Նախաձեռնության հետևում թաքնված է Երևանի քաղաքականությունը ուղղորդելու Բրյուսելի ծրագիրը

russian.rt.com-ը «Ձեռնասուն կառավարում. Եվրամիությունը փող է տրամադրել Հայաստանի պետական ծառայողների պատրաստման համար» վերնագրով հոդվածում գրում է, որ Եվրախորհրդում մտադիր են ֆինանսական հատկացում կատարել Հայաստանի քաղաքացիական ծառայողների վերապատրաստման համար: Ինչպես նշված է մրցույթի հայտարարությունում, նախագիծն ուղղված է «Հայաստանում եվրոպական չափանիշներին համապատասխան ժողովրդավարության ամրապնդմանը»: Փորձագետների կարծիքով, այս նախաձեռնության հետևում թաքնված է Երևանի քաղաքականությունը ուղղորդելու Բրյուսելի ծրագիրը, քանի որ ներկայումս Հայաստանի իշխանությունները ձգտում են հավասարակշռություն և լավ հարաբերություններ պահպանել ինչպես Մոսկվայի, այնպես էլ Բրյուսելի հետ: Ավելի վաղ Հայաստանի վարչապետ Նիկոլ Փաշինյանը հայտարարել էր, որ Հայաստանը պատրաստ է համագործակցել ինչպես Եվրամիության, այնպես էլ ԵԱՏՄ գործընկերների հետ: Երևանում Եվրոպայի խորհրդի ներկայացուցչությունը ներկայումս փնտրում է կապալառուների, որոնք տեղի իշխանություններին խորհրդատվություն կտան քաղաքական և իրավական հարցերով, ինչպես նաև քաղաքացիական ծառայողների դասընթացներ կանցկացնեն: Ինչպես նշված է մրցութային հայտարարությունում, ծրագիրը նախատեսում է իրականացնել «Հայաստանում դեմոկրատական զարգացում, ապակենտրոնացում և լավ կառավարում»: Ծրագրի իրականացմանն աջակցելու նպատակով Եվրոպայի խորհուրդը նախատեսում է ընդգրկել մինչև 30 կապալառուների, որոնք պետք է ունենան ժողովրդավարական պետության և կառավարման հիմունքների գիտելիքների և փորձի բավարար մակարդակ: Ծրագրի իրականացման համար նախատեսվում է ծախսել 1,5 մլն եվրո: Ծրագրի կոնկրետ նպատակն է՝ եվրոպական չափանիշների հիման վրա Հայաստանում իրավական դաշտը ամրապնդելով՝ նպաստել տեղական ժողովրդավարության կայացմանը, տեղական ինքնակառավարման մարմինների և պաշտոնատար անձանց կարողությունների զարգացմանը, տեղական մակարդակում պատասխանատվության խթանմանը և կայուն արդյունքների ձևավորմանը, ինչպես նաև աջակցել պետական և համայնքային մակարդակներում լավ կառավարման սկզբունքների պահպանմանը: Ավելի վաղ Եվրամիության ընդլայնման և հարևանության քաղաքականության հարցերով հանձնակատար Յոհաննես Հանը հայտարարել էր, որ Բրյուսելը մտադիր է մեծացնել Երևանի ֆինանսական օժանդակությունը՝ որպես պարգև ժողովրդավարության զարգացման հաջողության համար: Ըստ նրա, իրենք ունեն հատուկ բյուջետային գիծ, որն օգտագործվում է ժողովրդավարության զարգացման և օրենքի գերակայության հաստատման առաջընթացին նպաստելու համար: Բացի այդ, անցյալ տարի հայտնի դարձավ, որ Եվրամիությունը նախատեսում է 2017-ից մինչև 2021 թվականը 160 մլն եվրոյից ավելի ֆինանսական օգնություն հատկացնել Հայաստանին: ԵԽ-ի այս նախագծով փորձ է արվում ուղղորդել Հայաստանի քաղաքական ընթացքը դեպի Եվրոպա: Ըստ ԱՊՀ երկրների ինստիտուտի փոխտնօրեն Վլադիմիր Եվսեևի, նման նախաձեռնությունների օգնությամբ Բրյուսելը մտադիր է ազդել Երևանի վրա, առաջին հերթին առաջնորդվում է իր երկրի ազգային շահերով, հետևաբար, նման ծրագիրը Հայաստանի քաղաքականության վրա ազդելու համար ներքին գործերին միջամտության գործիք է: Նա հիշեցրել է, որ չնայած Եվրոպայից ֆինանսական օգնությանը, այս պահին Երևանը գործընկերություն չի փնտրում միայն Բրյուսելի հետ, և փորձում է բարիդրացիական հարաբերություններ պահպանել ԵԱՏՄ իր գործընկերների հետ: Ըստ վարչապետ Նիկոլ Փաշինյանի, իրենց աշխարհագրական դիրքը, խորը գիտելիքները, միջմշակութային հաղորդակցությամբ մարդկային ռեսուրսները և հավասարակշռված արտաքին քաղաքականությունը երկրի մրցունակության հիմքն են, և Հայաստանը պատրաստ է դառնալ կամուրջ, որը կապում է ԵՄ-ն և ԵԱՏՄ-ն, եթե դա ընդունելի է երկու կողմերի համար էլ:

ԵՄ-ն առաջին անգամ չէ, որ փորձում է մասնակցել նախկին ԽՍՀՄ երկրներում պաշտոնյաների վերապատրաստմանը:

Օրինակ, 2017 թվականին Եվրոպական հարևանության քաղաքականության շրջանակներում Բրյուսելը ուկրաինական քաղաքացիական ծառայողների օտար լեզուներով վերապատրաստման համար հատկացրել էր 1.2 մլն եվրո: Եվրոպան նաև նախատեսում է ծախսել 2.8 միլիոն եվրո Մոլդովայում պետական մարմինների կառուցվածքի փոփոխման և երկրի տարածքային բաժանման բարեփոխումներին աջակցելու համար: Ռազմավարական կոմունիկացիաների կենտրոնի նախագահ Դմիտրի Աբզալովը կարծում է, որ Եվրամիության հետաքրքրությունը Հայաստանի նկատմամբ կապված է երկրի աշխարհաքաղաքական դիրքի հետ, կարևոր է, որ Հայաստանը դառնա Եվրոպայի ռազմավարական գործընկեր, որն էլ կամրապնդի նրա դիրքերը Հարավային Կովկասում, ավելին, Բրյուսելը մտահոգված է Մոսկվայի հետ Երևանի համագործակցությամբ, այդ թվում` զենքի գնման հարցերում: Անցյալ տարի տեղի ունեցած ամենամյա ասուլիսում Ռուսաստանի նախագահ Վլադիմիր Պուտինը շեշտել է, որ Հայաստանը շարունակում է մնալ Ռուսաստանի ամենալուրջ դաշնակիցը, և հայ ժողովուրդը Անդրկովկասում ռուս ժողովրդի ամենալավ դաշնակիցն է: Իր հերթին Հայաստանի նախագահ Արմեն Սարգսյանը հայտարարել է, որ իր դժվարին ժամանակներում Հայաստանը զգացել է Ռուսաստանի աջակցությունը և պետք է շարունակի խորը և բարիդրացիական հարաբերություններ զարգացնել Ռուսաստանի հետ, բայց նաև պետք է խորացնել կապերը Եվրամիության, Չինաստանի, ԱՄՆ-ի և այլ երկրների հետ:

Կամո Խաչիկյան