Առանձնազրույց եմ ունեցել Նիկոլ Փաշինյանի հետ. Վիտալի Բալասանյան

2020 թվականին սպասվող Արցախի նախագահի ընտրություններում արդեն ուրվագծվում են հիմնական թեկնածուները։ Արցախի անվտանգության խորհրդի քարտուղար, Արցախի հերոս, գեներալ–մայոր Վիտալի Բալասանյանի հետ NEWS.am-ը զրուցել է նրա թեկնածության, Հայաստանի իշխանությունների հետ նրա հարաբերությունների, ինչպես նաև վերջին շրջանում նրա անվան հետ կապված շրջանառվող տեղեկությունների մասին։

2020 թվականին սպասվող Արցախի նախագահական ընտրություններին հայտ եք ներկայացնելու նաև Դուք։ Դուք քաղաքական կոնսուլտացիաներ եք նախաձեռնել։ Այս պահին հստակ որոշում ունե՞ք՝ մասնակցելու եք, թե ոչ։

Ոչ, ասեմ ավելին, որ ժամանակին, երբ այդպիսի լուրեր տարածվեցին՝ իմ կողմնակիցների, համակիրների, իմ մարտական  և աշխատանքային ընկերների կողմից, ես ընդունեցի այդ առաջարկը և խոստացա իմ ընկերներին, որ այդ կոնսուլտացիաները կանցկացնեմ։ Դրանք հիմա էլ շարունակվում են՝ Ղարաբաղում հանդիպել եմ թե՛ խորհրդարանական, թե՛ արտախորհրդարանական քաղաքական ուժերի, անհատների, երիտասարդների, մեծահասակների, մեր ավագ սերնդի հետ, նաև Հայաստանի Հանրապետությունում։ Իմ որոշումը միանշանակ արդեն կայացրել եմ։

Բակո Սահակյանի հետ քննարկե՞լ եք Ձեր թեկնածության հարցը։

Քանի որ ես ծառայում եմ, աշխատում եմ նախագահական ապարատում, հանդիսանում եմ Անվտանգության խորհրդի քարտուղարը,  թե՛ բարոյական, թե՛ պաշտոնական առումներով իրավունք չունեմ տեղյակ չպահել մեր նախագահին։ Իհարկե, մենք քննարկել ենք, նա տվել է իր համաձայնությունը։ Նախագահը պատրաստ է ոչ թե աջակցելու որևէ մեկին, այլ՝ պահպանելու սահմանադրական կարգը, օրենքները, որպեսզի 2020 թվականին լինեն անաչառ, ազնիվ ընտրություններ։ Համոզված եմ, որ նախագահը կկարողանա իր խոստումը կատարել։

Արցախում ժամանակից շուտ իշխանափոխության որևէ հիմք կա՞ այս պահին։

Ոչ, ընդհանրապես ժամանակից շուտ իշխանափոխություն չի լինելու, թույլ չենք տալու։ Եվ նրանք, ովքեր կփորձեն օրենքը խախտել, խստագույնս պատասխանատվության կենթարկվեն օրենքի առաջ։ Ղարաբաղում հեղափոխություն չի լինելու։ Ղարաբաղում հեղափոխություն եղել է 1988-1991 թվականներին։ Այն ժամանակ էլ մենք ամեն ինչ արել ենք ըստ օրենքի։ Այս տարածքում մենք հարգում ենք օրենքը։

Նշեցիք, որ Հայաստանում էլ եք քննարկումներ ունեցել քաղաքական կոնսուլտացիաներ։ «Քաղաքացիական պայմանագիր» կուսակցության ներկայացուցիչների հետ հանդիպե՞լ եք։

Անհատների հետ ունեցել ենք հանդիպումներ, այս օրերին «Քաղաքացիական պայմանագիր» կուսակցության պատգամավորները Արցախում են։ Արդեն իսկ իմ հետ կա պայմանավորվածություն։ Ե՛վ իմ առաջարկությամբ, և՛ այդ պատգամավորների առաջարկությամբ կունենանք հանդիպումներ։ Առանձնազրույց ենք ունեցել Հայաստանի Հանրապետության վարչապետի հետ։ Վարչապետը միանշանակ մեր երկխոսության ժամանակ խոստացել է չխառնվել Արցախի ներքաղաքական հարցերին, օգնել, որ Արցախում կայանան արդար ընտրություններ, որևէ մեկին չի սատարելու և որևէ թեկնածու չի ունենալու։ Անձամբ ես լինելու եմ Արցախի ժողովրդի թեկնածուն։ Ժողովուրդը ինձ ձայն կտա, ես կծառայեմ իմ ժողովրդին։ Եվ կապացուցեմ, որ ես այս երկրի լավագույն զինվորներից մեկն եմ։

Աշնանը Նիկոլ Փաշինյանը ելույթում հորդորել էր Արցախի իշխանություններին, հրամանատարներին չխառնվել Հայաստանի ներքին գործերին։ Մամուլը գրեց, որ դա նաև Ձեզ էր ուղղված։ Ասում են՝ Ձեր և Նիկոլ Փաշինյանի մեջ հակասություն կա, և պարբերաբար տեղեկություններ են տարածվում, որ դուք շուտով հրաժարական եք տալու։ Դուք այս ընթացքում նման ցանկություն ունեցե՞լ եք, կամ Ձեզ առաջարկել կամ պարտադրե՞լ են, որ հրաժարական տաք։

Օդում կախված լուրերին չեմ խառնվում։ Եթե Նիկոլ Փաշինյանի ելույթը կամ հայտարարությունը վերաբերվել է կոնկրետ անձանց, ես չլսեցի իմ անուն ազգանունը։ Համոզված եմ՝ դա ինձ չի վերաբերվում։ Եթե վերաբերվեր, մենք Նիկոլ Փաշինյանի հետ ոչ թե վարչապետ եղած տարիներից ենք մոտիկ, այլ  երկար տարիների ծանոթներ ենք։ Եվ  այդպիսի որևէ հայտարարություն, հանձնարարություն կամ որևէ պայմանավորվածություն թե՛ իմ հետ, թե՛ Արցախի Հանրապետության նախագահի հետ չի եղել,  ես չեմ լսել, տեղյակ չեմ, որ Հայաստանի վարչապետը հորդորել է ինձ հրաժարական տալ։ Ինձ պաշտոնի նշանակել է Արցախի Հանրապետության նախագահը։ Եթե ես նորմալ չաշխատեմ, ապա Արցախի նախագահը ինձ կազատի պաշտոնից։ Որևէ մեկի հորդորով ես հրաժարական չեմ տա։

Այս պահին շրջանառվում են մի քանի հնարավոր թեկնածուների անուններ, ո՞ւմ եք տեսնում Ձեզ մրցակից։

Դեռևս ոչ մեկին։ Ցանկացած մարդու սահմանադրական իրավունքն է առաջադրվել։ Ես սիրով կսեղմեմ ժողովրդի կողմից ընտրված ցանկացած մարդու ձեռքը, կշնորհավորեմ։ Ընտրված նախագահը, եթե ցանկանա, որ ես իր ապարատում աշխատեմ, կտամ իմ համապատասխան պատասխանը։ Քիչ առաջ ասում էիք՝ Արայիկ Հարությունյան, Աշոտ Ղույլան. դեռևս այդ մարդիկ իրենց կուսակցությունները  համագումար անցկացնեն, և համագումարում հնչեցնեն թեկնածուների անունները։ Ավելի լավ, ավելի բարի. մրցակցությունը լավ կլինի, ժողովրդի ընտրությունն էլ՝ ավելի հետաքրքիր։