Ժի­րայր Դա­դա­սյան. «Կրկին խաբ­ված մնա­ցինք»

Ամսվա կտրվածքով Երևանի մնջախաղի պետական թատրոնն ունենում է 4, այսինքն՝ շաբաթական 1 ներկայացում: Այս փուլում թատրոնում փոքր-ինչ լարված շրջան է: Աշխատում են նոր ներկայացման և ամռանը Լեոնիդ Ենգիբարյանի անվան մնջախաղի միջազգային փառատոնի կազմակերպման ուղղությամբ:

«Փորձեր ենք անում մի փոքրիկ փորձասենյակում: Երեկ բերեցինք նոր ներկայացման դեկորները, որոնք զբաղեցրեցին փորձասենյակի ուղիղ կեսը: Չգիտենք՝ ինչպես ենք փորձ անելու: Մեկ-երկու օր էլ բեմում ենք փորձ անում և միայն պրեմիերայի օրը տեսնում՝ ներկայացումն ինչպես է ստացվել: Սա, իհարկե, ազդում է որակի վրա: Բազում խնդիրներ կան, որոնք արհեստականորեն են առաջանում: Ամբողջ կյանքում երազեցի բեմում փորձ անել, որի հնարավորությունը երբեք չեմ ունեցել: Հաղթահարում ենք բարդագույն պրոբլեմ՝ պատրաստելու մնջախաղի ներկայացում, որը խիստ տարբերվում է մյուսներից. շարժվել է պետք, անհրաժեշտ է տարածություն», - «Փաստի» հետ զրույցում ասում է մնջախաղի պետական թատրոնի գեղարվեստական ղեկավար Ժիրայր Դադասյանը:

Այն, որ թատրոնը սեփական շենք չունի, կարծում ենք, որևէ մեկի համար գաղտնիք չէ: Ակնկալվում էր, որ այս տարի այն իր 45-ամյակը կնշի սեփական շենքում, բայց, ինչպես Դադասյանն է ասում՝ կրկին խաբված մնացին. ՊՆ-ն հրաժարվել է իրեն ամրակցված նախկին զինկոմիսարիատի շենքը տրամադրել թատրոնին:

«Մամուլից եմ տեղեկացել, որ պաշտպանության նախարարությունը չի պատրաստվում Մոսկովյան 5 հասցեում գտնվող նախկին զինկոմիսարիատի տարածքը տրամադրել մեր թատրոնին: Մեզ նույնիսկ նախարարությունից տեղյակ չեն պահել այդ մասին: Բայց ժամանակին նախարարի (Լիլիթ Մակունցի- խմբ.) և նրա տեղակալների ներկայությամբ ցույց էին տալիս այդ շենքը և ասում՝ եթե ձեզ հարմար է, այս շենքը ձերը կլինի: Կրկին խաբված մնացինք», - նշում է Դադասյանը:

Մշակույթի նախարարի պարտականությունները կատարող Նազենի Ղարիբյանն ավելի վաղ նշել էր, որ ժամանակին մնջախաղի թատրոնին հատկացված գրապալատի շենքի մի մասը հուշարձան է, և այն արտաքին միջամտության չպետք է ենթարկվի։ Այդ իսկ պատճառով էլ որոշում է կայացվել այն փոխարինել մեկ այլ շենքով: Դադասյանը զարմացած է. շենքերի փոխանակության մասին խոսակցություն ընդհանրապես չի եղել: «Երբ ինձ զինկոմիսարիատի շենքը ցույց էին տալիս, ասացին, որ ՊՆ-ն այն պետք է հանձնի պետգույքի կառավարման կոմիտեին, և, եթե հարմար է, ապա թատրոնը կարող է դիմել կոմիտեին, և այդ շենքը կտրամադրեն մեզ: Ես համաձայնեցի: Մենք, իհարկե, ենթադրում էինք, որ երբ մեզ տրամադրվի նախկին զինկոմիսարիատի շենքը, գրապալատի շենքը հետ կվերցնեն, բայց փոխանակման մասին խոսք չի եղել: Հակառակ դեպքում՝ ակնհայտ է, որ ոչ ոք չէր փոխանակի առանձին շենքը մեկ այլ շենքում գտնվող 3-րդ հարկի հարկաբաժնի ինչ-որ մի մասի հետ», - նշում է թատրոնի գեղարվեստական ղեկավարը:

Նա ասում է, որ օրեր առաջ իրեն զանգահարել են Կենտրոն վարչական շրջանի ղեկավարի աշխատակազմից: «Ասում էին՝ քաղաքացիներ են զանգահարել թեժ գծին և բողոքել, որ թատրոնին պատկանող տարածքի՝ հուշարձանի վերևի հատվածից «սվաղը» թափվում է և այնտեղով անցնելը վտանգավոր է: Այսինքն՝ հուշարձանը փլվում է: Ասացի, որ իզուր են մեզ դիմում այդ հարցով: Պետք է դիմեն մշակույթի նախարարությանը, որ նրանք հուշարձանը պահպանեն: Այո, մեր տարածքն է, բայց մեզ չեն թողնում այնտեղ մտնել»:

Դադասյանի համար զարմանալի է նաև Նազենի Ղարիբյանի այն հայտարարությունը, որ հիմա նախարարությունը նոր տարածք է փնտրում, իսկ թատրոնի նորոգման նպատակով պետբյուջեով տրամադրվել է 42 մլն դրամ։

«Այդ ինֆորմացիան ինձ համար խիստ զարմանալի է: Դա այն 50 միլիոնն է, որի մասին վաղուց ասում էինք: Քաղաքաշինության պետական կոմիտեի նախկին նախագահ Նարեկ Սարգսյանը հատկացրել էր կոմիտեի տնտեսած գումարներից՝ մեր թատրոնի շինարարությունը սկսելու համար, և քանի որ դա անցյալ տարի տեղի չունեցավ, այդ գումարն ուղղակիորեն 2018 թվականի պետբյուջեից տեղափոխվեց 2019 թվականի բյուջե: Սա ընդամենն այդ գումարն է, և այնտեղ խոսքը շուրջ 50 միլիոնի մասին է:

Նոր շենք գտնելու հայտարարության մասին: Բազմիցս ասել ենք. գումարը կա, տարածքը մերն է (նկատի ունի գրապալատի շենքը- խմբ.), թող վերանորոգեն և տրամադրեն մեզ: Ասում են՝ շենքը հուշարձան է, փոփոխել չի կարելի: Մենք էլ ասում ենք՝ պաշտոնական մուտք չենք ուզում, հանդիսատեսը թող թատրոն մուտք գործի ծառայողական մուտքով: Սա մեզ լիովին բավարար է: Ըստ էության՝ այդ իմաստով նախագիծը պատրաստ է, չնչին ձևափոխություններով կարելի է վերանորոգել: Նոր շենքի փնտրտուքը տարիներ է տևելու: Քաղաքի կենտրոնում անհնար է թատրոնի համար հարմար շենք գտնել», - փաստում է մեր զրուցակիցը՝ հավելելով, որ նամակով դիմել են հիմա արդեն ԱԺ պատգամավոր, «Իմ քայլը» խմբակցության ղեկավար Լիլիթ Մակունցին՝ խնդրելով պարզաբանել թատրոնի՝ իրենց չտրամադրվող շենքի ճակատագիրը:

ԼՈՒՍԻՆԵ ԱՌԱՔԵԼՅԱՆ