Իրան չի հետաքրքրում բյուջեի մուտքը, հետաքրքրում է՝ էնքան թանկ լինի, որ ոչ ոք չծխի. Փաշինյանը բարկացավ Թորոսյանի վրա

Past.am

Կառավարության այսօրվա նիստում Հարկային օրենսգրքում փոփոխությունների եւ հարակից նախագծերի քննարկման ժամանակ վարչապետ Նիկոլ Փաշինյանը բարկացավ առողջապահության նախարար Արսեն Թորոսյանի վրա:

Մասնավորապես, Արսեն Թորոսյանը նշեց, որ ստիպված են քննարկել մի օրինագիծ, որն այսօր առավոտյան են ստացել. «Հիմա պետք է քվեարկենք մի նախագիծ, որն այսօր առավոտյան ենք ստացել, բայց դրանում փոփոխություններ են արվել, օրինակ՝ ակցիզային հարկի փիլիսոփայությունը այսպես ասած դեֆորմացվել է: Մեկը շաքարի հարկ կոչեցյալն է, որը փաստացի արդեն գազավորված ըմպելիքների հարկ է: Սա արդեն ոչ մի կապ չունի առողջապահական խնդիր լուծելու հետ: Գազավորված, շաքար չպարունակող, այլ այլ նյութեր պարունակող հյուղթերը նույնքան վնասակար են, որքան հանքային ջրերը: Այսինքն այդտեղ վնասակար է միայն CՕ2 գազը»,-ասաց Թորոսյանը նկատելով, որ ծխախոտի (խոսքն էլեկտրոնային ծխախոտի մասին է-խմբ) ակցիզային հարկը նախորդ օրինագծում մոտ 8 հազար դրամ էր, հիմա 4 անգամ իջել է:

Այս ելույթը զայրացրեց վարչապետ Փաշինյանին. «8 ամիս քննարկում ենք, պարզվում է, էլի տեղյակ չենք քննարկումից: Ինչու է այդպես»,-հարց ուղղեց նա:

Ֆինանսների նախարար Ատոմ Ջանջուղազյանը նշեց, որ այո, էլեկտրոնային ծխախոտի ակցիազային հարկը նվազել է, որովհետեւ ոլորտի մասնագետները նշում են, որ չնվազելու դեպքում կունենայինք հարկային մուտքերի նվազում:

Փաշինյանը դիմելով արսեն Թորոսյանին ասաց, որ իր ասած ձեւակերպումների տակ ընկնում են նաեւ հայկական արտադրության կոմպոտները. «Մենք գյուղացիների մթերման մասին պե՞տք է մտածենք, թե չպետք է մտածենք: Մենք կառավարություն ենք եւ չենք կարող լինել միայն առողջապահության նախարարություն կամ միայն ֆինանսների նախարարություն: Ամեն ինչի մասին էլ պետք է մտածենք: Սննդի ոլորտում մենք էնքան խնդիրներ ունենք, օրինակ սպիտակ հացը մարդկանց առողջությանը վնաս է: Բռնենք նենց անենք, սպիտակ հացը 6 անգամ թանկանա, մարդիկ չուտեն կամ քիչ ուտեն»,-ասաց Փաշինյանը:

Նա նշեց, որ երկրում պետք է մտածված հակածխախոտային քաղաքականություն տարվի, որովհետեւ դա նաեւ հարկ վճարող ամենաարդյունավետ ճյուղերից է:

Արսեն Թորոսյանի դիտարկմանը, որ իրենց հետ չեն խոսել ակցիզային հարկը նվազեցնելիս, Փաշինյանը կտրուկ արձագանքեց. «Դուք տեղյակ չէի՞ք: Որ հ/կ-ն ասում է՝ մեզ չեն ներգրավել քննարկումների մեջ, ես հասկանում եմ, որ նախարարն է ասում՝ մեզ չեն ներառել քննարկումների մեջ, ինձ համար անհասկանալի է:  Անձամբ ես ձեզ հետ 5 անգամ այս թեմայով խոսակցություն եմ ունեցել: Իսկ ո՞վ է ասել, որ երեկ երեկոյան պետք է իմանայիք այս փոփոխության մասին:

Եկեք ծխախոտի արտադրությունը ՀՀ-ում վաղվանից արգելենք, տեսնենք ինչ կլինի: Ինչի՞ չեք առաջարկում արգելել ծխախոտի օգտագործումն ու արտադրությունը ՀՀ-ում: Իրան չի հետաքրքրում բյուջեի մուտքը, իրան հետաքրքրում է՝ էնքան թանկ լինի, որ ոչ ոք չծխի»,- ասաց վարչապետը:

Առողջապահության նախարարն էլ արձագանքեց. «Ինձ էլ է հետաքրքրում, որ հարկային մուտքեր լինեն, որ մեր ոլորտին էլ հատկացումներ լինեն»:

Վարչապետը հայտարարեց, որ կառավարության կողմից Հարկային օրենսգրքի ընդունումից հետո այն շարունակում է նախագիծ մնալ, եւ կոնկրետ այդ հարցը նորից հավելյալ կքննարկվի: