Սամվել Սարգսյանը, Վիգեն Ստեփանյանը, Ռուդոլֆ Ղևոնդյանը, Շաքե Թուխմանյանը, Ժան և Արման Նշանյանները նոր՝ «Քարտ բլանշ» ֆիլմում. մանրամասնում է սցենարիստը

«Կյանքը շարունակ նորանոր փորձությունների է ենթարկում մեզ: Մենք կատարում ենք մեր ընտրությունը և կյանքը շարունակում է իր ճանապարհը` մեզ հրամցնելով մեր ընտրության պտուղները: Բայց ժամանակ առ ժամանակ կյանքը նաև քարտ բլանշ (carte blanche) է տալիս` հնարավորություն ընձեռելով ուղղել սխալներն ու ամեն ինչ սկսել նորից»… Այս խոսքերով սկսեց մեզ հետ զրույցը սցենարիստ Աստղիկ Սիմոնյանը՝ նոր բազմասերիանանոց գեղարվեստական ֆիլմի մանրամասները վստահելով Aysor.am-ին:

-Աստղիկ, ինչո՞ւ հենց «Քարտ բլանշ», ինչի՞ մասին է ֆիլմը: 

-24 մասից բաղկացած այս հեռուստատեսային ֆիլմը սիրո, ընկերության, դավաճանության, մարդկային ամենապարզ և ամենաբարդ փոխհարաբերությունների մասին է: Կերպարներից յուրաքանչյուրը կյանքում գոնե մեկ ճակատագրական սխալ ունի կատարած, որի պատճառով կյանքն այնպես չի ընթացել, ինչպես ինքը կուզեր: Նրանցից յուրաքանչյուրը քարտ բլանշի հնարավորության մասին է երազում, հույսով, որ վերջապես իր կյանքը կդասավորի այնպես, ինչպես երազել է իր պատանեկան մաքուր երազներում… Եթե մի բանի մասին շատ ես երազում, այն անպայման իրականություն է դառնում: Հերոսներից մեկը`Արիս Առնաուտյանը՝ մարդ, ում պատճառով սկսվեց այս պատմությունը, մարդ, ով կազմակերպեց սեփական մահը, որպիսի դրա միջոցով իր մերձավորներին ստիպի ապրել կատարսիս և ինքնամաքրվել՝ ի վերջո դառնում է այն մարդը, ով նրանցից յուրաքանչյուրին, այդ թվում նաև իրեն, հնարավորություն է ընձեռում օգտագործել ստացված քարտ բլանշը:

-Եվ ո՞վ է մարմնավորում Արիս Առնաուտյանին:

-Այդ կերպարը մարմնավորում է Վիգեն Ստեփանյանը: Չեմ թաքցնի, գրվելիս ուրիշ դերասան եմ նկատի ունեցել, սակայն հետագայում համագործակցությունը չստացվեց և կերպարը մարմնավորելու համար հրավիրվեց Վիգեն Ստեփանյանը: Շատ կարևորագույն կերպար է այս պատմության մեջ, ում ընտրությունը բավականին բծախնդրորեն է կատարվել:

-Է՞լ ովքեր են ներգրավված դերասանական, ստեղծագործական կազմում:

- Ֆիլմի ռեժիսորը Գրիգոր Վահրամյանն է, ով նաև բեմադրող օպերատորն է: Հրաշալի դերասանական կազմ է ընդգրկված: Այսպիսի կազմի մասին կերազի ցանկացած կինոարտադրող: Նրանք բոլորն էլ պրոֆեսիոնալ դերասաններն են: Թվարկել մի քանիսի անունը, չասելով մյուսներինը` անհնար է: Այնպես որ ձեր թույլտվությամբ կցանկանայի բոլորի անունները տալ:

-Իհարկե, շատ ավելի լավ:

-Ժան,Շաքե, Արման Նշանյաններ, Սամվել Սարգսյան, Ռուդոլֆ Ղևոնդյան, Վիգեն Ստեփանյան, Վիվյեն Բաստաջյան, Արսեն Գրիգորյան, Գայանե Բալյան,Նարինե Սուլթանյան, Աննա Գրիգորյան, Հովակ Գալոյան, Հայկ Սարգսյան, Ստեփան Ղամբարյան, Էվա Խաչատրյան, Սուրեն Առուստամյան, Սաթենիկ Հազարյան,Սուրեն Թումասյան: Նրանք այն դերասաններն են, ովքեր խաղում են ֆիլմում՝ Հայաստանում տեղի ունեցող իրադարձությունների հատվածում: Ամերիկյան հատվածի դերասանական կազմը փոփոխությունների է ենթարկվել, վերջնական կազմից հստակ տեղյակ չեմ… Ասեմ, որ մեր ֆիլմի պատմության կորիզը չորս ընկերներ են: Նրանք միասին են մեծացել` նույն բակում, ավելին՝ մեծանալով նրանք չեն բաժանվել, շարունակել են շփվել, ընկերություն անել: Նրանցից երկուսը, որոնց մարմնավորում են Սամվել Սարգսյանը և Վիգեն Ստեփանյանը, խոշոր բիզնեսմեններ են, Ժան Նշանյանը մարմնավորում է ԱԱԾ-ի գնդապետ Հայկ Ամիրխանյանին, Շաքե Թուխմանյանի հերոսուհին` Շաքե Մելիք-Ադամյանը, իր սեփական բանկն ունի: Ռուդոլֆ Ղևոնդյանը ոստիկանության գնդապետ է, Արման Նշանյանը` Ամերիկյան հետախուզության կապիտան, ով Հայաստան է գալիս հատուկ հանձնարարությամբ և, փաստորեն, նրա օգնությամբ էլ բացահայտվում է այս ամբողջ պատմությունը:

