«Հա­մա­կար­գը չի կա­րե­լի խարխ­լել». Բաբ­կեն Պի­պո­յանն ան­թույ­լատ­րե­լի է հա­մա­րում գյուղնախարարության նա­խա­գի­ծը

«Իրազեկ և պաշտպանված սպառող» հ/կ նախագահ Բաբկեն Պիպոյանը լիահույս է, որ գյուղատնտեսության նախարարության ներկայացրած նախագիծը կյանքի չի կոչվի: Խոսքն այն նախագծի մասին է, ըստ որի՝ «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի լիազոր մարմին հանդիսացող Սննդամթերքի անվտանգության տեսչական մարմնի փոխարեն լիազոր մարմին պետք է հանդիսանա ԳՆ-ն:

«Փաստի» հետ զրույցում Բաբկեն Պիպոյանը շեշտեց, որ շատ կարևոր է հաշվի առնել լաբորատորիայի առանձնահատկությունը: «Լաբորատորիան ծառայություն է մատուցում և գործառույթ է իրականացնում հիմնականում երեք ուղղություններով: Այն վերահսկողական ծառայություններ, ուսումնասիրություններ է իրականացնում անասնաբուժության, բուսասանիտարիայի և սննդամթերքի անվտանգության ոլորտում: Ինքս մշտապես ասել եմ, որ վերահսկողության ներքո գտնվող պետական լաբորատորիան կաշկանդված է ազատ գործել սննդի մասով: Եվ այդ իմաստով պետք է քայլեր ձեռնարկել: Բայց, մյուս կողմից, վերահսկող մարմնի համար առաջնային է անասնաբուժության և բուսասանիտարիայի բնագավառում վերահսկողական գործիքներ ունենալը: Եվ եթե այս ծառայությունը վերցնում ես նրա ենթակայությունից, դա անուղղակի նշանակում է, որ թուլացնում ես պետական վերահսկողությունը: Բացի այդ, գիտենք, որ ԳՆ-ն հենց ինքն անասնաբուժության ոլորտում պետությանը ծառայություն է մատուցում, այսինքն, պատվաստումներ է իրականացնում և այլն, և այլն: Եվ երբ լաբորատորիան փոխանցում ես գյուղնախարարությանը, ստացվում է՝ այն ծառայություն է մատուցում, և ինքն իրեն վերահսկում է, և սա այն դեպքում, երբ վերահսկող մարմինն այլ մարմին պետք է լինի»,-ասաց Բ. Պիպոյանը՝ շեշտելով, որ սա մեծագույն խնդիր է:

«Որևէ կերպ չի կարելի անասնաբուժությունը և բուսասանիտարիան վերցնել լիազոր մարմնից՝ ՍԱՏՄ-ից: Այլ հարց է՝ քննարկել սննդի ոլորտը: Եթե քննարկվի, որ նշված ոլորտում միայն պետական մոնիթորինգներ պետք է իրականացնի և որևէ այլ ծառայություն չմատուցի, համամիտ կլինեմ: Համամիտ կլինեմ նաև, եթե քննարկվի, օրինակ, ընդհանրապես պետական սննդի լաբորատորիա չունենալը կամ ունենալը՝ այլ մարմնի կազմում: Բայց այս իմաստով էլ պետք է հասկանանք, որ որոշակի ռիսկ է առաջանում: Հարց է, թե վերակառուցումն ու վերազինումն ի՞նչ ընթացք կստանա»,-ասաց նա՝ օրինակ բերելով այն, որ տարբեր մարմինների կազմում լաբորատորիաներ կան, բայց միայն առողջապահության և սննդի անվտանգության մասով են հաջողություններ գրանցվել:

«ԳՆ-ն իր ենթակայության տակ բազմաթիվ լաբորատորիաներ է ունեցել, բայց ինչո՞ւ վերջին տարիներին հզորացում չի եղել, որովհետև ֆինանսավորողների համար համակարգն ամբողջական է հետաքրքիր: Լավագույն լուծումն այս դեպքում մեկ ամբողջական համակարգ ունենալն է, որտեղ ՍԱՏՄ-ի համար անասնաբուժությունը և բուսասանիտարիան կմնան, իսկ սննդի մասով հստակ ժամանակում լաբորատորիաների փորձաքննությունները հաստատելու՝ ռեֆերենտ լաբորատորիա դառնալու գործընթաց կլինի: Արդեն որ մարմնի կազմում կլինի՝ էական չէ: Բայց այդ առումով խոսքը, կրկին շեշտեմ, միայն սննդի բլոկի մասով է, որովհետև լաբորատորիան դիտարկել ամբողջական, բայց չդիտարկել այն, որ նշված ուղղություններից յուրաքանչյուրն առանձին կարող է մեկ լաբորատորիա լինել, ուղղակի անթույլատրելի է: Նման կարևոր խնդիրներին ուղղակի չի կարելի մատների արանքով նայել, և անթույլատրելի է նման նախագիծ ունենալը: Ուղղակի տրամաբանություն չկա ծառայություն մատուցողին տալ այն լաբորատորիան, որը հաստատելու է, թե ծառայություն մատուցվե՞լ է, թե՞ ոչ»,-ասաց մեր զրուցակիցը և նշվածի մասով պարզ օրինակ բերեց. «ԳՆ-ի ենթակայությամբ անասնաբույժը գնում և սրսկում է իրականացնում, իսկ հետո լաբորատորիան պետք է որոշի՝ սրսկումն արվե՞լ է, թե՞ ոչ: Հիմա պարզ է չէ՞, որ օբյեկտիվ փորձաքննության համար լաբորատորիան ԳՆ-ի կազմում չպետք է լինի: Հետևաբար, պետք է լինի վերահսկողի՝ ՍԱՏՄ-ի կազմում: Մեծ հաշվով, համակարգը չի կարելի խարխլել: Սիրողական ձևով ինչ-որ քայլեր ձեռնարկելն անթույլատրելի եմ համարում»,-նշեց Բ. Պիպոյանը՝ ընդգծելով նաև հնարավոր լուրջ ռիսկերի մասին, որոնք կարող են լինել ոչ միայն վերահսկողական մեխանիզմների, այլև, ընդհանրապես, պետությանը մատուցվող ծառայությունների մասով»:

ԱՆՆԱ ԲԱԴԱԼՅԱՆ