Եթե կա բովանդակություն, հնարավոր է աշխատել անգամ առանց Մշակույթի նախարարության. Նարինե Թուխիկյան (տեսանյութ)

Մշակույթի նախարարությունը չի փակվելու, պարզապես այն և երկու այլ նախարարություններ գործելու են մեկ նախարարության կազմի մեջ և բովանդակային առումով մշակույթին վերաբերվող որևէ բան դուրս չի մնալու նոր նշանակվելիք նախարարի դաշտից. այս մասին Tert.am-ի հետ զրույցում ասաց ԱԺ «Իմ քայլը» խմբակցության պատգամավոր Նարինե Թուխիկյանը:

«Այստեղ կարևորը գաղափարն է, թե ինչ բովանդակություն ու գաղափար ենք մենք դնում կամ ինչ հանձնարարական է տրվում այս նախարարությանը: Կարևորը նախարարություններն ու կառավարությունը պետք է մշակութային քաղաքականություն մշակեն: Պետք է նախկին իշխանության ժամանակ հարց բարձրացվեր, թե մշակույթի նախարարությունն ի՞նչ քաղաքականություն ունի, արդյո՞ք ունի մշակած քաղաքականություն, թե՞ չունի: Երբ այդ հարցերը տրվեին, կտեսնեինք, որ մեր մշակույթի նախարարությունը չուներ քաղաքականություն` ինչպիսին պետք է լիներ ռազմավարությունը Հայաստանում մշակութային առումով»,- նշեց նա:

Թուխիկյանի խոսքով` եթե նախարարության անունը մի քիչ երկար է դառնում, դա չի նշանակում, որ այն բովանդակազրկվում է, հակառակը, հիմա բովանդակությամբ պետք է լցվի այդ նախարարությունը:

Դիտարկմանը` խոսվում է սուպերվարչապետական համակարգը վերացնելու մասին, բայց փաստորեն ստեղծվում է նաև սուպերնախարարություն, Թուխիկյանը պատասխանեց. «Այո՛, շատ մեծ նախարարություն է դառնում, և նախարարը, որը կնշանակվի շատ մեծ նախարարության ղեկավար, շատ բան կունենա անելու: Նա նաև պետք է շահագրգիռ լինի, որպեսզի ունենա շատ հզոր ոլորտային փոխնախարարներ, որպեսզի կարողանան պատշաճ աշխատել, և դրանից ոլորտը չտուժի: Նախկինում կար մշակույթի նախարարություն, նախարարությունն ուներ մի քանի տեղակալ, վարչություններ, վարչության պետեր, բաժնի պետեր և այլն,  բայց քաղաքականություն չկար»:

Ինչ վերաբերում է այն քննադատություններին, որ բազմաթիվ մարդիկ մնում են առանց աշխատանքի, նա նշեց, որ նախարարություններում հիմնականում քաղծառայողներ են աշխատում, որոնց համար օրենքով սահմանված են որոշակի իրավասություններ` աշխատանքից դուրս մնալու դեպքում: «Նրանք տեղափոխվում են կադրերի աշխատանքային ռեզերվ, նաև որոշակի շրջան վարձատրվում են: Կարծեմ շուտով պետք է հստակ բոլոր աշխատակիցների թիվը հրապարակվի, ովքեր այս օպտիմալացումների հետևանքով գործազուրկ են դարձել: Կառավարությունն ունի հայեցակարգ, թե վերավարժանքների, վերապատրաստման միջոցով ինչպես լուծել այդ հարցերը»,- ասաց նա:

Թուխիկյանը նշեց, որ օպտիմալացման նպատակը կրկնվող հաստիքների վերացումն է: «Ի իմիջիայլոց, եթե կհիշեք, տարիներ առաջ մշակույթի, սպորտի և երիտասարդության նախարարությունը մեկ էր, հետո դրանք բաժանվեցին ու դարձան առանձին նախարարություններ»,- նշեց նա:

Դիտարկմանը` ստացվում է, որ արդյունավետ չէր որպես մեկ նախարարություն գործելը, այդ պատճառով էլ առանձնացվեց, Թուխիկյանն ասաց. «Ոչ, հարցը դա չէր: Ես իմ կարծիքը կարող եմ ասել, հարցն այն էր, որ հարկավոր էր, որ նոր հաստիքներ ստեղծվեն: Մենք գիտենք, թե պետական ՊՈԱԿ-ները, պետական հիմնարկները հիմնականում ինչի էին ծառայում: Պետական հիմնարկներում ծառայող մարդիկ հիմնականում դառնում էին այն էլեկտորատը, որը պիտի սպասարկեր իշխող կուսակցությանը»:

Թուխիկյանը հավելեց, որ իր կարծիքով, եթե նպատակ կա, սուպերնախարարությունն էլ կարող է շատ լավ աշխատել, փոքր նախարարությունն էլ: «Խնդիրը նպատակ դնելն ու տեսլական ունենալն է, քաղաքականություն մշակելն է: Այսինքն` ձևի մեջ բովանդակություն մտցնելը: Եթե կա բովանդակություն, որևէ ձևով հնարավոր է աշխատել՝ լինի մեծ, թե փոքր նախարարություն, եթե անգամ նախարարություն չլինի»,- եզրափակեց նա: