«Գարնանը» հաջորդեց պատասխան «աշունը», կամ տոլեռանտության հետևանքները

Անշուշտ, Ֆրանսիայում 180-ից ավելի անմեղ մարդկանց զոհվելու փաստը ցավալի է ու ողբերգական, քանի որ այդ մարդիկ ոչ մի կերպ մեղավոր չէին իրենց երկրի իշխանությունների վարած սխալ քաղաքականության համար, սակայն փաստացի վճարեցին դրա համար իրենց կյանքի գնով: Ոչինչ հենց այնպես չի լինում, ամեն ինչ ունենում է իր նախապատմությունը, պատճառները: «Արաբական գարունները», որոնց կազմակերպիչների կազմում Ֆրանսիայի իշխանությունները միշտ առանցքային դեր են ունեցել, բնականաբար կարող էին ենթադրել, որ «գարնանը» կարող է հաջորդել պատասխան «աշունը»:

Ցավոք, այդպես էլ եղավ: Տարիներ շարունակ Ֆրանսիայի իշխանությունները ԱՄՆ-ի ազդեցության տակ գտնվելով՝ աջակցեցին Սիրիայի ընդդիմությանը Բաշար Ասադի դեմ պայքարելու հարցում, այն դեպքում, երբ Սիրիայի նախագահ Ասադը «Իսլամական պետություն» ահաբեկչական խմբավորման դեմ միակ ռեալ կանգնած ուժն է, և ԻՊ կոչվող այդ չարիքին հաղթելու ամենաիրատեսական ճանապարհը Ասադին աջակցելն է, այլ ոչ թե նրա դեմ պայքարելը: Ռուսաստանը դա գիտակցում է և անում, մնում է՝ Եվրոպան գիտակցի, կամ էլ պարզապես թուլացնի իր նկատմամբ ԱՄՆ-ի ազդեցությունը և գոնե որոշ հարցերում համագործակցի նաև Ռուսաստանի հետ՝ ելնելով իրենց իսկ շահերից, իրենց իսկ անվտանգության համար:

Կարծում եմ, այս ցնցումը կստիպի Ֆրանսիայի իշխանություններին վերանայել իրենց դիրքորոշումը Սիրիայի հարցում և չմոռանալ, որ ԱՄՆ-ի շահերը պաշտպանելուց բացի իրենք ունեն նաև սեփական ժողովրդի շահերը պաշտպանելու խնդիր, իսկ սեփական ժողովուրդը դառնում է իրենց իսկ վարած սխալ քաղաքականության արդյունքում տեղի ունեցած ահաբեկչությունների զոհը: Կարելի է ակնկալել, որ ելնելով սեփական երկրի անվտանգության խնդրից, մոտ ապագայում կնկատենք Ֆրանսիայի իշխանությունների դիրքորոշման փոփոխություն՝ Սիրիայի և Մերձավոր Արևելքի հետ կապված հարցերում:

Տեղի ունեցած ողբերգությունը մյուս կողմից էլ կարելի համարել չափից ավելի մեծ տոլեռանտության հետևանք: Կարծում եմ, շատերը կհամաձայնվեն, որ Ֆրասիայի հանդուրժողականությունը իր երկիր լցվող միգրանտների, մասնավորապես մահմեդականների հանդեպ, անցել էր անհրաժեշտ սահմանները: Այս հարցում նույնպես Ֆրանսիայի իշխանությունները մտածելու շատ բան ունեն:

Կարեն Վարդանյան

Past.am, վերլուծաբան