«Առաջին հերթին կար մեկ մեղավոր, որը Լևոն Տեր-Պետրոսյանն էր». հ/կ ղեկավար

Past.am

Մարտի 1-ի թիվ մեկ պատասխանատուն Լևոն Տեր-Պետրոսյանն է: Այս համոզմանն են «Երիտասարդ դեմոկրատների ազգային լիգա» հասարակական կազմակերպության ներկայացուցիչները, որոնք այսօր կայացած ասուլիսի ժամանակ խոսեցին 2008 թվականին տեղի ունեցած իրադարձությունների մասին:

Հ/կ-ի ներկայացուցիչ Կորյուն Գրիգորյանը նախ նշեց.

«Երևի թե բոլորիս համար պետք է պարզ լինի, որ առաջին հերթին կար մեկ մեղավոր, որը Լևոն Տեր-Պետրոսյանն էր: Այդչափ բազմություն հավաքելն ու հետո անկազմակերպ վիճակում թողնելը միանշանակ պետք է բերեր այն հետևանքներին, ինչը եղավ: Տեր-Պետրոսյանը շատ լավ էր տիրապետում մանիպուլյացիաներին, նա շատ լավ ստրատեգ էր և կարող էր գնալ զոհերի: Եվ այդ համատեքստում շատ բնական էր այն ամենն, ինչ կատարեց»:

Կ. Գրիգորյանը շեշտեց, որ ինքը ևս եղել է ցույցերին, շփվել է թե՛ ցուցարարների, թե՛ լիդերների հետ:

«Ցուցարարներից զատ՝ կային մարդիկ, որոնք կողմ էին, որ ամեն ինչ զարգանա ոչ թե խաղաղ ցույցերի, այլ ջարդուփշուր անելու, հաշվեհարդար տեսնելու սցենարով, ինչն էլ պետք է բերեր իշխանափոխության: Կային նաև կրիմինալ տարրեր, նաև գրպանահատներ»,-ասաց նա՝ հավելելով, որ այդ ամենին գումարվում էին նաև մարտի 1-ի առավոտյան տեղի ունեցած դեպքերը, որոնք մարդկանց ավելի էին հունից հանել:

«Եվ բացառապես Լևոն Տեր-Պետրոսյանն էր, որը կարող էր այդ ամենը պահել օրենքի շրջանակներում: Բայց դա իրեն արդյոք ձե՞ռք էր տալիս: Միանշանակ՝ ո՛չ: Եվ ինքն իրեն ապահովագրեց հայտնի մի տարբերակով՝ ասելով, որ իրեն տնային կալանք են տվել: Բարեբախտաբար, վերջերս հրապարակվեց ՄԻԵԴ-ի որոշումը, որը եկավ ապացուցելու այն փաստը, որ իրականում այդպես չի եղել, և նա ազատ է եղել իր տեղաշարժի հարցում: Ես այդ մասին 11 տարի պնդել եմ: Նա ունեցել է տեղաշարժի հնարավորություն, բայց ինչո՞ւ տեղաշարժվեր, ինչո՞ւ փոխեր իրավիճակը, երբ ամեն ինչ լավ սցենարով էր զարգանում: Այս ամենի հետ կապված փաստեր և գաղտնալսումներ կան, որոնցում կա նաև Ալեքսանդր Արզումանյանի (2008թ.-ին Ալեքսանդր Արզումանյանը Լևոն Տեր-Պետրոսյանի շտաբի պետն էր-խմբ.) մասնակցությունը»,-շեշտեց նա:

Արսեն Սիմոնյանն էլ հավելեց. «Այդ ամենից էլ ակնհայտ էր դառնում մարդկանց նկատմամբ իրենց վերաբերմունքը: Իրենց իսկ խոսքերով՝ ամեն ինչ կառավարվում էր, կառավարվում էին թե՛ թալանը, թե՛ բախումները: Եվ այս ամենի հետ մեկտեղ Լևոն Տեր-Պետրոսյանը շատ գոհ ու ինքնավստահ ասում էր, որ ամեն ինչ շատ լավ է, պետությունն ապահվում է իր անվտանգությունը, իսկ որդուն երկրից հեռացրել էր»:

