Ուղե­վար­ձի թան­կաց­ման մա­սին խո­սակ­ցու­թյուն­ներն ան­հե­թեթ են

Կրկին խոսակցություններ են շրջանառվում, թե ուղևորափոխադրման սակագինն առաջիկայում բարձրանալու է: Նման քննարկմանն ականատես եղանք քաղաքային տրանսպորտում, ինչը բավականին դժգոհություն էր առաջացրել ուղևորների շրջանում:

Հարցի մասին պարզաբանում ստանալու համար դիմեցինք քաղաքապետի մամուլի խոսնակ Հակոբ Կարապետյանին, որը հերքեց տեղեկությունը:

Մեր տեղեկություններով, օրերս «Ուղևորափոխադրողների միության» նախագահ Հրանտ Եղիազարյանը կրկին հայտարարել է, որ ուղևորափոխադրողները պահանջում են սակագինը դարձնել 200 դրամ, հակառակ դեպքում վարորդները գործադուլ կանեն:

Քաղաքային իշխանությունները, սակայն, չեն համաձայնել նման քայլի գնալ և, ամենայն հավանականությամբ, դրա պատճառով է թեման կրկին ակտուալ դարձել: Նշենք նաև, որ երկար դադարից հետո վերսկսվել է մայրաքաղաքի հանրային տրանսպորտի նոր ցանցի ներդրման հարցերով զբաղվող աշխատանքային խմբի աշխատանքը: Եվ գուցե դա էլ է նպաստել, որ գծատերերը նորից ուղեվարձի թանկացման թեման շրջանառության մեջ դնեն:

«Սպառողների խորհրդատվության կենտրոն» հ/կ նախագահ Կարեն Չիլինգարյանը, որ այդ աշխատանքային խմբի անդամ է, մեր թղթակցի հետ զրույցում նշեց, որ միջազգային փորձագետների կողմից մշակված փաթեթն արդեն առկա է, սակայն ուղևորափոխադրման սակագնի բարձրացման հարց չի կարող լինել:

«Ուղևորափոխադրող կազմակերպություններն ինչքան էլ հայտարարեն, որ վնասով են աշխատում, միևնույն է, չի կարող ուղեվարձը բարձրանալ: Նման խոսակցություններն անհեթեթություն են, իսկ եթե չեն կարողանում 100 դրամով ուղևորափոխադրում իրականացնել, թող գնան, հարևան Վրաստանից սովորեն, թե ինչպես են իրենք աշխատում:

Թբիլիսի քաղաքում սակագինը 100 դրամից էլ պակաս է, մոտ 90 դրամ է կազմում, շարժակազմերը նոր են, վաղուց արդեն գործում է միասնական վճարային համակարգ, միասնական էլեկտրոնային չվացուցակները նույնպես գործում են: Մեկ անգամ վճարելով՝ 1,5 ժամի ընթացքում ուղևորը կարող է մի քանի անգամ տրանսպորտային միջոցներից օգտվել:

Ինչ վերաբերում է մեր ուղեվարձին, ապա հաշվարկի ելակետը պետք է 100 դրամը լինի, իսկ վճարումը պետք է միասնական համակարգով իրականացվի, քանի որ ֆինանսական հոսքերը չեն կառավարվում, բավականին կոռուպցիոն հարցեր կան, որոնք պետք է կարգավորվեն»,- ասաց Կ. Չիլինգարյանը:

Կազմակերպության ղեկավարը նշեց նաև, որ տրանսպորտի թանկացման մասին խոսակցություններով և գործադուլի սպառնալիքներով գծատերերը փորձում են քաղաքային իշխանություններին սադրել, սակայն պետք չէ դրան ուշադրություն դարձնել: Պետք չէ նաև մտածել, թե որտեղից պետք է 150 կամ 200 միլիոն դրամ գումար հայթայթել նոր տրանսպորտային շարժակազմեր ներդնելու համար: Ամեն ինչ պետք է աստիճանաբար իրականացվի, որպեսզի քաղաքը կոլապսի մեջ չհայտնվի:

«Միկրոավտոբուսներ կան, որոնց հատակը պոկվում է, անձրևը լցվում է մարդկանց վրա, և այդ պայմաններում խոսում են ուղեվարձը թանկացնելու մասի՞ն: Մինչև ֆինանսական հոսքերը չկառավարվեն, հնարավոր չի լինի որևէ խնդիր լուծել: Հիմա գումարը վարորդն է հավաքում, և հասկանալի չի լինում, թե որքան գումար է շրջանառվում: Բացի այդ, կա նաև երթևեկության և ժողովրդի անվտանգության խնդիր: Մենք ականատես ենք լինում, թե ինչպես են վարորդներն իրար հետ կռվում, փորձում երթևեկի ընթացքում իրարից առաջ անցնել, ուղևոր փախցնել, հեռախոսով բանակցել, որ մեկը մյուսին չխանգարի և այլն: Ինչ վերաբերում է գործադուլով սպառնալուն, ապա դա ոչ թե վարորդներն են կազմակերպում, այլ իրենց ղեկավարները»,- ասաց Կ. Չիլինգարյանը:

ԱՐՄԻՆԵ ԳՐԻԳՈՐՅԱՆ