Քըրք Քրքորյանի ցանկությունն էր վաճառել կազինոների իր բաժնետոմսերը ու հիմնադրամ ստեղծել. Վիգեն Հովսեփյանը՝ կտակի մասին

Tert.am-ի հետ զրույցում ՀՅԴ Բյուրոյի նախկին անդամ, ներկայումս ՀՅԴ Արևմտյան Ամերիկայի ատենապետ, դոկտոր Վիգեն Հովսեփյանը, պատասխանելով հարցին, թե Քըրք Քրքորյանի մահվանից հետո հայկական լոբբին  կթուլանա, դրական պատասխան տալով, հավելեց. «Արդարությունը  միշտ էլ   ծառաներ ունի, իսկ հայության  դատն ու մաքառումները  արդարագույն ուղի են: Ես կասկած չունեմ,  որ կգտնվեն   հայորդիներ, որոնք օրինակ առնելով Քըրք Քրքորյանի  մեծությունից, հեզությունից ու  առատաձեռնությունից, կորդեգրեն նույն ոճը ու իրենց նպաստը կբերին ազգին ու մարդկությանը»:

 -Պարո՛ն Հովսեփյան,  հաղորդվեց, որ  Քըրք Քրքորյանը ցանկություն է հայտնել, որ իր հուղարկավորությունը լինի փակ, նեղ մասնակցությամբ:  Ի՞նչ է Ձեզ հայտնի հրաժեշտի  արարողության   մասին:

-Երկուշաբթի հետկեսօրին մտերմիկ և անմիջական շրջանակի ներկայությամբ վերջին հրաժեշտը պիտի տրվի  Քըրք Քրքորյանին: Հաճախ ասում են, որ  բարերարություն անելիս   գումարի չափից  ավելի կարևոր է ոճը, կերպը, որով կատարվում է  բարերարությունը: Քըրք Քրքորյանը  այն Մեծ մարդն էր, որ ամենայն համեստությամբ  էր  կատարում  իր նվերները: Չեմ հիշում որևէ դեպք,  երբ նա իր   նվիրատվության  դիմաց ինչ-որ պահանջ ունենար  կամ ինչ -որ համբավ, ճանաչում  ակնկալեր դրա դիմաց:  Մեծ մարդ էր, ազնվական:

-Իր կտակը, որքանով մենք ենք տեղեկացված, դեռ բացված չէ, հնարավո՞ր է, որ ինչ-որ տեղեկություն ունենաք՝ որպես  հայ  համայնքի  ներկայացուցիչ:

-Պարոն Քրքորյանն ինքնամփոփ մարդ էր,  որ իր կանքն ապրում էր հանրային աչքից  և  ուշադրությունից  հեռու: Նախընտրում էր  իր ծրագրերը, նախաձեռնությունները, մանավանդ,  երբ դրանք  վերաբերում էին բարերարությանը, կատարել շատ նեղ և  մտերիմ շրջանակի  հետ միայն: Իր կտակն էլ այն գլխավոր խնդիրն ու նյութն է եղել, որի վերաբերյալ ինքը երբևէ չի արտահայտվել: Իր կտակի մասին միայն երկու բան է հայտնի:  Առաջինը, որ ցանկություն է հայտնել   լուծարելու իր սեփականությունները,  հատկապես՝ կազինոների  իր բաժնետոմսերը վաճառելու   և  կանխիկի վերածելու: Հավանաբար,  նույնը կկատարվի նաև  իր բոլոր սեփականությունների ու ինչքի  պարագայում՝ դրանք  կենտրոնացնելու  մեկ հիմնադրամում: Երկրորդ,  ճանաչելով  մարդուն,   իմանալով նրա առաջնահերթությունները , կասկած չունեմ, որ իր կտակը կլինի   ամենաազնիվ ու  ազնվական ոճի թելադրությամբ:

-Քըրք Քրքորյանը  հանճարեղ գործարար լինելուց բացի, նաև ազդեցիկ մարդ էր ԱՄՆ-ում: Ենթադրում եմ, որ նրա դիրքորոշումը ԱՄՆ-ում հայկական լոբբիի առաջ քաշած նպատակների ու խնդիրների հարցում կարող էր ամերիկյան իշխանությունների համար ոչ վերջին դերը ունենալ: Արդյո՞ք նրա մահվամբ հայ համայնքը չի  թուլանա, և արդյո՞ք նա ունի այս իմաստով փոխարինողներ և հետևորդներ ԱՄՆ-ում:

-Երևի կզարմանաք, եթե ասեմ, որ բիզնեսի աշխարհում ձեռք բերված առավելություններն ու հանճարը  Քըրք Քրքորյանը երբևէ չփորձեց գործիք դարձնել ինչ-որ ուղի կամ քաղաքականություն  թելադրելու համար: Այո՛, ուներ նախասիրություններ  և  ուներ քաղաքական ասպարեզի  մեջ իր նախընտրած մարդկանց : Բայց սա հնարավոր չէ մեկ հայացքով  հասկանալ: Քրքորյանը, որքանով ինձ է  հայտնի, Հանրապետական էր, բայց շատ մոտիկ բարեկամ ու աջակից, օրինակ` Սենատի գլխավոր Դեմոկրատ Հարրի Ռեյդին: Նաև  ի զարմանս շատերի, Օբամայի առաջին ընտրարշավի ժամանակ, ինչպես շատ շատերը,   Քրքորյանը  սատարեց  նրան:  Այո, ինչ խոսք, հայությունը  նահանջ  կարձանագրի   Քրքորյանի  նման  մեծ հայի կորստով:

 Արդարությունը  միշտ էլ   ծառաներ ունի, իսկ հայության  դատն ու մաքառումները  արդարագույն ուղի են: Ես կասկած չունեմ,  որ կգտնվեն   հայորդիներ, որոնք օրինակ առնելով Քըրք Քրքորյանի  մեծությունից, հեզությունից ու  առատաձեռնությունից, կորդեգրեն նույն ոճը ու իրենց նպաստը կբերեն ազգին ու մարդկությանը: