Ես չեմ կարող հիմա ասել՝ Սերժ Սարգսյանը որեւէ հանցագործության մեջ կմեղադրվի, թե ոչ. Նիկոլ Փաշինյան

Ընդհանրապես սխալ է, որ ասենք՝ ինչու այս մարդը, կամ այն մարդը բռնված չէ։ Այս մասին, այսօր՝ ապրիլի 19-ին, ֆեյսբուքյան ուղիղ եթերում քաղաքացիների հարցերին պատասխանելիս նշեց ՀՀ վարչապետ Նիկոլ Փաշինյանը՝ անդրադառնալով օգտատերերից մեկի հարցին, թե ինչու մինչև այս պահը որևէ մեղադրանք չի առաջադրվել Սերժ Սարգսյանին։

Ի պատասխան՝ Նիկոլ Փաշինյանն ասաց. «ՀՀ-ում կոռուպցիոն չարաշահումներով տասնյակ գործեր կան։ Այսօր կալանքի տակ է Մանվել Գրիգորյանը, Ռոբերտ Քոչարյանը, հետախուզման մեջ է բնապահպանության նախկին նախարարը, ԴԱՀԿ նախկին պետը։ Տասնյակ քրգործեր են հարուցված, որոնցով տասնյակ նախկին բարձրաստիճան պաշտոնյաներ են անցնում։ Ես եւ որեւէ մեկը երբեք խնդիր չի դրել, որ կոնկրետ այս անուն–ազգանունով մարդը պետք է դատվի՝ լինի Սերժ Սարգսյան, թե Ռոբերտ Քոչարյան։ Բայց մենք ասել ենք, որ բոլորը հավասար են օրենքի առջեւ։ Առավել եւս պետական բարձրաստիճան պաշտոնյաների նկատմամբ քրեական հետապնդում իրականացնելու համար պետք են շատ լուրջ հիմնավորումներ»։

Նա հիշեցրեց, որ երբ Մանվել Գրիգորյանը կալանքի տակ հայտնվեց, սոցցանցերում ասում էին՝ դուք ազգային հերոսին բանտ եք նստեցնում, պարզվեց՝ «սա հակազգային, հակապետական կառավարություն է, որ եկել են ազգային պայքարի ոգին ջարդեն»։

«Հետո մենք բացահայտեցինք ճշմարտությունը, եւ այլեւս որեւէ մեկը նման բան չէր ասում։ Բարձրաստիճան պաշտոնյայի դեպքում քննությունը պետք է շատ ամուր ու անբիծ լինի։ Ոչ մեկն արտոնյալ չի լինելու օրենքի առջեւ, բայց այս հարցում կա ավելի կարեւոր կոնտեքստ եւ մտավախություն։ Ես ձեր հարցադրման տակ տեսնում եմ հետեւյալը. դուք կարո՞ղ է Սերժ Սարգսյանի հետ թաքուն պայմանավորվածություններ ունեք եւ դրա համար իրեն ձեռք չեք տալիս։

Ես ասում եմ, որ ես չեմ կարող նման խաղիկների մեջ լինել։ Ես չեմ կարող հիմա ասել՝ Սերժ Սարգսյանը որեւէ հանցագործության մեջ կմեղադրվի, թե ոչ, ես քննիչ ու դատախազ չեմ, բայց այն պահից, որ մեղադրանքի համար անհրաժեշտ ու բավարար հիմքեր լինեն, դրա համար ոչ մի քաղաքական խոչընդոտ չի լինի»,-ընդգծեց վարչապետը։

Նա ընդգծեց, որ ժողովրդի թիկունքում ոչ մի կուլիսային համաձայնությունների չի գնացել եւ չի գնալու. «Եթե ես որեւէ մեկի հետ ձեր թիկունքում կուլիսային պայմանավորվածություն ունենամ, նշանակում է՝ ոչ թե հեղափոխությունն է անիմաստ, այլ իմ ամբողջ ապրած կյանքը։ Ես նման բաների չեմ գնա, որովհետեւ դա սկզբունքորեն անհամատեղելի է ինձ հետ։

Օրինակ՝ «Հյուսիս-հարավի» գործով արդեն քանի ամիս գործ է հարուցված։ Ենթադրվում է, որ այս գործով պետք է անցնեն պաշտոնյաներ։ Այս պահին դեռ չկան այդպիսիք, որովհետեւ գործի ծավալը մեծ է եւ մյուս կողմից ես պահանջել եմ, որ ամեն բան պետք է լինի օրենքով։

Ես ասում եմ՝ չի լինելու վենդետա, լինելու է արդարադատություն, մենք հետ ենք բերելու ժողովրդից թալանվածը։ Արդյոք ես գո՞հ եմ այդ պրոցեսից, ծավալներից, արդյունքներից, ոչ, չեմ կարող ասել, որ գոհ եմ։ Բայց կան նաեւ պատճառներ։ Օրինակ, երբ հրապարակվեցին Մանվել Գրիգորյանի տան խուզարկության կադրերը, դրանից հետո ով ինչ ուներ, հնարավոր տեղերում, կոռուպցիոներները իրենց տներում եղածները վերացրին։ Այս ընթացքում այնպիսի մարդկանց տանն է խուզարկություն եղել, որոնք հարյուր տոկոսով կոռուպցիոներ են, բայց իրենց տանը ոչինչ չի գտնվել»,-հայտարարեց Փաշինյանը եւ խնդրանքով դիմեց ժողովրդին. «Խնդրում եմ՝ ինձ դավադրությունների մեջ չկասկածեք»։