Արսեն Սիմոնյանն էլ ընդգծեց, որ Լևոն Տեր-Պետրոսյանը կորցնելու ոչինչ չուներ, և կատարվածից միայն քաղաքական դիվիդենտներ շահեց:

Կ. Գրիգորյանն էլ ավելացրեց, որ շատ հստակ սցենարով են աշխատել. «Հաշվի առնելով նաև իր ռևանշիստական մոտեցումները՝ նա շատ շահեկան դիրքում էր: Առաջին տարբերակով ջարդուփշուր անելու ու այրելու միջոցով իշխանության գալու հնարավորություն կար: Եթե դա չհաջողվեր, երկրորդ տարբերակով, այդուհանդերձ, նա իշխանությունների հանդեպ լուրջ հաղթաթուղթ էր ունենում, քանի որ ստացվում էր, որ նրանք ժողովրդի նկատմամբ ուժ էին կիրառել: Բացի այդ, Լևոն Տեր- Պետրոսյանը շատ լավ գիտեր, որ իրավապահ մարմինները երբևէ թույլ չեն տալու, որ քաղաքում «разгром» լինի»,-ասաց նա՝ հավելելով, որ լինելով մարտի 1-ի գործողությունների կիզակետում, այն, ինչ տեսել են, սարսափելի էր:

«Ոստիկանության հետ բախումներն ամեն ձևով խրախուսվում էին: Չեմ կարծում, մարդիկ, ովքեր եկել էին խաղաղ ցույցի միջոցով ինչ-որ բանի հասնելու, երբևիցե իրենց թույլ կտային գնալ թալանի: Բայց կար մի զանգված, որը մեծագույն հաճույքով էր իրականացնում հրահանգները»,-ասաց Կ. Գրիգորյանը:

Ամփոփելով՝ նա հարց ուղղեց վարչապետ Նիկոլ Փաշինյանին:

«Ն. Փաշինյանը բազմիցս է հայտարարել, որ ոչ ոք չի ազատվելու արդարադատությունից: Այդ դեպքում հարց՝ Լևոն-Տեր Պետրոսյանը, որը գլխավոր մեղավորն է, ինչո՞ւ է ազատության մեջ: Նրա նկատմամբ ինչո՞ւ քրեական գործ հարուցված չէ: Նրա գործողությունները շատ հստակ են եղել և նա հիմա պետք է պատասխանատվության ենթարկվեր»,-ասաց նա՝ հույս հայտնելով, որ իրողության փոփոխության մասին հայտարարությունները միայն խոսքեր չեն լինի:

«Առավոտից երեկո հայտարարվում է, որ ամեն ինչ ազնիվ է լինելու: Հույս ունենք, որ այդ ազնվությունը կցուցաբերվի և ինչ-որ կա՝ ջրի երես դուրս կգա: Այսօր Ռոբերտ Քոչարյանի նկատմամբ դատական գործընթաց կա: Թող բացահայտնվի ամեն ինչ,  բայց ինչո՞ւ է դուրս մնացել Լևոն Տեր-Պետրոսյանը, չէ՞ որ հանուն սեփական շահերի հասարակ քաղաքացուն զոհասեղանին դնելը ստորություն է: Պետք է համակողմանի քննություն լինի: Բոլոր նրանք, որոնց գործողության արդյունքում մարդիկ են զոհվել, մարդկանց վնաս է հասցվել, բոլորն անպայման պետք է հատուցեն այդ վնասները: Ուղղակի այս համատեքստում առաջին մեղավորը դրդիչն է՝ Լևոն Տեր Պետրոսյանը»,-եզրափակեց բանախոսը: