Արագած Ախոյանը` ընտրողների մոտ ձևավորված իր կերպարի մասին

Past.am-ի հետ զրույցում ԲՀԿ խմբակցության մեջ փաստացի գտնվող պատգամավոր Արագած Ախոյանը պարծեցավ, որ երբեք խնդիր չի ունենա հաջորդ խորհրդարան անցնելու կապակցությամբ:

Հիշեցնենք, որ պատգամավորը ընտրվել է ԲՀԿ ցուցակով մեծամասնական ընտրակարգով և փետրվարյան հայտնի դեպքերից հետո առաջինն էր, որ դուրս եկավ ԲՀԿ խմբակցությունից: Չնայած դրան նա շարունակեց փաստացի մնալ խմբակցության կազմի մեջ, այլապես, ԱԺ կանոնակարգ օրենքի համաձայն, պետք է վայր դներ իր մանդատը:

«Իմ համամասնականը հավասար է մի քանի հատ մեծամասնականի: Պատգամավոր դառնալու հետ կապված խնդիր չեմ ունենա` հաշվի առնելով այն հանգամանքը, որ Արագածոտնի մարզից եմ, որի բնակչության 80 տոկոսը գաղթականներ են, իսկ ես զբաղված եմ այնպիսի գործով, որը հոգեհարազատ է այդ բնակչությանը: Նրանք իմ կերպարի մեջ տեսնում են այն մարդուն, որը օգտակար կարող է լինել Արևմտյան Հայաստանի խնդիրներով և նոր բան առաջարկել»,- մեկնաբանեց պատգամավորը:

Հարցրեցինք, թե խորհրդարանական տիպի կառավարման անցնելուց հետո պատգամավորը ո՞ր կուսակցության ցուցակով է պատրաստ առաջադրվել: «Պարտադիր չէ, որ անդամագրվեմ որևէ կուսակցությանը, կարող եմ պարզապես ընդգրկվել ընտրացուցակում: Իսկ թե ո՞ր կուսակցության ցուցակով, դեռ չեմ մտածել: Դեռ կա 1.5 տարի աշխատելու համար, իսկ վերջում ինքս ինձ կկշռեմ, եթե պատգամավոր դառնալու անհրաժեշտությունը կա, եթե իմ աշխատելաոճը պատիվ կբերի պետությանը, եթե իմ կարիքը կլինի Ազգային ժողովում, կմտնեմ, իսկ եթե` ոչ, ես այդտեղ անելիք չունեմ»,- եզրափակեց պատգամավորը:

Լիլիթ Լալայան