՀՀ և ԱՀ իշխանությունների մեջ կա իրական և լուրջ հակասություն: Այդ հակասությունն աշխարհայացքային է: Հայաստանում հաստատվել է մի իշխանություն, որն ամեն քայլի իրեն պատասխանատու և հաշվետու է համարում հանրության առջև: Այդ իշխանության ցանկացած քայլ հանրության մանրադիտակի տակ է, կառավարող ուժը հաշվի է առնում հանրային կարծիքը և քննադատությունը: Հսկայական աշխատանք է տարվել համակարգային կոռուպցիան ու մենաշնորհներն արմատախիլ անելու ուղղությամբ: Դրան հակառակ՝ Արցախում կառավարող շրջանակը մնում է գերկոռումպացված, օգտագործում է հանրային միջոցները մի խումբ մարդկանց բիզնեսները սպասարկելու համար: Տենդերների, վարձակալությունների, պետական գնումների, պետության կողմից անհատույց տրամադրման եղանակով իրականացնում է պետական բյուջեի թալան, ուժային կառույցների միջոցով կատարում է խոշտանգումներ, օգտագործում է ցանկացած միջոց` քաղաքական համակարգի և քաղաքացիական հասարակության զարգացումը խոչընդոտելու համար: Անօրինակ ձևով կենտրոնացնում է բոլոր ռեսուրսները և իշխանությունը` սեփական շահերին ծառայեցնելու նպատակով: Բնականաբար, սա լուրջ հակասություն էր: ՀՀ–ում թավշյա հեղափոխությունից հետո ինձ նույնպես թվում էր, որ Արցախի իշխանությունները չեն ընդգծի այս տարբերությունը և կփորձեն աստիճանաբար համակերպվել նոր իրավիճակի հետ: Սակայն ժամանակը ցույց տվեց, որ նրանք` Բակո Սահակյանը, նրան սատարած ուժերը մինչև վերջ պայքարելու են թալանելու իրենց իրավունքի համար»:

Ինչ վերաբերում է Արցախում սպասվելիք 2020թ. նախագահական և ԱԺ ընտրություններին, այդ առումով Արցախում առկա տրամադրություններին, պատգամավորը նշեց. 

«2020թ. ապրիլին նախատեսված են թե՛ նախագահի, թե՛ ԱԺ ընտրություններ, և կարող ենք ասել, որ քաղաքական ակտիվությունն այս անգամ ավելի շուտ է սկսվել, քան դա լինում է սովորաբար: Ես կարծում եմ, որ այդ ակտիվությունը դրական երևույթ է, և քաղաքական բոլոր դերակատարներին կդրդի ակտիվանալ»:

 

ԱՆՆԱ ԲԱԴԱԼՅԱՆ