-Որքան հասկացա, ֆիլմի նկարահանումներն անցկացվել են Հայաստանում և ԱՄՆ-ում, այո՞:

-Նկարահանումների մեծ մասը` ֆիլմի 75 տոկոսը, արդեն նկարահանվել է Հայաստանում, իսկ 25 տոկոսը այս պահին նկարահանվում է Ամերիկայի Միացյալ Նահանգներում:

-Ամեն մի ծնունդ նախապատմություն ունի: Հետաքրքիր է, ինչպե՞ս, ե՞րբ ծնվեց նման ֆիլմ ստեղծելու գաղափարը:

-Թե երբ է ծնվել ֆիլմի գաղափարը, թերևս, կարողանան պատասխանել Ժան, Շաքե և Արման Նշանյանները: Սցենարիստին, սովորաբար, հրավիրում են նախագծին միանալ, երբ արդեն հստակ պատկերացնում են, թե ինչ են պատվիրելու: Ժան և Արման Նշանյանների կողմից ինձ պատմվել է փոքրիկ մի պատմություն` մոտավորապես երկու սերիայի սահմաններում: Հենց այդ պատմության հիման վրա էլ ստեղծվել է 24 սերիայից բաղկացած հեռուստաֆիլմի սցենարը:

-Սա կարելի՞ է սերիալ կոչել:

-Ավելի շատ իր ֆորմատով հեռուստատեսային բազմասերիանոց գեղարվեստական ֆիլմ է, այնպիսին, ինչպիսին «Գարնան 17 ակնթարթն» էր կամ «Նորին գերազանցության համհարզը»:

-Մեծամասամբ, ֆիլմերը «մեսիջ» են ունենում: Ո՞րն է այս ֆիլմի ասելիքը:

-Ամենաառաջին հարցին պատասխանելիս այս հարցին էլ մասամաբ անդրադարձա… Փող, հարստություն, մեծ հնարավորություններ, իշխանության, թվացյալ ամենակարողության զգացողություն, որոնց արդյունքում սկսում ենք կորցնել այն ամենակարևոր բաները, որոնք մարդուն արժեք ու տեսակ են տալիս: Մեր ֆիլմի հերոսներն այդպիսի ապագայի մասին չէին երազել ու ահա մի օր նրանք հասկանում են, որ այն, ինչ իրենց «վերև» է բարձրացրել, այսօր անդունդ է նետելու: Նրանցից յուրաքանչյուրը երազում է սպիտակ էջի` քարտ բլանշի մասին, որը հնարավորություն կտա ամեն ինչ շտկել: Այս պատմության մեջ դա նրանց հաջողվում է: Սակայն, ինչպես նշում է հերոսներից մեկը՝ պետք է արժանի լինել քարտ բլանշին:

-Աստղիկ, կայքերից մեկում կարդացի, որ ըստ ռեժիսորի՝ ֆիլմի հերոսը մոտեցվել է Վանո Սիրադեղյանի կեպարին: Նման բան կա՞:

-Որպիսի կարողանանք ասել, որ հերոսը նմանեցվել է ինչ-որ կերպարի, պետք է ուսումնասիրել այդ կերպարի կենսագրությունը, գործունեությունը: Ես նման բան չեմ արել և նման խնդիր էլ չի եղել: Պատմված պատմության մեջ կար դետալ, ընդամենը փոքրիկ, հավաստի դետալ, որը մեր ֆիլմում, սակայն, բոլորովին այլ լուծում է ստացել:

-Այս ֆիլմը կարծեք թե քաղաքական ենթատեքստ ունի: Չկա՞ մտավախություն, որ այն կընդունվի ժողովրդի, բայց ոչ իշխանության կողմից: Չէ՞ որ, որքան հասկացա, բավական նուրբ «լարեր» են շոշափվում:

-Մենք հատուկ քաղաքական ենթատեքստ ունեցող ֆիլմ չենք նկարել: Գուցե լինեն թեմաներ, որոնք ինչ-որ մեկին դուր գան, ինչ-որ մեկին` ոչ, բայց դա մեր կյանքն է: Ես պիես ունեմ Համազգային թատրոնում` «44 աստիճանի վրա», որի թեման արտագաղթն է` Հայաստանում իշխանությունների համար ամենատհաճ թեման: Եվ ի՞նչ: Ներկայացումն արդեն 12 տարի է խաղում են: Ի վերջո, չմոռանանք, որ արվեստը պետք է ամենակարևոր հարցերին պատասխանելուց բացի նաև ամենակարևոր հարցերը բարձրաձայնի:

-Ե՞րբ սպասենք ֆիլմի պրեմիերային, ո՞ր հեռուստաալիքով:

- Որքանով ես եմ տեղյակ, Ֆիլմի ցուցադրությունը կսկսվի փետրվարին: Թե որ հեռուստաընկերությամբ կցուցադրվի՝ կասի պրոդյուսերը, ես այդ հարցի պատասխանը չգիտեմ: