Տնտեսությունը պետք է զարգանա աստիճանաբար, ոչ թե հեղափոխությամբ. որպես նախկին լրագրող` Փաշինյանը հակված է տարբեր փոխաբերություններ կիրառել. Ա. Մարտինով

Տնտեսական հեղափոխություն անցկացնելու վերաբերյալ ՀՀ վարչապետ Նիկոլ Փաշինյանի հայտարարությունները վախեցնելու են բիզնեսին ու ներդրողներին: Նման ձևակերպումները պետք է հնչեցվեն զգուշորեն: Այս մասին Tert.am-ի հետ զրույցում ասաց Ռուսաստանի Դաշնության «Նորագույն պետությունների միջազգային ինստիտուտի» տնօրեն Ալեքսեյ Մարտինովը:

«Հեղափոխական ճանապարհով որևէ դրական փոփոխություն լինել չի կարող ո՛չ քաղաքականության, ո՛չ տնտեսության մեջ: Տնտեսությունը պետք է զարգանա աստիճանաբար, ցանկացած հեղափոխական կտրուկ փոփոխություն վատ հետևանքներ կունենա»,- ասաց Մարտինովը:

Ըստ նրա՝ Նիկոլ Փաշինյանը տնտեսագետ չէ և «հավանաբար լավ չի հասկանում, թե ինչի մասին է խոսում, ինչ ասել է տնտեսական հեղափոխություն»:

«Որպես նախկին լրագրող՝ նա, հավանաբար, հակված է տարբեր փոխաբերություններ օգտագործել, գեղարվեստական ձևակերպումներ տալ, բայց նա այլևս լրագրող չէ, ընդդիմադիր պատգամավոր չէ, վարչապետ է, և ցանկացած նման հայտարարություն պետք է անել զգուշորեն: Տնտեսական ոլորտին վերաբերող ամեն մի հայտարարություն կարող է ազդել ազգային արժույթի և այլնի վրա»,- նշեց Ալեքսեյ Մարտինովը:

Փորձագետը նկատեց, որ խաղի կանոնների կտրուկ փոփոխությունը տնտեսության ու բիզնեսի մեջ հեշտ գործ չէ, կորուստներն էլ անդառնալի են:

«Փաշինյանը մեղավոր չէ, որ այս ոլորտում մասնագետ չէ, բայց լավ կլիներ, որ փորձագետների, պրոֆեսիոնալների խորհուրդները լսեր, նույն նախագահ Արմեն Սարգսյանի, ով բավական փորձառու գործիչ է: Ամենայն հավանականությամբ Փաշինյանը չի լսում խորհուրդներ ու անում է անզգույշ հայտարարություններ»,- հավելեց Ա. Մարտինովը:

Պոպուլիստական են, նրա խոսքով, այն ձևակերպումները, որ տնտեսությունը պետք է ազատվի նախորդ իշխանությունների օլիգարխներից և այլն:

«Նման արտահայտություններ են անում «փողոցային հռետորները», և եկեք չմոռանանք, որ Փաշինյանը հենց նրանցից է եղել, բայց հիմա պետք է ավելի հավասարակշռված լինել:

 

Կան օրենքներ, կա Քրեական օրենսգիրք, դատարան, որոնք կորոշեն՝ ով է հարկեր վճարում, ով՝ ոչ: Հայաստանում այս ամենը կա, բայց սա պետք է աշխատի: Թե ինչումն է հեղափոխությունը, չգիտեմ: Երևի, լրանում է «թավշյա հեղափոխության» 1 տարին»,- նշեց Ալեքսեյ Մարտինովը:

Տնտեսագետն ասաց, որ ինչ անուն էլ ուզում ես տալ հեղաշրջմանը, հեղափոխությանը, դրանից էությունը չի փոխվում, այն իր հետ բերում է դժվարություններ՝ սոցիալական, տնտեսական հարթություններում, և մարդկանց ակնկալիքները, որ նրանք ավելի լավ են ապրելու, քան առաջ, վերածվում են հիասթափության:

«Լուրջ ջանքեր պետք է գործադրել, որ համակարգն աշխատի: Միայն ղեկավարության ջանքերը քիչ են, ողջ հանրությունը պետք է աշխատի: Փոխել մեկին, ումից հանրությունը հոգնել էր, մեկ այլ մարդով, ումից հանրությունը չի հոգնել, լուծում չէ: Սրանից ոչինչ չի փոխվել չէ՞: Ո՛չ աշխարհագրորեն, ո՛չ քաղաքականապես, ո՛չ տնտեսապես փոփոխություն չկա, և նորմալ է, որ մարդիկ կան, որոնք հիասթափվել են, կյանքը չի փոխվել: Հակառակը՝ ավելացել է կենցաղային, փողոցային հանցագործությունների թիվը:

Սա թաքցնել հնարավոր չէ, նույնիսկ զբոսաշրջիկներն են դա զգում, նկատում են, որ Երևանում գիշերով զբոսնելն անվտանգ չէ: Սրանք մանրուքներ են, բայց այս մանրուքներից է ձևավորվում ողջ պատկերը: Չեմ հերքում, որ մեկ տարի առաջ հրաշք էր թվում, որ բոլորին հոգնեցրած Սերժ Սարգսյանը կհեռանա: Նա, ըստ էության, չկատարեց իր խոստումը, հայտարարեց, որ որպես վարչապետ չի առաջադրվի, բայց հետո իբրև կուսակցության խնդրանքով առաջադրվեց, և սա մտահոգեց մարդկանց: Իշխանությունն անցավ Նիկոլ Փաշինյանին: Ամեն ինչ տեղի ունեցավ գունավոր հեղափոխության տարրերով, բայց ոչինչ չփոխվեց, մարդկանց կյանքը չփոխվեց, արդյունքը միայն հեղափոխությունն էր: Չկան նոր ծրագրեր, նոր գաղափարներ»,- մանրամասնեց Ալեքսեյ Մարտինովը: