Հա­մա­տի­րու­թյուն­ներն այ­լևս չեն գան­ձե­լու աղ­բա­հա­նու­թյան վճար­նե­րը.իսկ ինչ­պե՞ս են կա­տար­վե­լու մու­ծում­նե­րը

Դեռևս ամիսներ առաջ աղբահանության վճարումները բնակիչները կատարում էին համատիրություններում, կամ էլ տներ էին այցելում աշխատակիցները, որոնք գանձում էին վճարները: Սակայն արդեն այս տարվանից աղբահանության գումարները պետք է վճարել ոչ թե համատիրություններում, այլ, այսպես ասած, թաղապետարաններում, բացի դա, քաղաքացիները կարող են վճարումներ կատարել վճարահաշվարկային միջոցներով:

Երևանի քաղաքապետարանի ոչ հարկային եկամուտների հաշվառման և գանձման բաժնի պետ Արթուր Հովհաննիսյանը «Փաստի» հետ զրույցում նշում է, որ վճարումների ժամանակ խնդիր կա՝ կապված միջնորդավճարների հետ.

«Այստեղ կա միջնորդավճարների խնդիրը: «Իդրամ» համակարգի միջոցով վճարում կատարելու դեպքում միջնորդավճար չի գործում: Աշխատանքներ են տարվում բոլոր բանկերի և վճարահաշվարկային միջոցների հետ, որպեսզի աղբահանության համար վճարման միջնորդավճարներ չգանձվեն: Այս հարցի լուծումն օրերի հարց է: Ավարտին են մոտենում նաև բանակցությունները «Հայփոստի» հետ: Մասնագետներն աշխատում են, որպեսզի այն ևս ինտեգրվի համակարգին: Ճիշտ է, այս պահին այն վճարումներ գանձում է, սակայն արվում է աշխատանք, որ միջնորդավճարներ չգործեն: 

Գաղափարն այսպիսին է. մարդիկ, որոնք տիրապետում են ժամանակակից տեխնոլոգիաներին, հնարավորություն ունեն էլեկտրոնային դրամապանակներով կամ բանկերով վճարումներ կատարել, իսկ այն բնակիչները, որոնք չեն տիրապետում այդ տեխնոլոգիաներին՝ թոշակառուները և այլոք, «Հայփոստում» կարողանան կատարել իրենց վճարումները, ընդ որում՝ սա վերաբերում է նաև գույքահարկին և հողի հարկին», ասում է պարոն Հովհաննիսյանը՝ ընդգծելով, որ համատիրությունների և նրանց աշխատակիցների կողմից վճարների ընդունումը որպես ռիսկ էր գնահատվում:

Դիտարկմանը, որ, օրինակ, բնակիչը հստակ գիտի, որ ամեն ամիս վճարում է իքս գումարը, բայց միևնույն ժամանակ հարց է առաջանում՝ բանկի աշխատակիցը արդյո՞ք կարող է համակարգի միջոցով տեսնել, թե կուտակված որքա՞ն պարտք ունի վերջինս, պարոն Հովհաննիսյանը նշում է, որ ներկայումս չորս բանկ կա, որտեղ վճարումներ կատարելուց թե՛ բանկի աշխատակիցը, թե՛ բնակիչը կարող են իմանալ՝ որքան գումար պետք է վճարի կամ պարտք ունի կոնկրետ հասցեի բնակիչը:

«Երբ քաղաքացին ներկայացնի հանրային ծառայությունների համարանիշը և ևս մի քանի տվյալներ, ներկայումս չորս բանկում և վճարահաշվարկային համակարգերում նա կարող է իմանալ, օրինակ, իր պարտքի չափը և կատարել վճարումը: Քաղաքապետարանն այս մասով դեռ հայտարարություն չի տարածում, քանի որ այս պահին ոչ բոլոր բանկերում է այս գործառույթը հնարավոր: Կարճ ժամանակ անց այս հարցը ևս կլուծվի»: 

Պարտքերի, հավել յալ կատարած վճարումների մասին տեղեկանալու և, առհասարակ, աղբահանության համար վճարում կատարելու հնարավորություն այս պահին կարծես թե չունեն նաև առցանց վճարային համակարգերից օգտվողներն այն դեպքում, երբ, ինչպես նշում են մեր քաղաքացիները, մատի մի քանի շարժումով և հեռախոսի միջոցով կարելի է կատարել կոմունալ բոլոր վճարումները:

«Տեխնիկական չնչին խնդիրներ կան, ենթադրում ենք, որ առաջիկա օրերի ընթացքում ծրագրավորողներն այդ հարցերը կլուծեն, և այդ համակարգերով, ընդհուպ մինչև փողոցներում դրված տերմինալներով բնակիչը կարող է հանրային ծառայությունների իր համարանիշը մուտքագրելուց հետո տեղեկանալ իր անունով գրանցված գույքի հետ կապված վճարումների մասին, այդ թվում՝ աղբահանության և հողի հարկի: Սա՝ առաջին քայլով, իսկ հետո արդեն նախատեսվում է տեղական տուրքերի և վճարների մասին տեղեկատվության տրամադրումը: 

Երևանում չպետք է լինի վճարում ընդունող մի վայր, որտեղ այս համակարգը չգործի: Բանակցություններ ենք վարում «Վիվասելի», «Բիլայնի», «Upay»-ի գրասենյակների հետ, ովքեր վճարումներ ընդունելու իրավասություն ունեն՝ այս համակարգին ինտեգրվելու համար: Կա նաև պետական վճարումների համակարգ` «Ի-փեյմենթը»: Համակարգն այնպիսին է, որ երբ բնակիչը վճարում է, մի քանի վայրկյանի ընթացքում գումարն ավտոմատ երևում է մեր էլեկտրոնային բազայում»:

ԼՈՒՍԻՆԵ ԱՌԱՔԵԼՅԱՆ