Հոգեհանգիստ Էջմիածնում. Ի հիշատակ Ֆրանսիայի զոհերի եւ Արցախում զինված զինծառայողների

Նոյեմբերի 15-ին Ս. Էջմիածնի Մայր Տաճարում, Սուրբ եւ Անմահ Պատարագից հետո, նախագահությամբ Գարեգին Բ Կաթողիկոսի, կատարվեց հոգեհանգստյան արարողություն՝ Փարիզում (Ֆրանսիա) նոյեմբերի 13-ին տեղի ունեցած ահաբեկչական գործողությունների հետեւանքով զոհվածների, ինչպես նաեւ հայկական սահմանին օրեր առաջ մահացու հրազենային վիրավորում ստացած զինծառայողներ Վահե Վանոյանի եւ Միքայել Թորոսյանի հոգիների խաղաղության համար:

Հոգեհանգստյան կարգից առաջ խոսք ասաց Հայաստանի Աստվածաշնչային ընկերության գլխավոր քարտուղար Գերաշնորհ Տ. Եզնիկ արքեպիսկոպոս Պետրոսյանը:

Անդրադառնալով ողբերգական եղելություններին՝ Եզնիկ Սրբազանը մասնավորաբար նշեց.  «Ահաբեկչությունը դատապարտելի է եւ որեւէ կերպ չի կարող արդարացվել. այն քայլ չէ, որ ուղղված է որեւիցե բնակավայրի կամ մի ժողովրդի դեմ, ահաբեկչությունը մի քայլ է, որն ուղղված է Աստծու դեմ:

Վերջին 100-ամյակը նշանավորված է ինչպես Քրիստոնեական եկեղեցիների տարբեր հարանվանությունների միջեւ, այնպես էլ աշխարհում ապրող տարբեր ժողովուրդների ու կրոնների միջեւ մերձեցմամբ: Եվ այդ հարաբերությունների ընթացքում հաճախ է ասվում, թե՛ բոլորիս Աստված մեկ է, թե՛ տարբեր կրոնների, ժողովուրդների Աստված մեկ է: Եթե դա այդպես է, ապա ահաբեկիչները տվյալ դեպքում սպանեցին իրենց Աստծու անունը, որովհետեւ նրանք քայլ կատարեցին իրենց Աստծու դեմ, ով ստեղծել է մարդկությանը` Իր զավակներին, տվյալ դեպքում կարեւոր չէ ա՛յս, թե ա՛յն կրոնի ներկայացուցիչներին:

Հայ ժողովուրդը եւ Հայ Եկեղեցու հավատացյալները խոր ապրումով են զգում այն ցավը, որ Ֆրանսիայի ժողովուրդն այս օրերին ապրում է: Հայ ժողովուրդն այդ ցավը զգում է մասնավորապես երկու տարբեր պատճառներով: Առաջինն այն երախտագիտությունն է, որ մեր ժողովուրդն արդեն 100 տարիներ է, ինչ Եղեռնից մազապուրծ եղած հայորդիների փրկության եւ վերջիններիս հյուրընկալության ձեռնարկումների համար տածում է Ֆրանսիայի ժողովրդի նկատմամբ: Եղեռնից մազապուրծ եղած մեր ժողովրդի ամենամեծ խմբերը հանգրվանեցին եւ օթեւան գտան Ֆրանսիայում…:

Երկրորդը` ամենօրյա ողբերգությունն է, որ մեր ժողովուրդը հաճախակի ապրում է: Երբ իբրեւ թե ապրում է խաղաղ պայմաններում, սակայն ամեն օր զգում է, թե ինչպես է ահաբեկչության գնդակը խլում մեր այս կամ այն զավակի կյանքը: Մեր ժողովուրդն այսօր աղոթում է, ազգիս Վեհափառ Հայրապետի նախագահությամբ,  որպեսզի Աստված բացի Իր ձեռքերը, Իր մոտ ընդունի բոլոր նրանց, ովքեր զոհվեցին երեկ: Մենք աղոթելու ենք նաեւ վերջին ժամանակներում ահաբեկչության պատճառով սպանված բոլոր զոհերի համար, այդ թվում, մեր սահմանների վրա զոհված ամեն մի հայ զինվորի համար, նաեւ աշխարհում` Սիրիայում, Եգիպտոսում, Լիբանանում տեղի ունեցող ահաբեկչությունների եւ Սինա թերակզու վրա ահաբեկչության պատճառով ընկած ռուսական օդանավի զոհվածների համար»:

Արարողությանը ներկա էին ՀՀ Արտաքին գործերի նախարարի տեղակալ պրն. Կարեն Նազարյանը եւ ՀՀ-ում Ֆրանսիայի Հանրապետության արտակարգ եւ լիազոր դեսպան պրն. Ժան-Ֆրանսուա Շարպանտիեն: